بسم الله الرحمن الرحيم
اهلا بيكم جميعا
( هنا بنات مصر )
الموضوع هيكون عبارة عن ( 10 اسئلة ) الضيف هيجاوب
على ( 9 اسئلة فقط ) والسؤال الاخير الضيف هيختار عضو
من المنتدى يسئلة سؤال والضيف هيجاوب على السؤال دا
الاسئلة هتبقى بخصوص ( الاحلام / اسف يا .. / مصر)
طبعا تم تغير فقرات الحلقة ودا عادى محدش يقول حاجا
مش هطول عليكم ضيف حلقة النهاردة
SiLver Spectra
ودلوقتى تعالو نشوف طارك النهضة قال اية
الفقرة الاولى
الحلم
1 / اية الحلم الى طارق مازال يبحث عنه وبيتمنى الوصول الية ؟
بحلم اعمل مشروع يجبلي دخل كبير ابقى من خلاله مليونير بالفلوس يابا تعيش ملك
2 / اية الحلم الى حاسس انك بتحلم بية كتير جدا ومستغربة ؟
و الله يا مرشد انا بنسى الحلم اللي بحلمه اول ما بصحى
حلو و لا وحش مش بفتكر ..
نادر جدا جدا لما اركز في الحلم بعد ما اصحى على طول و افتكر محتواه
غالبا مجرد ما بصحى دماغي الواقعية تشتغل فتنسيني الحلم على طول
..دا لو حلمت
3 / حاسس ان حياتك الحالية هى دى الحياة الى كنت بتحلم بيها ؟
أكيد لأ
لو الانسان حس بكدا فهو هيعيش بدون حلم و امل ..يعني هيعيش مكتئب
الامل و الطموح هما الشيء الوحيد اللي بتكسر الكآبة
و طول ما انت عندك شعور انك تحت الحلم ..بيفضل الامل جواك
الفقرة الثانية
( اسف يا .... )
1 / تقول لمين فى المنتدى انا اسف بسبب ....... ؟
أي شخص زعل من اي موقف كان..
بعد فترة بتحس ان الموضوع تافه و ما يستاهلش
2 / مين فى حياتك الشخصية تقولة او قولتلة قبل كدا انا اسف على ...... ؟
مش متذكر و الله .. بس قريب ..البقال اللي جنبنا اتريق عليه و هو معدي و كان معايا حد ..و اضايقت ..فروحت ردتله الهزار عشان احسسه بنفسه قولتله : ازيك يا ابو دقن .. و شدينا في نقاش و كدا و اعتذرلي و اعتذرتله و خلص الموضوع
3 / شايف ان كلمة ( انا اسف ) بتقلل من الشخص حتى لو كان انتا الى هتقولها ؟
لا طبعا بترفع من شأنه
الفقرة الثالثة
( مصر )
1 / شايف مصر كانت ازاى قبل ترشيح ( مرسى ) وبعد ماتم ( خلع مرسى ) ؟
عايز الصراحة ؟
الاختلاف بين مصر قبل 25 يناير و بعدها هو ان بقى في انفلات امني
و الناس طلعت اسوء مافيها ..هو دا الاختلاف لحاد دلوقتي
الاخوان عاملين زي واحد بقاله 80 سنة عطشان و نفسه في مايه و كان محروم
منها ..و اول ما شافوا بركة مايه وسط الصحرا راحوا طردين كل الناس التانيه
و مش خلوا حد يشرب منها غير الاخواني
(عملوا في الناس اللي كان بيتعمل فيهم)
فلو مرسي ما تمش خلعه كالن السيناريو البديل هو انه كان هيخلع المعارضه
و هيشمع الاعلام و دا قالها صراحة : كفايه عليهم سنة
2 / من خلال متابعتك للاحداث الحالية فى مصر شايف الانتخابات القادمة ازاى ومين فرصتة هتكون كبيرة ليكون رئيس مصر القادم ؟
مش هقدر اجاوبك دلوقتي لان لسه بادري و لسه مش عارفين مين مترشح ..بس مليون في الميه مش هيكون اخواني
أما مجلس النواب فكالعادة القوى الاخرى هترشح 50 عضو لكل دايرة
و تتعمل اعادة بين الاخوان و النور ..و اظن انا شرحت ازاي بيفوز الاخوان
في التصويت قبل كدا
(زي العضو صاحب العشيره اللي بيفوز في الشعر هنا في المنتدى مع انه خيبان في الشعر و غيره احسن منه)
و بالتالي لو القوى اللي بتسمي نفسها مدنية مش اتحدت و نظمت نفسها كويس ..هيفصل مجلس النواب باغلبية اخوانية و الله اعلم
3 / الاخوان المسلمين تقولهم اية ؟ وشايف ان وجودهم فى مصر هيستمر كحزب سياسى والا هم خلصو على نفسهم ؟
الله اعلم ..لو حصل تصعيد كبير ..ممكن يتم حظر الجماعة بشكل امني ..
و بصراحة كدا لو طلع امر القبض عليهم الاهالي هيبلغوا عنهم لانهم معروفين ..يعني الاخوان الخسرانين مهما كان
و لذلك عندنا هنا في دمياط بطلوا يعملوا مظاهرات بعد الكام علقة اللي اخدوها
و الكام محل اللي اتحرق ليهم ..فبقوا بيبعتوهم للقاهرة بحيث
ماحدش يعرفهم هناك
بس اظن النظام الحالي مش حابب يستبعدهم لحاد اللحظة و بيرحب بمشاركتهم
بس هما مش عايزين لان الموضوع بالنسبالهم انقلاب
احتمال يتم حظر الجماعة بأمر قانوني بعد ما اتفضح موضوع الجمعية اللي اترخصت في يوم و ليلة و بدون اي رقابة (شغل وساطة و معرفة)
بس الموضوع دا لو تم فهيتم أدام شوية
عموما أنا شخصيا مع مشاركة الكل بدون استبعاد أو اقصاء لاي طرف كان
طالما الطرف دا مسالم و بيحب البلد ..حتى لو كان الطرف دا مسؤول عن
التهميش اللي حصل قبل كدا لأنه في النهاية (مصري) اخواني سلفي مسيحي
ليبرالي كلنا مواطنين و لينا نفس الحقوق
و انتقادي شخصيا بيكون للشخص فقط اللي بينمي الطائفية و التفرقة في
المجتمع ..لكن انت ملتك ايه ماتفرقش معايا المهم تكون انساني و بتحترم
عقول الغير
اخيرا
10 / اختار عضو واسئلة سؤال ولازم تختار عضو معين ؟
روح صامته ناوية تخش كلية ايه ؟
استغربت للسؤال المفاجئ دا ع العموم بص انا مقررتش لسه الموضوع لسه معلق بالمجموع وهحسب النسبة بعد المعادلة يوم ما اقرر هقول ان شاء الله و شكرا
كدا انتهت ثانى حلقة من برنامج
( هنا بنات مصر )
انتظرونى وضيف جديد وحلقة جديدة
قريباااااااااااااا
ملحوظة / البرنامج تحت التنفيذ وممكن نشوفة بشكل تانى الحلقات القادمة