[حجازى فارس المصرى]

ليه يا حبيبى التكشيرة
شايف فى عيونك تغيرة
مش بقسى أبـــدا والله
ولكنى بحبـــــك وبغيرة
*******
من حقى ياحبيبى أغير
والحب ماليهوش كبيـــر
لو كل الدنيا علشانــــك
دا عليك والله ما كتيــــر
*******
وبحبك والغيرة ف-طبعى
وعشانك انا قايد شمعى
واهو نازل م-الشوق أمواج
فى عنيى شوف بص دمعى
********
أنا ودى اخدك م-الدنيا
ونعيش أحلامنا حاجة تانية
أنا وانت وبس ياحبيبى
وتفوت الأيام وفى ثانية
********
أنا ودى أخدك م-الناس
وف- قلبى تشوف الاحساس
تصبح دنيتنا بلون وردى
ياغالى واغلى من الماس
********
أنا ودى أخدك وف-حضنى
لا اسيبك ولا انت تسيبنى
من يومى أنا بحلم بيك
تعا- قرب وف- عشك ابنى
*********
أنا ودى من قلبى تقرب
وتحس بالغيرة تجرب
وتحس نار الاشواق
محتاجة لقلب ومدرب
*********
وبغير م-النسمة عليك
وبغير ولانى شاريك
مش بايعك يا حبيبى أبدا
بالروح ياحبيبى افديك
*******
وبغير م- العقد اللى ف-جيدك
يتمايل يعزف أناشيدك
وبغير م-الشنطة اللى ف-كتفك
والساعة ياحبيبى ف-إيدك
*******
وبغير ولكنى وإنى
أنا شايلك فى العين والننى
طب ليه ف- الحب أتعذب
وبسببك فى بكاى أغنى
*******
غيران والله غيران
من حبك والله حيران
ماتحس وبلاش القسوة
ليه ترفض تروى العطشان
******
من زيك يا حبيبى قولى
يستاهل الغيرة وذلى
وبقولها بفمى المليان
حبيتك وف-صوتى هعلى
*******
.
.
.
.
.
اتمايل وبضحكة رمانى
راح قلى يا ضىّ زمانى
انا حبك شايلة ف-الننى
من غيرتك حسيت بامانى
**********
بقلمى/ صعب نسيانك