[აα∂ Ԑγεა]

السلام عليكم ورحمه الله وبركاته

الدور عليا في صيحة ظواهر اللي منتشره دي
التوبيك المفروض ضمن مسابقة الظواهر
لكن الحقيقة معرفش دلوقت هو لسه فيها ولا لا
بس بعتذر لموروشو فعلا ظروف خارجة اللي اخرته
وبنزل التوبيك اهو حتي لو مش هيبقي ضمنها
بس ابقي نزلت المطلوب وخلاص


,

ظاهرة الردود المكررة " الدوارة "

الاول وش كده اكيد بتكلم علي الردود السطحية
وبالاخص اللي هو الرد المكرر الدوار منها دا
الرد الرحالة دا بتاع الفن والسياسه والالعاب والرياضة وكله كله )
ومع انكم اكيد كلكم عارفينهم بس اديكم امثلة

" نشاط مميز تسلم ايديك يدوم النشاط والتميز "
" تسلم ايديك علي الموضوع الجميل , في انتظار جديدك "
" جزاك الله كل خير شكرا علي الافادة "
" شكرا علي الافادة والمعلومات شكرا علي المجهود تسلم ايديك "
" مجهود مميز تسلم ايديك " او " يسلمو علي الافادة "

او الرد الراقي الذي ينم عن ثقافه و فكر رهيب
واللي هو
" اسمح لي ابدي اعجابي بقلمك وتميزك واسلوبك الراقي وتالقك "

والموضوع طبخ او ازياء اصلا


,,,

الردود دي طبعاا لو ملاحظتوش لسه فكلها من المنتدي هنا
ظاهره غريبة جدا
انك تفتح الساعه 1.00 ولا 1.30 بالليل
وتلاقي كام عضو كل واحد فيهم عمل 50 رد ولا 70 او اكتر حتي
ليييييييييه مرادونا
وبعد كده تكتشف انهم محصلوش احمد جعفر او حتي السيد حمدي
وان الردود كلها رد واحد في50 توبيك

,,

لا والاجحم " معرفش معناها اصلا هههههه "
انك تلاقي الناس دي دايما تتكرم نشاط وتترقي وتمسك اشراف
" دا لو مكانوش مشرفين او اعلي اصلا ! "

,,

الظاهره دي موجودة بكثره هنا
والحقيقة بتقول انه مش مجرد اعضاء جدد ؟!
لا الردود دي بنشوفها من كل الرتب من الاخضر للبنفسج !
من اول عضو جديد بيحاول يوصل ل100 رد علشان يفتح الخاص
لاعضاء قديمه بتحاول تحقق ميدالية " الومبيمنتدلية " !

,,


الحلول المتاحة ؟!

الاداره حاليا مركبة هاك منع المشاركة الا بعد عدد من الثواني وبالتحديد 30 ثانية
الهاك دا فعال من بداية العضوية العادية للعضوية المميزة لكن من الازرق وما فوق غير فعال
بما انه الهاك معمول لعدم تكرار الردود الغير مجدية بشكل متواصل ومتكرر للزيادة في عدد المشاركات
وبما ان العضويات اللي ما فوق بتعمل نفس الحركة دي ؟!
اظن طبيعي لو قلت اول حل هو تفعيل الهاك علي الجميع بلا استثناء
اظن دا كفيل النوعيه دي بنسبه 25 %

,,

في هاك كمان علي ما اظن دورت عليه الحقيقة بس لقيت ناس بتدور مش ناس بتقدم
لكن انا عارفه كويس ووظيفته هيا عدم تكرار المحتوي اللي ف الردود
كمثال
انت جيت كتبت في رد " شكرا علي الطرح الراقي " وخرج من التوبيك " من غير ماتقراه اكيد
ورحت توبيك غيره وجيت برضوة من غير ما تقراه وجيت تكتب " شكرا علي الطرح الراقي " ودست مشاركة
هتلاقي المنتدي ميقبلش ردك ويقولك انه سبق وقمت بتنزيلة في موضوع اخر في اخر خمس دقائق
اكيد طبعا الادارة تقدر تعرف الهاك دا ولو مفهوش مشكلة ولا ضرر علي المنتدي
تركيبه كفيل بحل النوعيه دي من الردود بنسبه كبيرة جدا !

,,


اخر حل معايا وابسط حل واصعب حل !
هو تغيير العقلية !
وبما ان تغيير عقلية العضو ذو المشاركة الدوارة صعب !
لانها عقلية رياضية تنافسيه بحته تسعي لمنصات التتويج

فاللي قدامنا هو تغيير عقلية المسابقات , التكريمات , والتعيينات !!
مسابقاتنا تبقي كم مش كيف ؟
تسعي لمشاركة راقية مش مشاركة وعدد وخلاص !
ويكون طلب اساسي فيها مشاركات هادفه مش سد خانة !

تكريماتنا وتعييناتنا تبقي للناس اللي بتتعب بجد
مش اللي بتجري علي 100 توبيك وترزع نفس الرد وتقول نشاط !

تغيير العقلية الخاصة بالجزئية دي كفيل انه يغير عقلية النوعيه الرياضية
فحب التنافس هيلاقي قدامه طريق واحد علشان يتشبع
وهو طريق المشاركة بجد لاجل التكريمات المستحقة بجد !


دا اللي عندي ف الموضوع دلوقت فهاجي هنا واسأل
ايه رايكم في النوعيه دي من الردود ؟ وهل بترضيك لما بتنزل في موضوع ليك ؟
وايه رايك في النوعيه دي من الاعضاء ؟
هل هيا دي النوعيه اللي تستحق التكريمات دايما ؟
واللي بيعملوه دا هو مفهوم النشاط ؟
وهل هو دا الغرض من وجود المنتديات المشاركة بالاسفاف دا ؟
وهل مقبول ان الناس دي تحظي بتكريمات ورتب لمجرد نشاطها اللي بالنوعيه دي ؟


في انتظار مشاركاتكم