[Lamees]

السلام عليكم

امبارح يا جماعة كان اول يوم في صرف المعاشات
وانا المسئولة عن هذا لموضوع يعني انا اللي بقبض الفلوس
المهم اول يوم في القبض ده تشوف العجب
زحمة رهيبة وقلة ادب وسرقة وخناقات وشتيمة
ومحدش طايق حد كل واحد او واحدة عندهم استعداد للخناق
المهم انا بفوت كده يوم ولا اتنين واروح كده في الروقان
بس المرة دي كنت مستعجلة اوي عشان راسمه في دماغي على
شنطة وجزمة
قلت بقى روحي واللي يحصل يحصل
المهم وصلت مكتب البريد ودخلت وشفت امة لا اله الا الله
وهما اربع شبابيك للصرف 3 منهم زحمة جداً والشباك الرابع
رايق جداً عليه 3 افراد فقط
قلت بقى خليكي في الرايق وبعت البطاقة
واحد بقى ناصح من اللي قاعدين قالي يا ابلة لو رقمك يحتوي على
8 ارقام بقى اسمك هنا في الزحمة دي
طب اعمل ايه وانا بعت البطاقة وخلاص في الشباك الرايق
وكنت هبعت ارجعها واحطها عند الزحمة
ولسه مخدتش قراري بصيت لقيته بينده علي اسمي
قلتله افندم
رحت الشباك وعطيته الرقم ومضيت وخدت الفلوس بكل بساطة
وعديتهم وحطيتهم في الشنطة وخدت بطاقتي
ورحت خارجة من المكتب
كل ده في خلال خمس دقايق
وسط ذهول تام للموجودين وهما بيبصولي وبيحسدوني ولاد الايه
المهم رجعت البيت بعد خمس دقايق الموضوع كله استغرق ربع ساعة
كان يوم لذيذ والله بس اللي مش لذيذ اني قضيت باقي اليوم بلف على الجزم والشنط
اعمل ايه بقى مش بيعجبني اي حاجة وخلاص
وفي اخر اليوم تم بحمد الله شراء جزمة وشنطة بعد يوم شاق من اللف
هاااااا اسمع حد بقى يقول مبروك