[Nàdøỡsha]

كان فى ولد اسمو سمير ماشى فى بلاد الله لخلق الله بيدور على رزق ومعاه أكل بسيط يكفيه فى طريقو وهوا ماشى وبيستريح على صخرة من تعب الطريق وطلع ساندويتش عشان جاع ولسة هايحط الساندويتش فى بقو بص لقى نملتين بيبصو عليه وبيقولولو: احنا هانستنى الفتافيت اللى هاتقع منك علشان احنا وصحباتنا النمل جعانين جدا صعب النمل على سمير وقال أنا هاقسم الساندويتش انا وانتو عشان تاكلو انتو وصحباتكم النمل فرح وقال: ده كرم كبير قوى منك أحنا كنا طمعانين بس فى الفتافيت لكن انت طلعت كريم وطيب ومسيرنا هانردلك الجميل بتاعك ده ضحك سمير وقال: أنا مش منتظر رد أنا دايما بعمل الخير لله وانا لما عملت معاكم ده وانا واثق ان انتو حشرات صغيرة جدا ومش ممكن هاحتاجلكم فى يوم يعنى أنا مش بعمل حاجة عشان مستنى مقابل. راحت نملة قالتلو: متستقلش بينا ياسمير مسيرك تحتاج لنا برضو ومسيرنا نردلك الجميل. وقام سمير وقال للنمل سلام يمكن نتقابل تانى شى شوية سمير وكان جمب بحيرة صغيرة وسمع صوت غريب بص تحت رجليه لقى سمكتين على الشط وبيعيطو عشان ليهم فترة بعاد عن المية ومش عارفين ينزلو البحر تانى بصو لسمير وقالولو: لو سمحت الحقنا ونزلنا المية لحسن قربنا نموت وبسرعة سمير مسك السمكتين ورماهم فى المية وفضل واقف لغاية ما اطمن انهم بقو كويسين وقال: الحمد لله انتو دلوقت بخير قالت لسمير سمكة: الحمد لله أحنا بقينا بخير وشكرا ليك جدا ومسيرنان نردلك معروفك ده ضحك سمير وقال: العفو العفو أنا عملت كدة ومش مستنى منكم رد للمعروف وانا عارف انكم مش هاتنفعونى فى حاجة لكن انا بعمل المعروف لوجه الله وقالهم سلام ومشى ووصل سمير لمدينة كبيرة ولقا على باب المدينة إعلان كبير مكتوب فيه أيها الناس قرر الملك تزويج ابنته الأميرة الجميلة كل من يجد نفسه مناسب أن يصبح أمير يتقدم للملك وينفذ شروط الملك ناس كثير خافت تتقدم عشان أكيد شروط الملك صعبة لكن سمير قال توكلت على الله واتقدم للملك وقالو أنا عايز اتزوج الأميرة بص الملك لسمير وقالو: هاطلب منك طلبين ولازم تنفذهم وهما دول شروطى عشان تتزوج بنتى الأميرةوتبقى أمير وشاف سمير الأميرة وعجبتو خالص وقال للملك : بإذن الله هاحارب عشان أنفذ طلباتك الطلب الأول وسقف الملك بإيده ودخل الخدام ومعاهم شوال كبير بص سمير على الشوال ومش فاهم ايه اللى جوا الشوال الملك قال: الشوال ده فيه رز وعدس والمطلوب منك تفصل الرز عن العدس وقدامك 24 ساعة بس سمير خد الشوال وقال: الله المستعان ومشى سمير وهوا محتار ازاى هايفصل الرز عن العدس فى 24 ساعة بس دول عايزين سنين وبال طويييييل وفجأة وهوا قاعد محتار شاف النملتين اللى ساعدهم بالأكل قالت نملة: ازيك ياسمير مالك زعلان وحيران ليه؟ قالها: الملك طلب منى طلب غريب قوى علشان أتجوز بنتو وأبقة أمير وحكالها على شوال الرز والعدس قالت النملة: يااااه دى سهلة قوى مش قلتلك انك مسيرك هاتحتاجلنا؟ وبسرعة جمعت النملة صحباتها النمل وقعدو يفصلو الرز عن العدس وفى وقت بسيط بقة الرز لوحدو العدس لوحدو وفرح سمير فرح شديد قوى وقال للنمل: أنا مش عارف أشكركم ازاى النمل قال لسمير ده رد لجميلك ياسمير عشان انت اللى سبقت بالخير وشكرهم سمير وراح للملك وذهل الملك أول ما شاف سمير فصل الرز عن العدس وقال الطلب التانى عايز جوهرة تكون غريبة وجميلة تقدمها هدية للأميرة وقدامك 24 ساعة وبرضو مشى سمير وهوا محتار ووقف عند البحيرة وشافتو سمكة من السمكتين اللى أنقذهم وقالتلو: مالك ياسمير محتار ليه قال سمير: الملك طالب منى جوهرة ثمينة وأنا فقير مش عارف هاجيبها ازاى قالت السمكة: سهلة قوى ياسمير ولا تحير نفسك قالها: إزاى؟ قالت السمكة: عندنا جوة فى قاع البحر مجوهرات كثير قوى أنا هانزل أجيبلك أحلى جوهرة وأبقة كدة رديت جميلك ليا وجابت السمكة جوهرة جميلة لسمير وفرح قوى سمير وشكر السمكة والسمكة قالتلو: انت اللى سبقت بالخير وقدم سمير الجوهرة للملك وسمير الفقير صار أمير وتوتة توتة فرغت الحدوتة وطبعا الحدوتة علشان تعلمنا اننا دايما نعمل الخير مع كل الناس مش مع الناس اللى تقدر ترد الجميل بس