[صمتى كلام]

وانا...مولود.. قالو ده واد خيال
وله نصيب فى الغيب متشال
.
طلع النصيب مكتوب......... حظى يكون مقلوب
عكس اللى كان متقال
.
قالو رزقى كتير ..وشكلى كمان محظوظ
20سنه وكبير. وتشوفنى تقول ده عجوز
.
دنيا وفيها العجب
.
فى ناس مولوده....... بمعالق دهب
وناس علشان جنيه تمون من التعب
.
وناس فى الحزن غرقانه من غيرما تعرف سبب
دنيا وفيها العجب................ وكل شئ بيجوز
.
وانا لسه فى اللفه
.
ابويا شلنى وأذن فى....... ودنى
وواحده جايه تبخرنى وتحسدنى
.
وناس رايحين وناس جايين
وواحده شاليتنى فى غربال
.
وهزيتنى شمال ويمين
وناس بتجهز الفته
.
وناس بتفرق الفطره
وعيال بتجرى فكل حته
.
وناس بتشاور على عينونى
اصلهم كانو زمان حلوين
.
وانا بصرخ على الاخر وبتألم
بس هما مش فاهمين
.
وكبرت شويه وبقت اسحف واشب
واول حاجه اتعلمته اشتم ..واسب
.
دوله قول لعمك ياحمار
دوله ....تف على خالو
كانو واخدين الكلام بهزار
كبرت و فضل الكلام على حاله
.
كبرت شويه كمان
وعرفت كام شارع وحاره
ولعبت فى كل مكان
وشربت مره سيجاره
.
وبدات سن الشقاوه
ولعبت ماريو واتارى
وحدفت واحد بطوبه
وعورت عيل جارى
.
ودونى كت تاب ...احفظلى كام سوره
وفى يوم رجعت البيت واديه مكسوره
.
امى شافتنى جالها ذهول
وقالت بصوت عالى مالك يا عدوله
الشيخ ضربنى قالت اقعد هنا جنبى
بلاش ...كت تاب
هنوديك سنه اولى
.
خلاص دخلت المدرسه .وقاعد فى تخته كويسه
وعرفت كلم صاحب ..........لكن جيوبهم مفلسه
.
ودخلت أبله سماح كانت اول مدرسه.......................هذا الاسم حقيقى
واول درس اخدته مش فاكره
لو كنت فاكر مكنتش سبت المدرسه ........................كملت الابتدائيه بس
.
ورجعت تانى للشارع وشوفت شغلانه
كنت الحياه صعبه وظروفى .......تعبانه
.
واشتغلت كتير هنا وهناك
عجلاتى كبابجى وسباك
.
ورغم المشاكل والهموم
عمرى ما نسيت نفسى فى يوم
.
علمت نفسى كل شئ
اقراء واكتب واكون جرئ
.
وفى يوم بعد صلاة العصر
فتحت الجهاز بدور على حاجه نقصانى
دخلت منتدى بنات مصر
حبيتكم وحلفت ما هسيبكم
ومعاكم هبداء عمر ى من تانى
.
الكلام ده كله حقيقى
لسه كاتبها دلوقتى
5..12...20013