[morshooo]

بسم الله الرحمن الرحيم

اهلا بيكم جميعا

وحلقه جديدة من برنامجكم

( اجمد عضو )



النهاردة معانا ( مراقبه ) نتنيزة جدا فى حضورها

غابت لفترات صحيح بس لما بتكون متواجدة بيكون ليها

شكل وطابع خاص بالمنتدى .

معانا المتميزة /

Lost Pearl



فى البدايه تعالو نشوف عناوين من الحوار

Lost Pearl : الفترة الحاليه فى حاجتين فى المنتدى رخمين :
الاعضاء مش بتصبر على اعتماد مواضيعها والاعضاء بتستفز
بعض عشان الادارة تقفل المواضيع

المراقب بيشوف المواضيع المتراقبه وبيشوف الشكاوى وبعد كدا بيشارك فى المنتدى

الادارة بتشكر فى المراقبين لان دا طبيعى لو مش مميزين مش هيكونو مراقبين

انا غبت عن المنتدى ( 3 مرات ) وكانو غصب عنى منهم مرتين عشان كنا بنعزل

المراقبين الى اتعينو مؤخرا الدراسه واخدا وقتهم بس موجودين فى الشكاوى دائما

لو انا مقصرة مش هزعل لو حد شالنى ومنه دائما بتنصحنى

عمى اتوفى قبل فض الاعتصام وكان فى اعتصام النهضه ومش مع ( رابعه ) عشان السبب دا .

الداخليه بتموت فى الطلاب ومفيهاش حاجا لما نتظاهر داخل الجامعه

دى كلمتى لاعضاء المنتدى ولمعارضين ادارة المنتدى



ودلوقتى مع الحوار


س / فى البدايه اهلا بيكى فى اجمد عضو ؟

أهلا بيك يا مورشو بيتك خد راحتك

س / اخبار الدراسة ايه خاصه اننا خلاص داخلين على امتحنات الترم ؟

الدراسة جميلة و الدنيا جميلة ،، هههههه عادى مش فارقة كتير
انا بمتحن من آخر شهر 10 و لسة مخلصتش

س / هنكلم فى البدايه عن المنتدى ؟ اية رئيك فى المنتدى الفترة الحاليه ؟

الفترة الحالية بقى في حاجتين رخمين ، اولا الناس مبقتش بتصبر
على مواضيعها على ما نوافق ، هوب تلاقيه بعد نص ساعة
بالكتير لو مش ف ساعتها منزل اهداء حد يوافق على موضوعي
، عارف لو حد جديد و مش متعود ماشى ، بس ده كله بقي بيعمل
كدة >> تقريبا الموضة الجديدة و لا ايه

الحاجة التانية تحس في بعض الناس قاعدة لبعض الناس التانيين ع
الواحدة ،،، امممم ده عمل موضوع أجري انا كمان اعمل ارد
عليه ، و لا اقولك ، خليني ارد و استفزه عشان الإدارة تشيل
الموضوع و هو يتغاظ ههههههههههههههههه
و اي هبل من ده بقى انا بادي مثال من خيالي ، و مش بقول ع
الناس اللي زعلانة من الإدارة ، انا بتكلم عامة بين الأعضاء
و بعض

س / طيب موضوع اعتماد المواضيع فعلا اصبح مشكله فى
المنتدى فى اعضاء مش بتستحمل موضوعها يستنى ساعه مثلا
على ماحد يدخل يعتمدة بس برضو فى مشرفين المواضيع مش
بتعتمد الا بعد ساعات ويمكن يوم كامل ؟

مافيش تأخير زيادة ، و يوم كامل دي مستحيلة و لا حتى نص يوم
، يمكن الحاجة اللي بتنزل الفجر بس
ما المستعجل بيبعتلنا احنا مش بنتأخر ،،

س / بمناسبه ان الاعضاء بتستعجل على نزول مواضيعها لو انتى
كمراقبه موجودة ومشرف قسم موجود بيحقلك تعتمدى المواضيع
والا بتسيبى دا للمشرف ؟

ما شاء الله القيل و القال علي اخره ههههههههههههه
اكيد طبعا من حقي ،، و انا ايش عرفني المشرف هيبقي بيعمل ايه
ابسط حاجة ممكن يكون نته فصل بس اسمه موجود ،، مش كدة
و كمان الاعضاء كل شوية بيشتكو من طول فترة الاعتماد ،،
و بيعدو يقولو المشرفين موجودين و مش بيوافقو علي
مواضيعنا ليه
فـ منعا للاحراج بين العضو و المشرف احنا دايما بنبص ع اللوحة
عشان نوافق اول باول

س / فى اعضاء اوقات بتقلل من شغل المراقبين فى المنتدى انتى كمراقبه ايه الى بتعمليه كل يوم فى المنتدى ؟

اللي بعمله كل يوم ف الدراسة و بالذات السنة دي اني بالقي نظرة
كل شوية ع الموضوعات المتراقبة ، و منها ع الشكاوي و بعدهم
المشرفين ، و اذا كان في ف قسمي حاجة جديدة باردو بارد عليها
و اتابعها

س / شايفا ان دور المراقب هو اعتماد مواضيع ومراقبه المشاركات ؟

و دوره بعد كدة انه يشارك و يشوف الشكاوى و يتابع مثلا يعمل
مسابقات و أنشطة زي دي ،،

س / دائما الادارة بتشكر فى المراقبين وبعد فترة نلاقيهم بيغيرو
المراقبين وفى مراقبين كتير مشيو وغيرهم فضل زى ماهو ؟ ايه
الى بتقدميه للمنتدى خلال وجودك الفترات الى فاتت ؟

ما هو اكيد عشان ترقيهم يبقى لازم بيكونو كويسين ، و اما بيكونو
كويسين يبقى اكيد هتثني عليهم و على شغلهم أهم حاجة
ايه اللي بقدمه زي ما قلتلك السؤال اللي فات ، بتابع اد ما اقدر
بس مشاركات مش نافع لأن للاسف معنديش وقت خالص ،
يمكن دي الحاجة اللي مقصرة فيها حاليا ،،

س / فى اعضاء شايفا انك بتغيبى لفترات وبترجعى وبرضو وجودك كمراقبة مستمر ليه انتى الوحيدة ويمكن معاكى ( سارة ) مستمرين حتى الان ؟

انا غبت تلات مرات ، مرتين كنت بعزل و طبعا على ما النت
يركب فيها ع الاقل شهر و نص غياب ، و تالت مرة كان عندي
ظروف و مدخلتش حوالي شهر بس كدة
مفتكرش اني غيبت تاني غير ممكن أيام راجعة مرهقة مش بفتح
و ده طبيعي هههههه
ههههههه و انت شايف اني مقصرة لدرجة اني اتشال ،،
و سارة و آية موجودين دي مش راجعالي ، شوف طارق بقى




س / هو طارق الى بيعين المشرفين والمراقبين والا دمعه وساحر زى ما اتقال ؟

هو الراجل قال بنفسه انا مش بعين حد ههههه
منة و أمجد هم المسئولين تماما عن كدة من اقتراحات المشرفين
و المتابعة كل يوم

س / بصراحه شايفا المراقبين الى تم تعينهم مؤخرا اضافو حاجا
لمنصب المراقب ؟ رغم انهم اختفو بعد تعينهم كمراقبين ؟

اسماء و أحمد بيحاولو اد ما بيقدرو ، بس طبعا الدراسة واخدة
حيز زينا كلنا ، يمكن عشان كدة بس اختفو
إنما هم موجودين دايما ف الشكاوي مثلا ، ربنا يوفقهم

س / بس الى اعرفه انكم ماشيين بنظام الى يلحق يرد على
الشكوى يبقا هو المسئؤل يحلها ؟ يعنى معتقدش ان فى مرة مثلا
انتى دخلتى وساحر ومنه واسماء ومثلا كل حد فيكم قال حل لازم
الى يدخل يكون شايف ان حل الى قبله صح فيرد ولو معارض
محدش بيرد على الشكوى ؟

دلوقتي شكوى نزلت و انا و منة مثلا موجودين ، منة شافت
الشكوى ، هتستناني و لا هتبعت تاخد رأيي مثلا ؟؟
اكيد هترد يعني
لا احنا بنساعد بعض ، يعني لو حد عنده حل افضل يقدر يقوله
و اللي معارض حد بيبعتله ع الخاص و نتفاهم >> بس نادرا ،،

س / علاقتك بدمعه حائره هى السبب فى وجودك واستمرارك كمراقبه حتى الان ؟

اه يابني طبعا انا مصاحبة منة عشان أضمن مرتبي اصلا

س / لا بكلم بجد تفتكرى ممكن منه تيجى فى يوم وتقولك انتى هتسيبى المراقبه او هتوافق على حاجا زى كدا ؟

لو انا مقصرة مش هزعل لو حد شالني ، بس يعني هي بتنصحني
كتير ربنا يخليهالي

س / منصبك كمراقبه بيحدد عليكى مواضيع معينه زى مثلا مواضيع السجل اعياد الميلاد والتهانى ؟

لا خالص ، افتكر اني بعمل مواضيع التهنئة دي من قبل ما
أبقى مراقبة

س / قسم الشكاوى بعض الاعضاء بتشوف ان فيه اضطهاد
للاعضاء ؟ حل المشكلات بيكون بناء على ايه من قبل المراقبين
والادارة ؟

اللي مقدم شكوى و هو مقتنع أنه مظلوم لو غنيتله هيقول انك
مضطهده ههههههه
دايما بيكونو عايزين اننا نتصرف زي ما هم شايفين و بس
في حين أن اللي عامل الشكوى ممكن يكون هو الغلطان اصلا
بنحاول نتصرف من منطلق الحيادية و اكيد بنراعي ضميرنا
عشان مش نكون ظالمين حد

س / لو فى خلاف بين عضوين وكل واحد مقتنع بانه صح بيكون
القرار بناء على ايه ؟

بناءه على وجهة نظر الطرف الحيادي اللي هو احنا ، مش زي ما
هو شايف هنعمل ، قبل ما نراضي حد لازم نتأكد اننا مش جايين
على حق حد أن شاء الله يعني




س / مازعلتيش انك مبقتيش ادارية فى المنتدى ؟ رغم نجاحك مع دمعه فى تجربة الادارى المنتخب ؟

لا و ليش ازعل اصلا ، انا اه كنت مراقبة قبلهم بس هم من ساعة
ما اتعينو بعد الإداري المنتخب مقصروش ، انا مبسوطة كدة و
كمان هم قايمين بالواجب و زيادة ربنا يحميهم

س / يعنى خلاص طموحك فى المنتدى هو المراقبه بس ومش
عايزة حاجا تانى ؟

ههههه عادى يعنى الاتنين قريبين من بعض ، جت و لا مجتش
حقيقي عادي بالنسبالي

س / اية رئيك فى دمعه وساحر بعد وصولهم لادارة المنتدى ؟ وايه
الى اتغير فى المنتدى بعد وجودهم ؟

هم ما شاء الله في تقدم مستمر ، يمكن مشاركاتهم قلت عن الأول
بس ده بحكم الحاجات التانية اللي عليهم يعملوها

س / مش شايفا ان وجودهم بيدارى على غيابات المراقبين عكس الاول لما كان طارق لوحدة ؟

اها ما انا بقولك قايمين بالواجب و زيادة ،، انت بنفسك آهو
بتقول لما طارق كان لوحده ، هم اكيد بيغطو اكترر

س / انتى اعلنتى انك مع ( رابعه ) وقولتى ان عمك تقريبا توفى
فى فض الاعتصام هو دا سبب تايدك لـ ( رابعه ) ؟

لا مش ف فض الاعتصام ، هو اتوفي قبلها لما حصل ضرب ف
ميدان النهضة و هو كان معتصم هناك ، ربنا يرحمه بقى

ههههه اكيد انا مش هوائية للدرجادي ، هو وفاة عمو اكدتلي
حاجات و الأحداث اللي بعدها باردو بتاكدلي أن وجهة نظري
مظبوطة إلى حد كبير ، إنما هو لو كان اتوفى ف العكس مثلا اكيد
مكنتش هغير وجهة نظري الحالية لأني ببساطة مقتنعة بيها

س / ايه الى مقتنعه بيه ومخليكى مع ( رابعه ) ؟

أن الطرف التاني مفترى و بس

س / ايه رئيك فى احداث الطلاب فى الجامعات حاليا ويرجعو
يقولو الداخليه بتموت فى الطلاب ؟ شايفا ان دا مكان الاحتجاجات
؟

اه و نص الداخلية بتموت ف الطلاب اللي أدى و أصغر مني ،
ربنا يرحمهم و يسكنهم الجنة بقى
و تاني هقولك ايوووة مافهاش حاجة لما نتظاهر ف الكلية ، هو
احنا رايحين نصم خلاص ، لا طبعا ده مكان بيعبر عننا
و عادي جدا لو اتظاهرنا فيه
طب تعرف بقى حتى لو انت مش مقتنع ان الجامعة مكان مناسب ،
هي السبب التافه ده يخليك تتغاضى عن قتل و اعتقال طلاب
بشكل عشوائي و هم ف الحرم ، و امبارح ولد يتقال ف المدرج
و الظابط ميرضاش يخليه يروح يتعالج ف ينزف و يموت !!
و يدخلو على طلاب تانيين ال section و يخدوهم بدون أي وجه
حق ، ليه يعني مش بني آدمين دول !!
و توصل أنهم يهينو الدكاترة و المعيدين و بياخدو الطلاب
منهم غصب
متقنعنيش انك هتطنش ده كله قال ايه عشان مش شايف ان الجامعة
مكان تظاهر هههههه




س / يعنى الداخليه دخلت الجامعه والسكشن واخدت الطلاب
واهانت الدكاترة من غير اى سبب ؟ وبكل بساطه كدا حصل كل
الى بتقوليه دا ؟

المظاهرة كانت برة ،، يدخلو جوة ليه أيا كان السبب ،، اصلا
مافيش سبب يبرر اللي حصل ده

امبارح لما كمان ضربو ف هندسة ، فضلو بيحاوطوهم بالغاز
و محدش عارف يخرج ،، المتظاهرين و غير المتظاهرين
الكلام ده كان ف المحيط ده كله مش هندسة بس
كان في ناس أصحابي راحو كلية سياسة و اقتصاد هيعملو نشاط
هناك ،، بعد ضرب الغاز فضلو يحاولو يخرجو ،، لما خرجو
و وصلو عند مديرية أمن الجيزة العساكر و الظباط اللي هناك
نازلين معاكسة ف الكل ،، و بألفاظ قذرررة
و لما ردو عليهم ، قالولهم اسكتو بدال ما نعتقلكو دلوقتي
!!!!!!
و اللي قدام كلية هندسة على نفس الشاكلة قبل حتى الضرب
و كدة كنا بنحاول اد ما نقدر منعديش من هناك خالص !!
انا معرفش بقى الناس اللي لسة بتدافع بحجج لا تقارن باللي
بيحصل دول ايه يعني أصلهم ايه
هم مش بيضربو و بس ، اللي بيحصل اساسا تخطى أي حاجة
حصلت قبل كدة بجد حسبي الله و نعم الوكيل

س / منين بتتظاهر داخل الجامعه ومنين فى جامعه القاهرة مثلا
والازهر الطلاب بيطلعو على غرف الادارة ويخربوها ؟

عادي يعني ما لما كليتنا عملت مسيرة حرقة مدرعة و لبسوها فينا

س / التظاهر بيكون داخل الجامعه لكن الى بيحصل وبنشوفه
بيكون دائما الداخليه برا الحرم الجامعى والطلاب يا بيخرجو او
بيضربو من داخل الجامعه ؟

لا يا سيدي بقولك دخلو جوووة و مش اول مرة
و بعدين ناس أدى هيعملو ايه يستحق ربع كدة !!

س / شايفا ان الاخوان فعلا قوة حزبيه فى مصر فى ظل الاحداث
الاخيرة وعدم قدرتهم على عمل مليونيه ؟

مش شايفة ان الاخوان دول أي حاجة و محدش عايزهم يمسكو
أي حاجة ف البلد ابداااا
هو بس تقابل مصالح مش اكتر

س / فى نهايه الحوار تحبى تقولى ايه لاعضاء المنتدى ؟

اقولهم ربنا يوفقكو ، و حبو بععععض ههههههههه

س / كمان تحبى تقولى ايه لمعارضين ادارة المنتدى ؟

اقولهم خدو راحتكو بس افتكرو ان احنا بني آدمين

س / شايفا ان الاستضافه مفيدة ليكى انك وضحتى امور فعلا
الاعضاء كانت عايزة تعرفها عنك بما انك مراقبه ؟

اكيد و اللي عايز يسال على حاجة بعد الاستضافة تأمرو




وبكدا بتنتهى حلقه النهاردة

انتظرونى والحلقه القادمه مع

( شخصيه العام )

( الاميرة رودى )