[فتحى عيسى]

فيه ايه كرسي السلطة ده ...
لم بيقعدوا عليه ...
تشوف الواحد فيهم قبل منه ...
تلاقيه هادي راسي موزن ...
وحجتة متئشرة ...
الكلمة بتطلع من بئه في مكانها مسطرة ...
تحسه كده علي بعضه حاجة أبهة ...
عقل ايه ثقافة ايه فكر ايه مقولكش يبني أمة بالعدالة متسورة ...
بس يقعد عليه ...
ضاعت ملامحه بهتت معانيه ...
لاتعرفه لا من فوقه ولا من تحته ...
ركبته العظمة وشقت قلب سماحته ...
والغباوه مسكت في هدومه وف زمارة رقبته ...
كل اللي قاله اتمحي ملوش اثر ...
كل اللي درسه اتهجر ...
كل وعووده أتبخرت ...
وأتحول بقدرة قادر لصنف نادر من البشر ...
متفهمش هو باصص فين ...
أو مع مين راح ومرجعش ...
فاتح بئه ليل ونهار ...
لا بيعمر ولا بيصنع ولا قلقان ولا ساكت ولا همدان ...
طالع واكل نازل واكل زي البغبغان ...
ويوم متقوله فين النور ...
الضلمة كلت وش البابور ...
وجاز الشمعة جاب ورا ...
يقولك البواخر متسمرة في عرض البحر ...
والأصول متأخرة من غير شر ...
طب فين المم يامعلم ...
طابور العيش بينمل ...
والوقفة بقت مسخرة ...
يقولك ايه بالكوبون هنوزعه ...
ولحد البيت هيجيك ...
بس انت شجعه ...
يعني إيه أشجعه ...
أهتف بيه ولا ليه ...
ولا أغنيله ...
ولا أشيله اوزعه ...
كرسي السلطة ده حكاية ...
يا بيدلع صاحبه ...
إلي مالانهاية ...
يا بيوجع أمه ...
ويعلمه من تاني ...
الرباية ...
فتحي عيسي
الرياض
مساء الثلاثاء
17-12-2013