 أرحم نفسك وأرحمنا _ حصري _
برضه لسه مصمم
يدخلنا في متاهات
مش كفاية
الهم سايق دلاله
ونازل عك ليل ونهار
مسابش ركن
مخربوش
ولا فكر
الا وهاجمه
حتي عينه كدبها
وإحساسه لغاه
وكدبته صدقها
ولسه ماشي وراه
ياعالم ياهوه
فين العقل
حتة
إشارة مرور
عملها كعبة
وبيسجد ليها
وبيغنيها
وبيكتب فيها أشعار
ولسه عاوز الكلام ميخلصش
ونفضل نهاتي يمين وشمال
ونتخانق صبح وضهر
وبعد العصر
ويمكن كمان بعد العشا
وقبل ماننام
كده حرام
لا نافع معاه
برشام مسكن
ولا برشام صداع
الفولة بانت
والكل عرف صاحبه
خف بقي
عوم مع التيار مش ضده
خليك معانا جوانا وحوالينا
ده احنا ولاد بلد واحدة
ودمنا واحد وهدفنا واحد
نبني مصر
نعمرها بالامان
مش نهدها
ونملاها فرقة وهوان
ارحم نفسك وارحمنا
ان كنت بتحبها بجد
وبتحب مصريتك
خليها تحبك هيا كمان
وان كنت مصمم
ع الفرقة والخراب
تبقي قابض تمن
كل حرف وكلمة
وبايعها من زمان
فتحي عيسي
|