فـــــــــآكــــر فاكر ايام ابتدائي
ايام زمان
فاكر الفتره المسائي
وشوط الطوب وانت ماشي
واللعب علي جرف المسائي
فاكر حصه ابله حنان
والخوف من الاستاذ عماد
والشخط فينا " بس ياد"
والتهتهه وسط الكلام
فاكر البنت بتاعت
تالته اول (3/1 )
فاكر لبسك المترب
والمبهدل
فاكر اول حد قرب
غششك ف الامتحان
فاكر سنانك المسوسه
فاكر كرهك للمدرسه
وللعَلام
فاكر كلمه "صقفولوا" في الاذاعه
وصوتك الحلو اللي طالع
من السماعه
كل ما بتقري القرءان
فاكر مصروفك اللي ضاع
وسط التراب
فاكر رسمك والشخبطه
فاول صفحه ف الكتاب
واول واجب اتنسي
فاكر كان ايه العقاب
فاكر كلمه نفسي اكبر
وأبقي شاب
طبعا نسيت كل ده
وراح خلاص
اصل البني
كان رخو اصلا
من الاساس
اصل عمرك ما فكرت تكتب
غير بس بالقلم الرصاص
|