الحل هو الجنون ساخر _ حصري _ الحل اني اعمل مجنون
علشان اقدر اسدد كل الديون
بس الحقيقه خايف اطلع فعلا مجنون
دانا عليا ديون
مش بس للبقال ولا للجزار ولا لأم احمد
بياعة الخضار ولا للدروس ولا للفلوس
انا مديون
انا مديون بدين العقول كل حاجة فى عينيه
بتطالبنى بدين مستحق عليا من ايام فرعون
ما هو اصلى انا وانا صغير كنت فرعون
وكنت حكاية ولحد النهاردة محيرة العالم
وفجاءة صحيت مالنوم مذهول
لأنى قبل منام شفت حلم انما ايه
اللهم اجعله خير قال ايه الشوارع فاضيه وواسعه
ونضيفه والشجر عالصفين وريحة الجو
ترد الروح والعالم ماشيه بنظام
لأ وايه العربيات مسطرتين واغرب حاجه
مشفتش ولا سياره قديمه ولا حتى دخان
يادى المصيبه احنا جرالنا ايه فين الخنقه
وفين المقطورتين
فين الونس الطافح
احنا كنا فين اه فى الدين اللى خايف اسدده
والطم بعدين
ما هو مش كل اللى شايفينه ده معقول
ولا كل اللى مطنشينه ده يدخل فى عقول
احنا بنتباع بالحبه زى الفول
وبنتكسى باللقمه كل الفصول
هنا بس الجنان بينفع
والسكوت بيوجع
وبتكتر الديون فتحى عيسى
|