[Şα3Đ..♥]

السلام عليكم
دي المجموعه السابعه
من الرباعيات اللي ديما بكتبها
ودول الاجزاء اللي فاتت


ربـــاعيــــآت ,,, بقلمـــي 1




رباعيات بقلمي _2




رباعيات بقلمي _3




رباعيات بقلمي _4




ربـــاعيــــآت ,,, بقلمـــي (5)




ربـــاعيــــآت ,,, بقلمـــي (6)






اتعلم تبقي كتوم
ولا تحكي لحد هموم
وان تعبك سرك يوم
فضفض واحكيه ليك

علشان مش كل الناس
بتحس بكل الناس
فـ هتتعب وهتحتاس
والجرح يعذب فيك



-------------



اقتل بالضحكه الهموم
وانهي علي كل الزعل
واوعاك تضعف ف يوم
لو شيء مش عاجبك حصل
قاومه وواجهه وقوم
دعم طاقتك بالامل



-----------



اقتليني الف مره
لازم اموت جوه ترابك
مهما تطرديني بره
مش هسيب انا برضو بابك
اقتليني بعيشه مره
او اقتليني بايد ولادك




----------



البنت اكتر مخلوق رقيق
اوعي تيجي ف يوم عليها
ولو فيوم حست بضيق
حاول علي طول تحتويها




----------



الدنيا بتمطر يا ولاد
والجو جميل وابن لذينه
ارموا اللي ف ايدكم يا ولاد
وتعالووا هنلعب ف الطينه




-----------



الشباك بيتقفل
والنور خلاص بيقل
والكل هيتسحل
علشان ايماننا قل
الليل سواده نزل
والقمر مش هيهل
هيهل ليه القمر
علي ناس كما الذئاب
ماحنا مبقيناش بشر
وبتكتر الاسباب




-----------




الشمس حاميه ع البشر
والارض سخنه مولعه
والليل مبقاش فيه قمر
ومبقاش في حاجه مشجعه
كل الحقايق دي بقت صور
والخلق بقت حاجه مخدعه




----------




العيبه مش ف البلد
ولا لون تراب الارض
العيبه ف اللي اتوجد
قسم صفوفنا وهد
العيبه ف اللي طرد
ارواح ولون الورد
غني الكبير والولد
بنحبها للابد
ردت علينا البلد
الاول حبوا بعض




-----------





الليل مجاش ليه ف السما
والنهار ملهوش عنين
والليالي ليه عندنا
مبقاش فيها طعم الحنين
ليه كل حاجه اتغيرت
لما انتوا قررتوا البعاد
وازاي نقسي قلبنا
وازاي هنقدر ع العناد
حنوا علينا ربما
نحتاجلكم كمان يومين
اصل احنا
مش عايشين انما
بقينا شبه ميتين




-----------




انا خايف اتوجع و اقول الـ آآآهـ
الـ آهـ تتوجع من غلبي
وتسيب الاه جرحي وتنساه
الجرح يموت جوه ف قلبي
حتي الوجع قلبه اتوجع
من كتر اللي شافه بسببي
عيني علي قلبي كان جدع
دلوقتي مش قادر يحبي




----------



انا قلبي بعدك بقي عاجز
والبعد بيبني ف حواجز
وانا عايش من غيرك جايز
بس انا من جوايا بموت




-----------



انا قلبي بيعزف مزيكا
يوميا علشان ميملش
وبيمحي الحزن باستيكه
و بينسي الهم وبيطنش
اه يا قلبي يا حته انتيكا
مكسوره وباقيها ما تلمش
لساك متداري ورا الحيطه
اطلع واضحكلها هتفرفش




-----------



انا نفسي اقعد مع نفسي
واقولها كل اللي ف نفسي
واحكيلها علي كل ما فيا
بس ياريت هي متزعلشي
وتسيبني لوحدي ف لياليا
ف عزابي و مشاكلي وتمشي




-------------



اه يا امي يا اجمل تاج
فوق راسي لازم يتشال
انا بس يا امي محتاج
ترضي عني ف كل الاحوال



-------------



إوعي تفكر يوم تتكلم
وتقولهم انك زعلان
اكتم واستحمل واتألم
واوعي زعلك يوم يبان