[Eng Mohamed]

السلام عليكم كان ياما كان يا سعد يا اكرام ومايحلى الكلام الا بذكر النبى عليه افضل الصله والسلام كان فى طاوس جميل ريشه كله الوان كل الناس بتحب تشوفه وتتفرج عليه كان الطاوس ديما بيتفاخر بريشه الحلو قدامباقى الطيور والحيوانات واى حد يكلمة كان بيتكلم بسخريه وتكبر لانه حاسس نفسه احلى الكائنات وفى يوم من الايام كانت الحمامه سمسمه بتتمشى فى الحديقه ووقعت فى حفرة كبيرة فيها مايه وفضلت تنادى على الطيور وماحدش سامعها وكان الطاوس وقتها ماشى جنب الحفرة قعدت الحمامه تنادى عليه يا طوس ياملك الطيور تعالى وانقذنى لكن الطاوس رفض وقال للحمامه : ريشى جميل ومش هقدر انزل فى الميه علشان احافظ عليه فضلت الحمامه تنادى تنادى وسابها الطاوس ومشى فى كل غرور جت باقى الطيور وانقذت الحمامه وحكت لهم الحمامه على موقف الطاوس وافعاله زعلت كل الطيور من الطاوس وقرروا انهم يبعدوا عنه وعن غروره وفى يوم من الايام اللى كان فيها الطاوس بيشرب من البحيرة وقع وكان بيغرق ومش لاقى حد ينقذه فضل ينادى على الطيور وماحدش بيسمعه كلهم بعدوا عنه فضل الطاوس يدعى ربنا انه ينجيه ولما جت الطيور وانقذته اتأسف ليهم وللحمامه انه كان مغرور ومش بيحب يساعد حد واتعلم الطاوس درس انه مش الشكل هو اللى بيحكم على الافعال لكن حب الاخرين والتعاون هو اللى الاهم وتوته توته خلصت الحدوته قصه بسيطه من خيالى المتواضع