 لــــــو
 \
رفقا بانفسنا
دايما اى حاجه فى حياة اى شخص صعب تكتمل
يعنى فى عز فرحتك بيجى الى يزعلك ويعكنن عليك
فى عز زعلك بيجى الى يفرحك ويطبطب عليك
فى وسط ما الحياه سهله بتيجى الصعاب ووسط ما الحياه صعبه بيتفتح باب نور
دايما كلمة لو بتقلل من كل شئ حلو بالحياه حواليك
لو كنت دكتور طب لو كنت مهندس طب لو كنت روحت بدرى لو كنت بنت او لو كنت ولد
طب بس يعنى لو كنت جبت درجتين اعلى لو كنت ذاكرت من الاول
عدم الاقتناع بالنصيب والقضاء والقدر بيقلل جزء كبيير من شعور الانسان بالحدث وكمان بيسبب له قلق
يعنى مثلا انا من يوم التلات الساعه 11 وانا راحه جايه اقول انا هشتال مادتين
النتيجه ظهرت جبت 87 اتبسطت جداا مكنتش مصدقه اصلا
شويه وبعد مرور يوم فرحتى نقصت وبدأت دوامة ( لــو ) طب لو كنت زدت درجه فى التاريخ ولا نص فى الجغرافيا ياااه كان زمانى مش عارفه اييه
اول يوم ناس اتصلت تهنى اتبسطت انها فكرانى اصلا وقلقانه عليا حابه انها تعرف انا عملت ايه
الفيس اول ما اتفتح 6 رسايل وتانى يوم 6 رسايل بس المنتدى محدش سأل
الله استنوا وكمان بنت خالة عمة ابويا من ناحية جده التالت بردك ماتصلتش ولا جات
يااه هو انا مش مهمه عند الناس
يعنى مش مهم يسألوا عليا ولا يفرحوا بيا
هو انا اصلا مجموعى دا يفرح ولا ليه افرح بيه اصلا
دايما حاجه جواك هتنقص فرحتك طبيعه انسانيه طبيعه مصريه او طبيعه شخصيه فيا معرفش
الموهيم حاول دايما تتغلب على مشكلة لــو وكمان عدم احساسك بالحدث
مجرد فضفضه
زورى ع العك الى فوق دا بس كنت عطشانه وماشوفتش الوقت والفجر اذن
استحملونى يووم
|