[احساسى صحيح]

تانى موضوع ليا هنا بالقسم
وحبيت يكون فيه مشاركه نسائيه واسعه
لأنه مهم جدا لمعظم الشباب
وانا حبيت يكون على اسم برنامج الستات ميعرفوش يكذبوا
بس فى الحكايه دى اتضح ان البنات طلعوا مصيبه

نبدأ الحكايه :
من فتره قريبه ذهبت لأحدى محلات الملابس
علشان اشترى كام طقم كده على الماشى
اول دخولى المحل لاحظت فتاه فائقة الجمال
شدتنى جدا بجمالها وكمان لما قربت منها
لاحظت رقتها واسلوبها الجاذب وهى بتتكلم مع اختها الصغيره
بصراحه مقدرتش انى امنع نفسى انى اتابع ملامحها
واسلوبها وطريقتها فى الكلام
طبعا انا نازل اقلب فى الملابس وعيونى ليست فى راسى
ولكن فى مكان آخر تنظر عليها طبعاََ
حاولت انى انظر لعيونها لم اراها نظرت لى ولا مره
وعندما كنت قريب منها وانا اتجول بالمحل
سمعتها بتتكلم مع اختها الصغيره وبتقولها
بلاش البنطلون ده احمد مش هيدخلنا البيت لو شافه
ولو داخلنا بيه البيت احتمال كمان يطردنا
وهما الاتنين بيتهامسوا ويضحكوا
انا سمعت كلمة احمد طبعا انصدمت
فقولت لنفسى اكيد ده خطيبها
وبتشترى له هديه ولا شىء
الموهيم هى اشترت وخلصت ومشيت
وانا محلك سر ومذبهل
بعد ما ذهبت سألت صاحب المحل عنها لأنه يعرفنى كويس
وطبعا عرفته انى معجب وكده وعايز اعرف معلومات عنها وكده
علشان اعرف إذا كنت اقدر اتقدم واتكلم واشوف ولا لأ
الموهيم طلع احمد ده اخوها وكانت بتشترى له هديه لعيد ميلاده
طبع فرحت وعن طريق ابن عمها اخدنا الفون وكل المعلومات
وطبعا كلمت اختى الاول انها تروح وتتكلم وكده وتشوف الظروف


وانا فى انتظار اختى بكل الشغف طبعاََ
اتت وطبعا قابلتها على طول .. ها ايه الاخبار
ردت وقالت : اتنيل خيبتنا الله يخيبك
قولتلها الله يبشرك بالخير اختاااااه

طبعا انا انصدمت وقولتلها هاتى م الاخر بقا كده لأنى خلاص
الموهم عرفت منها إنها بعد ما اتكلمت مع والدتها
اتكلمت مع البنت فتره لوحدهم
وطلع ان البنت كانت غير عاديه
وإتضح إنها فصصتنى حته حته
وشبر شبر وإنها إتكلمت مع اختى بجراءه تحسد عليها
وقالت عنى كل حاجه
منها إنى هو فى شاب دلوقت يمشى من غير ساعه فى ايده
وانا فعلا اليوم ده كنت نسيت الساعه وكسلت ارجع اجيبها
ولم تنكر انى شيك والكلام ده بس وقفتى فيها غرور
وريحة البرفان كانت تجنن بس مسمعه زياده
والبنت سألتها انا عندى عربيه ولا لأ
وحاجات لم اتخيل ان فى الوقت البسيط ده
ان اى حد يقدر يطلع كل الملاحظات دى
رغم انى لاحظت انها لم تنظر باتجاهى او هكذا كان يبدوا المشهد
الصراحه انا بعد كل الكلام ده خوفت منها واتعقدت
بسبب إنها طلعت خبيثه جدا وكمان إزاى قدرت تعرف كل ده عنى
وأل انا إللى فصصتها أل
وعرفت بعدها اختى قالت عليا خيبه ليه
الموهيم انا بعد التجربه دى
بقا عندى حاله نفسيه قبل ما انزل الشارع
لازم افتش على كل حاجه
وبقيت ألبس الساعه قبل ما ألبس هدومى


بلاش اكملكم الحكايه
كفايه لغاية كده
وتعالوا بقا يا بنانيت نتناقش

هل فعلا فى بنات كده ناوو ؟

هو ممكن يكون البنات كلها كده دى تبقى مصيبه ؟

ايه اكتر حاجه ممكن تشدكم فى الشاب دون سابق معرفه ؟

الاشياء السطحيه الاهم ام الجوهر والشخصيه

ومش عايز كلام دبلوماسى

علشان اقدر اعرف الجيل ده بيفكر ازاى

يلا منتظركم