[دمعه حائره]

أهلا وسهلا بأعضاء منتدانا الغالى وحلقة جديدة مع اجدد عضو عاوزة اقول فى البدايه ان صحيح اسمه اللى لفت نظرى ابعتله استضافه لكن اكتشفت انه شخصيه تستحق المتابعه والاهتمام بمشاركاته لانه بيمتلك فلسفه خاصه واسلوب شيق فى الكتابه اتمنى تتابعو الحوار للاخر معانا اجدد عضو واغرب اسم منافق جدا عضو جديد اهلا وسهلا بيك نورت المنتدى والبرنامج فى البدايه نحب نتعرف عليك اسمك؟ محمود سنك؟ 28 ونص بلدك ومحل الاقامة؟ المنصورة مدينة السنبلاوين المهنه؟ مدرس تاريخ واقف عن التدريس وحاليا شغال في السعودية عمل موقت الحاله الاجتماعية؟ خاطب عندك اخوات قد ايه؟ 6 اخوات غيري ربنا يحفظهم ليا وميحرمنيش منهم ومن ولادهم آمين يارب يخليكو لبعض شوفت فى بروفايلك الحكمه المفضله رحم الله امرىء عرف قدر نفسه هل دى اخدتها عن تجربة ولا الاحتياط واجب؟ فعلا رحم الله امرئ عرف قدر نفسه تجربة كبير ومهمة لكل انسان اوعا تفكر انك تقدر علي كل حاجة في الاول والاخر انت انسان بشر قدرتك محدودة فمتتعالش علي الناس ده شق الشق التاني رحم الله امرئ عرف قدر نفسه اوعا تقلل من نفسك او تسمح للناس تكسرك بحكمها عليك انت عارف نفسك كويس وتجارب الحياة اللي انت مريت بيها كفيلة تعرفك قيمة نفسك فمتتعالاش ولا تقللش من نفسك خليك انسان طبيعي والناس لوحدها هتقدرك واللي مش هيقدرك مش هتخسر بالعكس هتكسب نفسك علي الاقل بحييك على تفسير الحكمة عجبنى جدا وصعب اوى الفصل بين التعالى وتحديد قيمة نفسك عرفت المنتدى ازاى؟ بصراحة انا معجب بقلم أنسانة هنا في المنتدي اسلوبها في الكتابة بيعجبني بتعالج مشاكل وقضايا مهمة لكل شاب وفتاة يمكن سر نجاحها انها كمان شابة وكانت بتتكلم عن قضايا بتشغلها وبصراحة انا عرفت عن طريقها لما شوفت مشاركتها في المنتدي فقررت اشترك وأتأمل المكان  سجلت على طول ولااخدت وقت؟ اخدت وقت في الاول فضلت اقرأ وسجلت وعجبني جدا اسلوب المنتدي بصراحة تحفة اول مرة اشوف حاجات هنا مشوفتهاش في أي منتدي تاني وقد سجلت في بعض المنتديات ولكن بصراحة هنا في تميز في السرعة للمنتدي سرعة التصفح اقصد واللايك فكرته جميلة وبتحسسك كأنك في موقع تواصل اجتماعي زي الفيس وحاجات تانية كتير عجبتني ليه اخترت النيم بتاعك ومش شايف انه غريب شويه؟ أخترت النيم امممم ما بلاش السؤال ده اصل اجابتي ممكن تزعل ناس النفاق موجود في كل مكان لكني بحس ان المنتديات والنت عموما باب واسع جدا بيعرفك علي منافقين كتير في نفاق الكلمات ونفاق الوصف ونفاق التعبير ونفاق الصفات فمثلا تتعرفي علي واحد وتكتشفي في النهاية لو شوفته في الواقع انه جرافيكس وانه غير ما هو بيحاول يظهر نفسه في المنتديات خصوصا او النت بشكل عام فقررت اكون منافق جدا عشان تكون رسالة لكل واحد هيثق فيا ان يعرف ان الواقع غير وان الرومانسية الحالمة والردود البراقة اللي بنكتبها مابنتعملش بيها في الواقع وما بنقولهاش محدش بيقول في الحقيقة دمتم بود انت من المبدعين تحياتي لطيب قلم وروعتك وذكائك وهكذا وهكذا من الردود البراقة اللي بعتبرها نفاق اجتماعي او مجاملة زائدة وانا مش بستثني نفسي لذلك كتبت منافق جدا وعشان محدش يحاول يقرب مني لاسباب خاصة ايه اكتر قسم لفت نظرك وبتكتب فيه بصراحة قسم صفحات مكشوفة لانه بيديك انطابع عن نفسك والحقيقي انا ماتبعتش غير صفحة واحدة بس وقرأت فيها كتير بقيت الصفحات مدخلتهاش بس وعد هحاول اتباعهم واستكشف المنتدي اكتر ايه هواياتك؟ امممم اعفيني من السؤال ده معلش طيب هو واضح انك بتحب القراءة والكتابه بشكل عام اسم مدونتك بيدل على ايه؟ عالم ثلاثي الابعاد كنت عاوز اعمل حاجة لنفسي اولا وللاعضاء يخرجوا فيها من الواقع لعالم ثلاثي الابعاد عالم خالي من الفروض والعادات والتقاليد يكون خارج عن النص وبيعبر عن حالة خاصة جديدة بس ده لا يتنافى مع عادات وتقاليد وفروض الدين يعني مش هيكون في انتهاك فكري او عقائدي داخل الصفحة لا لا هو خارج فكر العادات والتقاليد اللي قابلة للتعديل والتغير وشوية مشاعر بعبر عنها بطرقتي والحمد لله بحب اشكر كل الناس اللي بتشجعني وبتبعتلي رسايل وتقيم جميل ولحظت انهم بدأوا يفهموا الصفحة ويحبوها انا شوفت جزء من مشاركاتك وموضوع ليك ولاحظت حجم التفاؤل والتسامح فى شخصيتك ايه ساعدك على مواجة الحياة بالشكل ده؟ في حاجات كتير بس باختصار لو انا مش هسامح الناس طيب لية ربنا يسمحني ؟؟ كمان ليك محاولات لكتابه الشعر هل هاتكمل فى الاتجاه ولامجرد محاوله؟ معلش مش هقدر اجاوب علي السؤال ده انا مش شاعر هههههه بتحب تشارك فى المسابقات؟ علي حسب نوع المسابقة لو معلومات ثقافية ودينية وتاريخية بحب ولو مسابقة خواطر او شعر او قصص قصيرة او طويلة بحب جدا هل قابلك مشكلة فى المنتدى او مع اى ادارى او مشرف؟ بالعكس كل احترام وتقدير وبشكرهم جدا وبجد يوم ما كتبت موضوع في الشكاوى استفسر عن مشكلة الاخ العزيز رد عليا مفيش بعدها يمكن بنص ساعة فتحياتي ليهم وربنا يوفقهم ايه رايك فى تعامل الاداره والمشرفين مع الاعضاء بصراحة ما اتعملتش مع حد بشكل مباشر ولكن من ردودهم ومشاركتهم يبدو لي انهم ودودين وبيسعدوا الاعضاء لقيت تفاعل كويس وترحيب من الاعضاء فى مواضيعك؟ الحمد لله لحد ما راضي عن الأداء كونت صداقات ولالسه؟ لا والله لسة بس عشان اكون صريح انا مبحبش صداقات النت مش معترف بيها يمكن عشان انا اتخليت عن صداقات الواقع وانعزلت بنفسي فأكيد مش هاخد صاحب من النت والا كان من باب اولى اهتم بصحبي ولاد بلدي واللي متربين معايا اسف لو الحقيقة بتدايق شايف ان فيه اقسام زيادة مش مطلوبه فى المنتدى؟ بصراحة مقدرش احدد ولكن يبدو الوضع تمام ومستقر وان شاء الله لو في اعضاء غايبين عشان الامتحان يرجعوا يارب ان شاء الله هاتشوف وقتها المنتدى بشكله الجميل اللى متعودين عليه لقيت صعوبه فى التعامل مع خواص المنتدى؟ في الاول ههههههه الصندوق الماسي الخامس مكنش بيعمل الاكواد مباشرة كان بيطلع عيني بس حاليا انا وهو بقينا صحاب وتقبلته وتقبلني وماشي الحال ايه اقتراحك لتطوير المنتدى اكتر؟ اقتراح واحد الرومانسية بين أي طقم اشراف وادارة وبين أي اعضاء بتخرب أي مكان بتولد مشاكل وبتدي سمعة وحشة والاعضاء مش بيكملوا في المكان لذلك لو عاوزين المنتدي يتطور ومنخسرش عضو او اعضاء نوقف الرومانسية او أي علاقة ممكن تأثر علي خسارة عضو ويكون العلاقات ما بينا وبين بعض لا تتعدى كونها علاقة زمالة في منتدي لان الحاجات الادارة مينفعش يدخلها عاطفة وان دخلها العاطفة فشلت ودمرت المكان ده بصراحة حاجة انا مشوفتهاش هنا بس شوفتها في منتديات تانية وخلت الناس تمشي وتهجرهم نظر لبعض المشاكل اللي حصلت بسبب الرومانسية الحالمة اللي الناس عاشوا فيها وكانت النتيجة ان الكل اتفرق لان العلاقات دي بتكون اخرها الفشل فشل في كل شيء هل مسجل فى منتدى تانى؟ حاليا لاء مش بدخل منتديات تانية بس مسجل في منتديات كتييير جدا بعضهم كنت بسجل عشان احمل فيلم وكانوا بيضحكوا علينا اسجل واكتشف ان الروابط مش شغالة ولكن المنتديات اللي شاركت فيها لا تعد علي صوابع الايد الواحدة وطبعا مش هقول اسماء ممكن تقولنا ميزة موجوده فى منتدى بنات مصر؟ اللايك للمشاركات والمواضيع كان جديد بالنسبة ليا بعض الاعضاء المحترمين جدا السرعة في التصفح الجودة في المواضيع والحصريات الكتير للاعضاء انا بعتبره منتدي ادبي اكتر منه حاجة تانية ناوى تستمر معانا فى المنتدى ؟ لاء حقيقي مش هستمر ولما همشي هيكون ليا موضوع اوضح اسباب رحيلي وهعرفكم اكتر عن نفسي وقتها يمكن اتشجع واقول اسمي الثلاثي وقتها وبعض الحاجات اللي مقدرتش اقولها هنا ان شاء الله هاتغير رايك وتستمر معانا ولحد مايجى وقتها حاول تستغل كل الفتره دى فى الكتابه اكتر ايه اللى يخلى العضو يكمل فى منتدى ومايفكرش يسيبه؟ انه يحب المكان ميحبش الاشخاص وانه ميدخلش في علاقة مع حد لانه لو العلاقة دي باظت بيسيب المكان علطول بشكرك على قبول الدعوة واتمنالك كل التوفيق العفو وشكرا ليكي وسعدت باسئلة حضرتك واتمنى اكون ضيف خفيف عليكم تحياتي وبكده تنتهى حلقتنا مع استاذ محمود بشكركم على المتابعه وفى انتظار الردود والترحيب بيه الى اللقاء فى حلقة جديدة ان شاء الله