[عماد الدين زنكي]

بنام واحلم بسيخ محمي
وفيرس سي اكل لحمي
انا ف عرضك سعادة البيه
انا ف طولك سعادة البيه
خلي اللحمة من عندك
وسوي الكفته علي فحمي
د انا هفتان وداب شحمي
.
بيان القمة يا اخواتي
كما الاتي...
ندين نشجب ونستنكر
وعم عطية بينادي
في سوق مالطة
ولا المالطي فهم حاجة
ولا مأيد ولا بينكر
وعم عطية بكرر نداءاته
وبيقرر...
سوق عربية مشتركة
عايز تصفيق...
عاوز اكشن...
عاوز حركة...
وعايز شيخ فوق التسعين
يكون بركة
يفكرنا بقراراته
و انا حديله من عندي صباع كفته
تقلب فيه مراراته ومراته
من عشرميت سنه
وانا بسمع عم عطية بينادي
سوق عربية مشتركة
وجيش واحد لامتنا
نحرر القدس المحتلة وننصرها
ويبقي ازاي .....؟
وانا بنفسي محاصرها
كلام ف كلام
كلام كفته
.
وبعد القمة متعدي
صباحية مباركة يا عروسة
يا امتنا..
وبعد م كانت الاحضان بتجمعنا
وبعد يا خلق م سمعنا ودمعنا
وقلنا خلاص باي باي لغمتنا
وقلنا نلم همتنا...
ونبني بيت ل لمتنا
سمعنا شتايم الفجار علي الشاشة
وحرباية و نباشة
وديابة تجر القلب م الحاشة
مسعورة وهباشة
صباحية مباركة يا عروسة
يا امتنا...
د داء الغل في قلوبنا
خرب بتنا
وشتتنا
وايه الحل يا حبيبتي؟
صباع كفته
صحيييييييييييح..
صباع كفته