عن ذكريات من عمر فات
عن قلب حلمه منو مات
يصرخ وجع من صوت سكات
عن دمعه نزله ع الخدود
عن حزن بحر مالوش حدود
عنى أنا !!
احلام كتير وامل لسه بيعافر
وياقلبى اصبر يقول خلاص مش قادر
وروحى تجيب وتودى وبتسافر
مابين ظلام وسراب أمل مالوش وجود
عن يوم وجع مر بعيونى
عن ضلمه نامت فى الجفون
عن صوت أمل لسه بينادى
وصداه يقولى لسالى وجود
وروحت ادور على مكانى
مكانى مابين سهام الخوف
مكانى اتاخد منو نصيبى
ومن يومى ونصيبى مظلوم
ايام الحزن زى الدهر
والفرح منو كان محروم
عن عمر طيب ف لحظه راح
عن سكه طويله نهايتها جراح
عن ناس حبتها من قلبى فاتونى
ولما فاتونى مسابوش فيا غير البراح
وعن نسمه هوى بليل كئيب
وعن نجم تايه زى الغريب
أنا زى نجم سما لما انطفى نوره
مع أنه ديما كان بعيد عليا
كنت بشوفه ديماً فى عز غروره
وغروره كان أمل معكوس بعنيا
ويانجم يلى انطفى نورك على غير آوان
كنت بقول بينى وبينك بعد الارض والسما
ولكن دلوقت أتوحدت المسافات
لما انطفى نورك وبقيت زيى أنا
مابين سجون الضلمه والخوف والالم
والحزن ساكن بالضلوع ابداً ما غاب
عن ذكريات من عمر فات
عن قلب حلمه منو مات
يصرخ وجع من صوت سكات
عن دمعه نزله ع الخدود
عن حزن بحر مالوش حدود
عنى أنا !!