[شاعر الحب الحزين]

ساعات حاجات بمجرد ما افكر فيها قدامي بلاقيها

وحاجات قد ما بفكر فيها ولا بلاقيلها أثر

دنيا بالعكس ماشية معانا نحب نهارها وتعشقنا لياليها

حتى النوم مجافينا ومصاحب عنينا السهر

بنتعب ونغلب وغيرنا يكسب بنرسم أمنيات والواقع بيمحيها

متفرقين متغربين ولا جمعنا سوا غير الصور

بياخدنا الحنين لأجمل سنين وفي قلوبنا ذكرى الوجع بيحميها

ناس تجيبنا وناس تسيبنا وناس ورونا العبر

في دنيا العجايب ياما قابلنا حبايب وفرقتنا الظروف بكل ما فيها

اللي عاب واللي شاب واللي غاب عن دنيا البشر

ياما ناس علينا بتعلم ولا بنتعلم قد ما نتألم وبنفضل مسلمين ليها

وياما ناس خايفين علينا حرمناهم الأمان عيشناهم ف خطر

نغلط ونتجنى ونتمنى الجنة وع حقنا ما نستنى مصالحنا بنجري عليها

حق الناس بجزم ينداس مفيش إحساس والظلم بقى زي المطر

الغلابة اعتبرناهم ديابة والدنيا خليناها غابة والست فقيرة حاميها حراميها

الوفي بيختفي شموع الحب بتنطفي برأينا بنكتفي منصدقش خبر

طبيعي نغلط مفيش حد معصوم بس لازم نخاف من المظلوم دعوة علينا يدعيها

اغلط ف حق نفسك متحملش غيرك يأسك اصبر ويا بخت من صبر

هتشوف عجايب هتشوف مصايب كله مكتوب ومتقدر السعادة منقدرش نشتريها

مهما تشوف مجرد ظروف اعمل معروف دي حكمة ربنا ارضى بحكم القدر



شـــــــــــــــــــــــــــــــــــ . حــــــــــــــــــــــــــــــــــــــــ