[اشاعة شمس]

في قلب الغربة - وانت قاعد
بالفنلة الحمالات ( متضحكشي )
هتفتكر 3 حاجات
كل حاجة ليها خانة في قلب الذكريات
بس فيه شرط واحد - هو انك - يبقى قلبك قلب مات - مش مجرد تفتكر حبة مشاعر عشتها في وقت فات -

يلا نبدأ بالفنلة الحمالات

البداية بيكي انتي بين قوسين ( اقصد انتي )
حقيقي
كان نفسي تسئليني سؤال : أنت رأيك فيا اية ؟؟
رأي فيكي : أنتي فعلا حد باعني- بس برده مش اناني
حد سهل كان عليكي اي حد يكون مكاني
والقضية سهلة جدا شهر خمس بس يجي واحب تاني

ضحكتني :
ضحكتني بجد عليك - عاوزة تشوفي حياتي بجد . خدي عيني مكان عينيكي -
يمكن ساعتها تفهمي - او تعرفي انا حالي اية - بس مش دي القضية
انتي فاكرة ان يوم هندم عليكي ؟؟
لا خسارة كنت فاكرك يا حبيبتي اذكى من كده
اجري بسرعة دوري جوا قلوب الناس - عيشي قصة حب جديدة كده وخلاص
سهل عليكي تحبي كل شهر خمسة مرة
بس صعب تلاقي قلب حبك ألف مرة !!
كنت بعاني فحبك ايوة كنت بعاني
نفسي مرة تحطي نفسك لحظة مكاني
كنت في عز ضعفي وانتي مش فاضية ليا
كنت عاوز احس انك لامسة ايديا
اكتشفت بعد فترة اني ضحية
ان كنت لعبة بس خلاص راحت عليا
الاهانة خدتها منك سِكت
قولت يمكن تحس بيا بس فوقت
عرفت اني كنت ضايع في الحياة
وكان نصيبي ان حبك بس توبت

نرجع تاني لنفس سؤالنا من نفس الفترة اللي فيها اتقبلنا
فكرة دموعك لما لموكي في يوم علي حبك ليا
لما تعبت عشان مقدرتش امسح بس دموعك
لما هربت بعيد عنك وانتي كنت بتجري عليا - فاكرة كلامك ؟؟
حبك كان سهل عليا اني انساه
بس قوليلي بجد انتي كده مبسوطة ؟؟
كده مرتاحة وعايشة حياتك مش مكبوتة ؟؟
عايش الحرية اللي منعتك يوم منها ؟؟
الا قوليلي - القهوة بتاعتك _ لسة بتصحي وتسئلها عنها
فاكرة كلامنا ؟؟ كنت قطعت وعد علي نفسي ان ما اشرب الا بس من مكان شفايفك
عارف ان القهوة بتاعتك نقطة ضعفك
اكبر غلطة اني بجد يوم صدقتك
بس هقولك :
في خانة الذكريات - هتلاقي اسمي هناك - هتلاقي حد حبك - وساب من سوكات - مجرحشي فيكي - ماقلش كلمة عليكي - ولسة للنهاردة بيفتكرك ساعات -
بيهرب من مشاعره - بيدري جوا قلبه - حاجات كانت في باله - بس طلعت حاجاااات - في خانة الذكريات - بيقولها بأعلى صوت - جرحك عدى وفات -

ونرجع تاني لنفس السؤال
رأيك فيا اية :
رأيكي فيكي انت واحدة - نظرة واحدة من عينيكي - تخلي قلب ألف شاب يموت فيكي - انتي واحدة حلوة جدا - في المظاهر والكلام - بس شكلك ناسية حاجة - متزعليش - جوا منك مش تمام

ونرجع نقول القدر ضحك علينا - كتب عليا اني اعيش لحظة معاك - كنت فاكر اني غارق في هواك - اكتشفت بعد فترة - ان انتي اصلا مش ملاك

سهل نقول الحقيقة بس عارفة اية بجد اصعب من الحقيقة - انك انت تقتل القلب اللي حبك بصمتك وبرضاك
وانت بتراجعي بجد ذكراياتك هتلاقي خانة فيها اسمي امسحيها من سوكات
اللي كان ليكي عندي من النهاردة بجد مات
والنهاردة ليكي وردة بهديهالك من الجراح والاهآت
أقبليها ودمي ايدي امسحيه
شمي فيها طعم دمي هتعرفيه
والدموع اللي عليها مش ندى نازل عليها
دي جراحك اللي سبتيها في قلبي
بس ليا طلب اخير
لو ليكي قلب _ أقبليها ؟؟



**

تاني حاجة بالفنلة الحمالات - لما بتحس الاهات - وانت سايب أرض وطنك - جاي تجمع في ريالات - جاي ترجع ذكريات -
كان بودك - تبقى قاعد جوا بلدك - تاكل الفول الحراتي - تشرب الشاي المعكر - اللي فيه رمل مسكر - تهرب من كل الحاجات - اللي فيها قلق وخوف - من كفيلك مالظروف - من كلام خد وهات - من رصيدك دلوقتي كام - من صرافة الراجحي اللي يوماتي تعدي عليها - من تفكيرك كل يوم هتعشى اية - من اهات جواها آهـــات - من حقيقة مرة انك تابع كفيلك - من رسالة فيها زاد رصيدك - من كلام الناس عليك وانت عايش في العذاب - هاتوا قلبك يكون مكاني وهو يكتب 100 كتاب - يطبع الف طبعة - كلهم عن العذاب - اللي بتشوفه هناك - بالفنلة الحمالات - وانت بتعيد ذكريات -
والرسالة الاخيرة وانت بتودع حبيبك اقصد امي ايوة امي وهي واقفة شايلة همي هناك وانت بتدخل صالة المطار - بتقولك شد حيلك - كلمني اول ما توصل هناك
والفرق بين ارض وطنك هما هنا وانت هناك ؟! شايل معاك احلام شبابك
******

والحاجة الاخيرة جوايا نفسي اصرخ واقول _ اني تعبت
بجد تعبت
تعبت من كل حاجة في الحياة
من حياتي ومن اهاتي ومن جروحي وحتي روحي تعبت منها
من مشاعر كتبتها للعاشقين
من رواية سطرتها في سنين
من حروف جمعتها وكتبت بيها كلام حزين
من فراق من ناس فرضتهم الدنيا عليا
من مشاعر صدقتها وطلعت في الاخر ضحية
من كلام كدابين
من وعود من ناس متقدرش تنفذ
من حب وهم او قول حب شتوي
من حياة عمالة تغوي وتقول هتفرج
ولسة برده العمر بجري لسة بقسى
من نفوس حولت بكل قوة ارضيها وهي لسة

في النهاية لما تبقى قاعد في غربة بالفنلة الحمالات - ابقى اكتب اي حاجة - حتى لو 3 حاجات - ذكريات
بقلم : اشاعة شمس