حاجة فوق المستحيل النهاردة الركب ساير......والضماير
حاجة فوق المستحيل
كل فم ملجمينه.......مكممينه
اصل لحن الخوف طويل
كل معدول انقلب
كل نصر بيتغلب
كل دم بينسكب ...في الارض نيل
ولا ايه قولك يا نيل
.
اضحكي يا ام العيال
كل حاجة في مصر عال
كل حاجة في مصر زين
ما في شين
بس احنا اللي معقدين
خسارة فينا الاعتقال
احنا مش حاسين بنعمة لاعتقال
لما نقعد في الامان
نصلي ونحفظ القرآن
والاكل صحي وبلاش
عاش مدير السجن عاش
.
انا بكره السياسة
بس انا عايز اعيش
عايز اكل لقمة حلوة
عايز البس هدمة حلوة
عايز لساني ينقطع
وانا بقول لابني مفيش
مفيش
.
مش تناكة ومش غرور
اني احلم يبقي ليه في بلدي دور
انا مش عايز وزارة
انا مش محتاج إمارة
بس انا عايز أمارة
ان انا ماشي تمام
اني ماشي للامام
واما ابني يبقي طالع من الاوائل
يبقي له في بلاده دور
نفسي نلغي المحسوبية والوساطة
انا نفسي وببساطة
اني اعيش
اني آكل فيكي عيش
يا بلادي يا حبيبتي
كل خوفي عليكي انتي
عليكي انتي.
.
|