 فيزا
في البدايه بعتذر جدا لعدم مشاركتى في مسابقه (التحدى)
و تلبيه الدعوة و كنت بتمنى أكون متواجد و أنافس مع صديقى العزيز
شاعر الأحساس إللى بباركله ع الفوز و المستوى الطيب إللى قدمه فى المسابقة
وجدا بفتقد كل الأخوه و الأخوات إللى كانوا موجودين أثناء تواجدى هنا
و كل عام و حضراتكم جميعا بخير
********
فيزا
إللى عايش فيها نفسه
يلقى على باسبوره فيزا
وإللى برا هزمه يأسه
غربته مابقتش ميزه
وإللى واقف بين بينين
لسه قدّامه البابين
لو قفل باب الحنين
تنجرح نفسه العزيزه
إختيار مافيهوش بدايل
ينجد الروح من وجعها
و الرحيل بين دمعه شايل
ذكريات رافضين وداعها
من بلاد الله لخلقه
البراح مين إللى خانقه
والونس إيه إللى قالقه
والخطاوى مين خدعها
قاسيه غربه روحنا فيها
بين خطى الأوطان وجعنا
الشراع خان السفينه
ولا سلمنا لوجعنا
إيه إللى خلانا جازفنا
كان طموحنا ولا زيفنا
ف السفر حاضنين نزيفنا
وخوفنا بيعاند رجوعنا
وإللى عايش فيها نفسه
يلقى على باسبوره فيزا
وإللى برا هزمه يأسه
غربته مابقتش ميزه
الرحااال
|