[محمود الصاروخ]

..][ بسم الله الرحمن الرحيم ][ ..

إن الحمدلله نحمده ، ونستعينه ، ونستغفره
ونعوذ بالله من شرور أنفسنا ومن سيئات أعمالنا

من يهده الله فلا مضل له ، ومن يضلل فلا هادي له
وأشهد أن لا إله إلا الله وحده لا شريك له ، وأشهد أن محمد عبده ورسوله



أحبتنا زوار منتديات بنات مصر بشكل عام وأقسام الرياضة بشكل خاص
أسعد الله أوقاتكم جميعا ويسرنا أن نقدم لكم الحلقه الـ ( 10 ) من البرنامج الرياضي

[ في الملعب ]
اعداد وتقديم / محمود الصاروخ



هذه المرة جاء الإختيار لـ مشرف مميز وبالرغم من إنه من فتره ليست كبيره
ولكنه صاحب بصمه في منتديات بنات مصر بقلمه المميز وانتشاره الأكثر من رائع
في جميع الاقسام ولديه خلفيه كبيره في جميع المجالات وبالفعل له صولات وجولات
داخل جميع الأقسام بشكل عام وشرف لي انه يتواجد معي في حلقة اليوم من البرنامج
بعد العودة من الغيـاب عن طرح حلقات البرنامج ضيفنا النهارده في حلقة اليوم المشرف
المميز والمحبوب جدا Just Ahuman



إستمتعوا بهذه الحلقه والاسئله والإجابات الخفيفه
وأتمني أن تنال هذه الإستضافه إعجابكم وإستحسانكم جميعا

[ بسم الله نبدأ ]



- صديقي الأهلاوي الغالي جدا يمكن اتعرفت عليك
من وقت دخولك المنتدييعني من فتره مش كبيره ولا حاجه
بس سعيد جدا بمعرفتك ومن زمان كان نفسي تكون معايا في البرنامج
واعمل معاك حلقه مميزه بس البرنامج منزلش من زمان لظروف خاصه
وبتأسفلك جدا علي تأخيري في ارسال الاسئله وهستغل انا الحلقه دي وهعمل معاك حلقه رياضيه شامله واهو ناخد رحله مع بعض في كل اللي بيحصل في الوسط الرياضي


أهلا بيك ياكبير معايا في الملعب

حبيبي يا حوده وأنت من الناس العزيزه على قلبي هنا
ومفيش أسف ولا حاجه أنا سعيد بتواجدي معاكـ







- كالعاده في البرنامج هبدأ معاك ب كام سؤال بره الملعب
وان شاء الله اكون خفيف عليك والاسئله تعجبك


إتفضل يا حوده

1- اسمك ، سنك ، عنوانك ، بتدرس ايه ؟

محمود - الإسكندريه عروس البحر
خريج كلية حاسبات ومعلومات

2- عرفت منك انك ماشاء الله عندك خبره كبيره في عالم المنتديات
بشكل عام وكنت مشرف في أكتر من مكان قبل كده وبتمنالك التوفيق دايما
ولكن حابب أسمع منك رأيك في المكان هنا وايه الفرق بين هنا وبين الاماكن
اللي كنت فيها بشكل عام وبراحتك علي الاخر ؟

أنا فى المنتديات من 2007 وكنت إداري فى أكبر موقعين فى مصر
المكان هنا بيتميز بأن كل اللى فيه قريبين من بعض وبيحبو بعض وفي روح موده
جميله تحسه جو أسري وده مش موجود فى أغلب المواقع أو المنتديات التانيه

3- ما الفرق بين ( Just Ahuman ) قبل الاشراف وبعد الاشراف ؟

مفيش أي تغيير مجرد لون كنت أخضر بقيت أزرق
الفرق الوحيده إني بقيت مسئول رسمي قدام الإداره من الأقسام اللى أنا عليها

4 - مين أكتر الناس اللي حبيتها هنا ولازم كل ما تفتح
تطمن عليهم بشكل دائم ومرتاح معاهم بشكل عام ؟

أقرب الناس إليا هنا أنت طبعاً وحبيبي فارس المنشاوي
حياة "هاجر" و هبه بوباا والباقي كلهم أخواتي طبعاً وبحبهم ربنا يديم المحبه

[ ربنا يخليك ياحوده وانت كمان حبيبي ]

5- موقف طريف حصلك من حد في المنتدي ؟

إني مره كنت لسه صاحي من النوم وبعلق على كومنت بتاع أنووش
بدال أما أعمل إقتباس عدلت على الكومنت بعد أما إعتمدت
خدت بالي وقعدت أضحك علي نفسي أووي

6- شكرا لمن تقولها داخل المنتدي ؟

لكل عضو أو إداري ساعدني ورحب بيا ووقف جنبي من أول دخولي هنا
بصراحه محستش بأي غُربه هنا ودخلت الأجواء بسرعه
رهيبه أنا نفسي مستغرب لحد دلوقتي

7- معروف انك أهلاوي صميم ولكن لو حابب تقول كلمتين لجمهور الزمالك ماذا تقول ؟

جمهور الزمالك أخواتنا كلهم وحبايبنا زيك كده يا حوده
أحب أقولهم خليكو فى فريقكو ومتركزوش فى المنافسين

[ ماهو لازم نركز مع جميع الانديه ونتمني سقوطها لمصلحة الزمالك ياحوده ]




( ثانيا اسئله عن الرياضة المصرية )


1- ما رأيك في اداء التحكيم المصري بشكل عام ورأيك في تحكيم
مباراة الزمالك والمقاصه و الاهلي وأسوان و الاهلي والانتاج الحربي ؟

مش هتكلم على مباراه بعينها
بإختصار المنظومه كلها فاشله إبتدائاً من إتحاد الكره وإنتهائاً بلجنة الحكام

2- قنبله بما تحمل الكلمه من معني انفجرت بالامس عبر الاهرام المسائي
وتسجيل صوتي بين وجيه أحمد القائم بأعمال رئيس لجنة الحكام وأحد أعضاء
اتحاد الكره عن تعيين جهاد جريشه حكما لمباراة الزمالك والمقاصه نظرا لإختيار مرتضي منصور رئيس الزمالك ، حابب أسمع رأيك في القصه دي كلها بشكل عام
وهل هذا التسجيل يدين الزمالك في شيء ؟ أم انه مجرد اتصال عادي ؟

رأيي ومش هغيره المنظومه كلها فاشله وفاسده وده عيب نظام موجود
من زمان ومرتضي منصور من وجهة نظري حُثاله ويجب التخلص منها

3- نجوم ومواهب مصريه كثيره لم تنجح بشكل عام
أمثال عمرو سماكه وجمال حمزه وغيرهم وغيرهم ماالسبب
في عدم نجاح هؤلاء النجوم وغيرهم برأيك ؟

الإلتزام والأخلاقيات هي أساس نجاح أي لاعب من وجهة نظري
وفي نفس الوقت بعيب على إعلامنا المُبجل اللى بيحب يضخم من حجم اللاعبين
تلاقي اللاعب عمل ماتشين حلوين يقومو قايلين نجم مصر الأول كأنه وصلنا كأس العالم

4 - ما رأيك في تيم المقاصه هذا الموسم وهل يستطيع أن يكمل المشوار
ويزاحم الكبار لنهاية الموسم ويحجز مكان في المربع الذهبي
هذا العام أم الانديه الاخري سيكون لها رأي أخر مثل الاسماعيلي و انبي وغيرهم ؟

إيهاب جلال مدرب ممتاز ويمتلك لاعبين طموحين ونفسهم يعملو حاجه
بس من وجهة نظري المقاصه هتكمل وهتزاحم للنهايه
زي الموسم الماضي لكن الداخليه مش هتكمل

5- ما رأيك في مجلس ادارة الاهلي برئاسة محمود طاهر
و رأيك أيضا في تيم الاهلي وبيسيرو مدرب النادي بشكل عام
وماهي الاسباب وراء أداء الاهلي المتواضع منذ الموسم الماضي اللي يومنا هذا ؟

مجلس إداره فاشله وأتمني أن يتم تنفيذ الحكم ويغور فى داهيه
بالنسبه لبيسيرو من اول يوم دخل النادي فيه وأنا مش متفائل بيه
الأهلي يمتلك لاعبين مميزين ولكن يحتاجو للتوظيف الجيد وتراجع الأداء
بسبب الإختيار السئ للمدربين سواء جاريدو أو بيسيرو بس أعتقد بيسيرو
هيرحل فى أقرب فرصه أو بمعني أصح هيرحل برحيل مجلس طاهر

6 - ما رأيك في تيم الزمالك بشكل عام وما رأيك في قرار مرتضي منصور
رئيس النادي بتعيين أحمد حسام ميدو مدير فني للفريق وما الفرق بين
الاهلي و الزمالك في الوقت الحالي برأيك ؟

الزمالك على عكس سنوات مضت يضم لاعبين مميزين فى جميع المراكز
ولكن نقطة الضعف على الأطراف محتاجين تدعيم مرتضي منصور ظلم باكيتا
أنا شايف إنه مأخدش فرصته وميدو معتقدش إنه هينجح رغم فوزه على الزمالك
والفرق بين الأهلي والزمالك هو الإستقرار الإداري فى الزمالك فقط

7 - برؤيتك الخاصه ماهي حظوظ الانديه المصريه الأربعه
المشاركه في البطولات الافريقيه القادمه الاهلي والزمالك في دوري الابطال
و انبي والمقاصه في الكونفدراليه ؟

من وجهة نظري إنبي والمقاصه هتكون أقصي طموحاتهم ونهايتهم
فى دوري المجموعات الزمالك حظوظه وافره بس لو تخطي عقبة
الدور الـ 16 الأهلي لو فضل بنفس الحال وبوجود بيسيرو لن يتجاوز الدور الـ 16

8- برؤيتك الخاصه ماهي حظوظ المنتخب المصري في تصفيات كاس العالم ؟
ولو خيروك باختيار أنسب تشكيل للمنتخب في الفتره الحاليه من ستختار
في ظل وجود كوكبه من اللاعبين أصحاب الخبرات والمهارات
في الكره المصريه بشكل عام ؟

حظوظ المنتخب كبيره ولكن صعب التكهن بالتأهل من عدمه
بالنسبه للتشكيله هيكون صعب الإختيار دلوقتي خصوصاً فى ظل تراجع لاعبين كتير
من أعمدة المنتخب زي باسم مرسي ومؤمن زكريا وكهربا

9- برؤيتك الخاصه ونحن في الاسبوع الثالث عشر من الدوري
لهذا هل تتوقع ان يحسم الزمالك اللقب هذا الموسم للمره الثانيه
علي التوالي أم سيكون للأهلي رأي أخر ؟

المنافسه هتبقي صعبة السنه دي للفريقين أنا شايف إن أي فريق فى الدور
يقدر يفوز على الأهلي والزمالك وأكبر دليل مباراة أسوان مع الأهلي والزمالك

10- برؤيتك الخاصه من هو أفضل لاعب أجنبي بالدوري المصري
في الوقت الحالي ومن هو أحسن مدرب ومن هو أحسن لاعب ؟

مانسو كواكو لاعب سموحه ويليه ستانلي لاعب وادي دجله

11- ما الفريق الذي يطربك أداءه ولعبه غير الاهلي و الزمالك بشكل عام ؟

أسوان رغم ضعف الإمكانيات ولكنه يقدم أداء مُذهل مع عماد النحاس
وإستطاع إحراج فرق كبيره بحجم الأهلي والزمالك وفاز فى المباراه الأخيره على وادي دجله بإستحقاق وجداره وأتوقع عدم هبوطهم للدرجه الثانيه




( ثالثا اسئله عن الرياضه العربيه والخليجيه )


1- ماهي ميولك في الكره السعوديه ؟ ومن هو النادي الذي تتابع
أخباره بشكل كبير ؟ وأفضل لاعب سعودي ؟

أنا من محبي الأهلي السعودي منذ الصغر
ولكن بالنسبه للأخبار لست بالمتابع الجيد الفتره الأخيره

2- بعد أن وصل الاهلي السعودي والهلال السعودي اللي نهائي كاس ولي العهد
برؤيتك الخاصه ماهي حظوظ الاهلي في هذه المباراه و أيضا الهلال ؟
ومن ترشحه للحصول علي هذا اللقب الغالي جدا في السعوديه ؟

الأهلي حظوظه أوفر فى النهائي ودائماً ما يكون حاسم
فى المبارايات المهمه وأتوقع فوزهم باللقب

3- ما رأيك في نادي النصر السعودي بشكل عام ؟

لم أتابع النصر فى الفتره الأخيره للأسف

4 - من هو اللاعب المفضل لديك في الكره العربيه بشكل عام
وتستمتع وأنت تشاهده ؟ وأهم مميزاته ؟

أكيد عبد الشافي متميز فى الرواق الأيسر وأنا من محبيه
منذ بدايه ظهوره وقبل وصوله للزمالك لاعب متكامل
من وجهة نظري وغيابه أثر على المركز فى الزمالك

5- برؤيتك الخاصه من هو أفضل وأقوي منتخب عربي
في الفتره الحاليه ويقدم كرة قدم مميزه وممتعه ؟

الجزائر بالتأكيد ويمتلك لاعبين مميزين فى جميع المراكز
أمثال فيغولي ومحرز وبراهيمي وأتوقع صعودهم لكأس العالم بروسيا 2018

6- برؤيتك الخاصه ماهو أفضل دوري عربي
ولو طلبت منك ترتيب أقوي واهم 4 دوريات عربيه هل تستطيع ؟

الدوري السعودي
الدوري المصري
الدوري التونسي
الدوري الإماراتي

7- هل تستطيع أن تطرح علينا مقارنه بسيطه بين
الكره السعوديه و الكره المصريه والكره القطريه والكره التونسيه بشكل عام ؟
وما رأيك أيضا في منتخب الجزائر ؟

الكره السعوديه غير مؤثره على الصعيد الدولي
فى الوقت الحالي رغم وجود دوري قوي

الكره المصريه لها إسمها على الصعيد الدولي والأقليمي
ولكن للأسف السنين الأخيره شهدت تراجع رهيب فى نتائج المنتخب
أتمني الفتره الجايه تشمل تغيير فى وضعنا القاري والعالمي
فى ظل وجود نخبه من النجوم فى جميع المراكز

الكره القطريه فاشله بكل المقاييس على المستوي الدولي
ويرجع السبب فى ذلك وجود دوري ملئ بالمحترفين الأجانب
والإعتماد على تجنيس اللاعبين

الكره التونسيه لها باع وسيط كبير على الصعيد القاري
والدولي عموماً ولكن هناك كبوه فى الوقت الحالي
وذلك لقلة النجوم فى الوقت الحالي أتمني أن تعود
تونس لوضعها الطبيعي مره أخري

8- هل تستطيع تحديد ثلاث أساطير داخل الكره العربيه بشكل عام ؟

محمود الخطيب
رابح ماجر
سامي الجابر



( رابعا اسئله عن الرياضه العالميه )


1- ميولك الأوروبيه بشكل عام ؟ ولاعبك المفضل عالميا
وأيضا مدربك المفضل عالميا ؟

ريال مدريد فى المقام الأول ثم مانشيستر يونايتيد وروما

2- دوري أبطال أوروبا البطوله الاقوي في العالم وشاهدنا جميعا قرعة
دور الـ 16 لهذه البطوله ، ما رأيك في نتيجة القرعه بشكل عام ؟
ومن ترشحه ليتوج زعيما علي عرش القاره الأوروبيه ؟

مواجهات ناريه ولكن الحظ خدم بعض الفرق
لكن من يتوج صعب التكهن فى الوقت الحالي ممكن أقولك توقعي
بعد إنتهاء الدور الـ 16 لأنه دايماً بيحصل فيه مفاجأت غير متوقعه

3- سؤال علي هواك ، حابب أسمع رأيك في قرار تعيين
الأسطوره زين الدين زيدان في ريال مدريد ؟
وكيف تري حظوظ زيزو مع الملوك ؟

قرار صائب لبيريز بإقاله رافا بعد أداء هزيل غير معتاد للملكي
زيزو محبوب بداخل النادي ووسط اللاعبين والأمر ده كان بيفتقد إليه
رافا ورغم فشل زيزو مع فريق الكاستيا الخاص بمدريد ولكني أتوقع
إرتفاع الأداء فى الفتره القادمه

4 - الأسطوره الحيه لفريق العاصمه الإيطاليه روما الملك توتي
الذي يستحق لقب رجل في زمن عبدة المال
ما رأيك في الملك توتي وقصة وفاءه لروما بشكل عام ؟

لاعب ضحي بالمال والشهره من أجل حبه لكيان النادي
الذي عشقه وتربي فيه منذ الصغر وضعه وضع ستيفين جيرارد
أعتقد الإتنين لو كانو راحو لأنديه أكبر كان هيبقي ليهم
شأن آخر رغم تاريخ الزاخر بالأرقام

5- كيف تري حظوظ الطليان في البطولات الأوروبيه هذا العام ؟
وبرؤيتك الخاصه ما رأيك في نجمنا المصري محمد صلاح في روما وهل ترشحه للإنتقال لنادي أخر أم تدعمه للبقاء في إيطاليا الحبيبه ؟

حظوظهم غير وافره رغم الأداء الجيد بالتصفيات أعتقد إنهم لم يتعدو
سقف الدور الـ 8 بالنسبه لصلاح أنا كنت معارض لذهابه روما لأني
بيتحمل على عاتقه مسئولية الفريق بالكامل بمعني أصح ردوي جارسيا
بيحط صلاح ويحط عليه الفريق وده مش صح وصلاح الفتره الأخيره
فى كبوه والسبب مش هو بس السبب فى عدم مؤازرة زمايله ليه
وشايف إن روما محتاج تدعيم فى الجانب الهجومي
وكنت أتمني بقائه فى فيرونتينا أو ذهابه للدوري الإسباني اللي
أنا شايفه انسب أكتر لصلاح

6- سؤال طرحته علي أحد الاعضاء من قبل ولكن حابب أسمع رأيك فيه
وانت تعلم جيدا بان الالمان استحقوا لقب كاس العالم الماضي عن جداره
ولكن سمعنا تصريحات وكلمات غريبه بان المنشطات كان لها دخل
في تتويج المانيا بلقب كاس العالم ، ما رأيك في هذا الموضوع بشكل عام ؟

أهو أي كلام بيتقال وخلاص يا محمود ألمانيا كيان عملاق فى الكره العالميه
ولكن دائماً يواجهون سوء الحظ فى المباريات الحاسمه زي مباراة البرازيل فى 2002

7 - برؤيتك الخاصه ماهو أقوي فريق في العالم حاليا ؟
وماهو أقوي منتخب عالمي حاليا ؟ وأحسن لاعب في العالم حاليا ؟
وأحسن مدرب في العالم حاليا ؟

رغم إنتمائي المدريدي ولكن الحق حقاً إن يقال برشلونه الأقوي
ويمتلك مقومات فريق البطولات فهم من صنعو لويس إنريكي
أقوي منتخب ألمانيا و أفضل لاعب بالعالم حالياً من وجهة نظري
فى ظل تراجع كريستيانو وإصابة ميسي وغيابه لفتره طويله قبل عودته نيمار
تحمل على عاتقه المسئوليه الهجوميه للبلوجرانا وقادمهم لإنتصارات حاسمه
وأتوقع حصوله على البالوندور العام القادم أفضل مدرب بيب جوارديولا

8- كتير بنشوف تعصب وجدال بين مشجعي الانديه الأوروبيه
وخاصة ريال مدريد وبرشلونه ، ما رأيك في هذا الموضوع ومن الافضل برأيك ؟

حاجه وارده جداً زي اللي بيحصل بين مشجعي الأهلي والزمالك
وده اللى بيحلي الكوره جو المنافسه والجدال الدائم بس الأهم إنه يكون بدون قلة أدب

9- من تفضل ( كريستيانو رونالدو ) أم ( ميسي ) أم ( الملك توتي ) ولماذا ؟

كريستيانو رونالدو طبعاً لاعب مُجتهد وإشتغل على نفسه كتير وعلي فورمته
لحد ما بقي أحد أساطير كرة القدم العالميه وأصبح يُدرس فى الجامعات
الشكل التشريحي لعضلات قدمه نظراً لشكلها المُلفت



[ كلمة اخيرة ]
كلمه حابب تقولها لبرنامج في الملعب


برنامج جميل بصراحه يا محمود أتمني متوقفوش تاني
وأنا كنت سعيد بلقائي معاكـ ..

[ حبيب قلبي ياحوده والله سعيد جدا بالحلقه دي ومنورني بجد ]



[ كلمة ختامية من محمود الصاروخ ]

في البدايه بشكر ضيفي الغالي جدا ( Just Ahuman ) علي قبوله انه
يكون ضيف معايا في البرنامج بعد العوده ولي تعليق بسيط علي اجابه من ضمن
إجابات محمود وبالتحديد علي مرتضي منصور

بالرغم من اختلافي مع شخص مرتضي منصور ولكن الزمالك في الفتره الحاليه
محتاج شخصيه زي مرتضي منصور لإيقاف كل من يتطاول علي الزمالك سواء
من الاعلام أو خارج الاعلام كما لاحظنا جميعا في السنين الماضيه تطاول
الجميع علي الزمالك ولكن الاختلاف ف الرأي لا يفسد للود قضيه
بشكرك ياحوده علي اجاباتك الكافيه والجميله ومنورني



وبكده نكون وصلنا لـ نهاية حلقتنا النهارده
وأرجو أن اكون وفقت في هذه الاستضافة والطرح بما يليق مستواكم
ومستوي ضيفنا الغالي جدا

أعدكم جميعا بالافضل في قادم الايام بإذن الله
وانتظرونا قريبا مع عضو جديد في برنامج
[ الملعب ]



تحياتي للجميع محمود الصاروخ