[د/ عبد الله]

من مصر جيت ع الرياض أنا دوغرى
وحدة وحيرة وانشغال وطال أنا فكرى

شهرين وعدّوا طلبت نقلى
روحت القصيم ومكنتش أعرف
قال يعنى فيها هلاقى أهلى
ما هو كله غربة وحاجة تقرف

قعدت فى بريدة ييجى كمان شهرين
الحالة اتحسنت ييجى كده قيراطين

ومن بريدة روحت لعنيـزه
قعدت فيها فترة وجيزه

ومن عنيزة روحت ع الرس
فضلت فيها ييجى شهر ونص

ومن الرس روحت المجمعه
سيرتها حلوة.. سابقاها ومسمعه

فضلت فيها فترة طويلة
كانت والله أيامها جميلة

م المجمعه تانى لبريده
ومن بريدة للمجمعه تانى
ثم الأجازة.. وادى تنهيدة
أصلى قرفت والبعد كوانى

ومن الأجازة ع الرس جيت
تقولشى مفيش غيرى حد
فى كل حته فيها لفيت
ما أنا أصلى البديل المستجد

مكنش يبقى للشركة فرع
فى جدة ولا فى الطايف
بيقولو هناك الجو ممتع
أنا مشوفتش...وشكلى مش شايف

وأدينى هنا ف الرس دلوقتى
يمكن تكون آخر المطاف
كله على الله يهون وقتى
هروح أنام وأشد اللحاف