[ايمان طلعت]

السلام عليكم ورحمه الله وبركاته

بمناسبه قرب شم النسيم
اللي احنا مالناش دعوة بيه اساسا
جبتلكم طريقه تخليل الفسيخ

المقادير

سمك بوري حسب مانتم عايزين
ملح
شطه
زيت
كركم حسب الرغبه
الطريقه

الاول هتغسلوا السمك بميا دافيه كويس اوي ومن خياشيمه
بعد كدة تحطوه في مصفاه
عشان ينشف من ميته

هتجيبوا الملح
حوالي معلقتين كبار للسمكه الواحدة
وشطه حسب رغبتكم قليل او كتير
و ممكن كركم دة اللي بيديله لون اصفر
و ممكن لا مش هتفرق في الطعم

هتقلبوا كل دة علي بعض
وتمسكوا السمكه تحطوا من الخليط دة جوة راسها وتحطوها في كيس نضيف وترشوا عليها شويه من الخليط
وكل السمك كدة لحد ما تخلصوه كله
حطوا عليه رشه زيت صغيرة
وقلبوا السمك كدة بالكيس واقفلوه كويس اوي مع الضغط عليه عشان الهوا يخرج
بعد كدة حطوة فحوالي خمس اكياس ويكون اخر كيس اسود
وتحطوة بعد كدة في علبه بلاستك او ازاز
وكل يومين تقلبوا الكيس علي جنب
هيقعد من 15 يوم لــ20 يوم
حسب حجم السمك

بعد المدة حطلعوه من الكيس تغسلوة بسرعه تحت الميا
بس بسرعه يدوب ينزل بس الملح والميا اللي كان فيه
ويتنضف كويس
وتحطوا عليه لمون و ممكن زيت
على حسب ما تحبوا
وبالهنا والشفا


ودي صور لفسيخ خللته انا بعد ما غسلته
دة كانت مدته 20 يوم عشان سمك كبير
بس للاسف مصورتش وانا بخلله
مكنتش اعرف اني هنزل الطريقه بقي

دة بعد التخليل