حبتيه؟
ولا لسه بتفهميه
يعنى ناويه تكملى
ولا شايفه صورتى فيه؟
بتكلميه؟
شايفه شوقه اللى ف عنيه
بتسمعيله وانتى ساكته
ولا بتردى عليه؟
مش بلومك أو بعاتبك
عارف انك مجبره
واللى وقعنى فى حبك
مش هنرجع بيه ورا
بس قبل ما تقبلى....
لازم حبيبتى تعرفيه
.....................
قوليله كان ماضى وراح
حب ف حياتى وانتهـى
واطلبـى منه السماح
على حاجة عدّى وقتها
وإن مكنشى هيقبلك.....
أحسن ما تبقى بتخدعيه
............................
ساكته ليه؟
يعنى شوقك بتداريه
ولا عايزه تفكرى
وحبى لازم تبعديه؟
رافضه وجودى ويّا قربه
وحاجات كتير متلخبطه
مش قابله حبى جنب حبه
وخلاص بقيتى محبطه
والقلب اللى غاب عن دنيتى....
أنا لسه حاسس باللى فيه.
...........................
حبيته؟
ولا لسه بتفهميه
يعنى ناويه تكملى
ولا شايفه صورتى فيه؟