[د/ عبد الله]

بتحدّاكي تنسيني
تنسي هوايه وسنيني
ويبقى لك ف الهوى ذكرى
لطيفي وكل تكويني

أنا عاشق خطاويكي
ورمش عنيكي آسرني
وضحكك لمّا براضيكي
يجيب الفرح بين حضني

وانتي ف الهوى زيي...
ولو عامله كرهتيني

مش هانكر ذنبي أو إنّي
طريق الجرح كان منّي
ولو للجرح كان كلمة
هيحكيلك كتير عنّـي

ده منايه أجيب السما عندك
وأحطّ نجومها فوق خدك
تغير الشمس من ضحكة
ولاحدش يكون قدك

تغيب الشمس فى سماها..
وتبقي انتي يا نور عيني

وأنا ف القلب بعد سنين
هيبقى لي غرام وحنين
طب ليه تبعدي وتقسي
في البعد احنا مش عايشين

مفيش صعب يبقى مُحال
ولو شوفتي القمر في زوال
بكرة تهلّ أنواره
وتتبدّل بنا الأحوال

بس تكوني هنا جنبي
عشان بالقرب تحييني...