[فتحى عيسى]

هيا الفلوس هيا وبس ...
ست الكل والعمة والخالة ...
وأم النفوس ...
هيا كل حاجة ...
وأول حاجة وأخر حاجة ...
هيا سرها باتع وسحرها ماتع ...
هيا المعلمة الكبيرة ...
فرضت شروطها ع التخين ...
من الفقير الدقة لجناب الوزير ...
من اللي مش لاقي الهدمة للمتغطي بالحرير ...
كله بقي له سعره وله تقدير ...
حتي الصداقة والأخوة والجيرة ...
والمحبة بقت بفلوس ...
أشترت الضمير والمصير ... والأعمي والبصير ...
أشترت الرأفة ونزعت الرحمة من قلب الحكيم ...
حتي الفاس مبقاش يفلح بذمة ...
ولا الكراس بقي يشرح بهمة ...
ولا عمة فلتت ولا طربوش هيا بس هيا الفلوس ...
حتي الكلمة بتتباع علي عينك ياتاجر ...
إمبارح قال أيوه والنهاردة بيقول لاءه ...
ولا تعرف هيا حق ولا لزوم ...
ولا هيا فنجرة بوء وضحك ع الدقون ...
ولا غاية لهدف مسكون ...
ولا برضه هيا هيا الفلوس ...
مش مهم أزاي تجيبها ...
سارقها ناهبها واكلها ...
مش مهم علي روح مين هتدوس ...
تحرق وطن مدينة أمة مش مهم ...
الأهم الفلوس ...
حرام حلال مبقتش فارقة ...
ولساه بيجمع الغله ...
علي ريق النوم ...
ولساه مشبعش ...
لساه محروم ...
فتحي عيسي
القاهرة
السبت
4-6-2016
نبض اول
بنات مصر