مبقتش فاهمك
بتحبيني ولا بتكرهيني انا والله مبقتش فاهمك
مرة تحني وكتير بتقسي وحبي ليكي ولا هامك
إيه اللي جرالك مين اللي لعب بعقلك
طال صبري عليكي وبقولك غيري عمايلك
من صمتك والغياب بقيت كاره اني اقابلك
تعبت ف غيابك وتعبت اكتر ف قربك موعود انا بظلمك
احلى كلام ليكي قلته
حب كبير في قلبي شلته
اعملك إيه وذنبي إيه لو مش مصدقاني بسبب سوء فهمك
تغيبي عني ف عز ما اكون محتاجلك
وترجعي ابتسم وانا ملهوف مشتاقلك
اتعودت على الغياب ودايما نفس الجواب بكل برود في دمك
مش مصدقاني وانا من كتر حبي بقيت أنده للناس باسمك
مرة تفرشيلي الأرض سعادة وأمنيات
مرة تحسسيني إن الحب وقته فات
خليتيني افتقدك وانتي معايا
وارجع لأيامي معاكي زمان والذكريات
إنتي اكتر وحدة حبيتها
وإنتي الوحيدة اللي خلت الحب ف قلبي مات
مبقتش فاهمك ومقدرش اجاملك
لا أنا قادر اتحمل عمايلك ولا قادر ابعد من سكات
شــــــــــــــــــــــــــــــــــــ . حــــــــــــــــــــــــــــــــــــــ
التعديل الأخير تم بواسطة شاعر الحب الحزين ; 10-08-2016 الساعة 06:47 PM |