منتديات بنات مصر - عرض مشاركة واحدة

همس الكناريا · منذ /10-20-2016, 04:03 PM

الأُدبـاتــى

........................

أنا الأديب الأُدباتى
بأسن سنانى..ونباتى
ع اللى يسهر أوطانى
واللى سقانى برانى
اللى رمانى ف أحزانى
أتقلب..وحدى ف أناتى

/

أنا الأديب...الأُدباتى
أنا الأديب المتفنط
ماسك لجامى ومزبط
نشان كلامى ومخطط
جوه خيالى..بأتنطط
بالمازورة...تخطيطى
أنا الأديب..الأُدباتى

/

أنا الأديب اللى ما فلس
ما دام ..رغيفى متغمس
بفول حراتى ومدمس
تغطى الدنيا ضحكاتى
أنا الأديب.. الأُدباتى

/

أنا الأديب المتأدب
بفن فنى..وبرتب
أى منعكش ومكركب
لا موجه تركب على مركب
ولا جهلى يكسر إشراتى
ه أنا الأديب ..الأدباتى

/

أنا الأديب اللى ما اتأمرك
يا سنيوريتا حوش خمرك
يجينى وشك يجي ضهرك
مهما شيطانك وسوس لك
يحمينى..صومى وصلاتى
أنا الأديب ..الأُدباتى

/

أنا الأديب..المتنور
أغزل سطورى بالمرمر
واعى..جدا وبصور
تكنولوجيا..وتطور
فكر رحعى..وتحضر
يعرى ..ولدى وبناتى
أنا الأديب..الأُدباتى

/

أنا الأديب..العرباوى
بكشف عيوب ويا بلاوى
عقول غياب زى حصاوى!
نط واركب..لو غاوى
على ضهر بترولى وزيتى
أنا الأديب.. الأُدباتى

/

أنا الأديب السواح...
ف إيديه مشرط جراح
صدرى واسع..وبراح
عقلى فاهم..لماح
يداوى جرح..قنواتى
أنا الأديب.. الأُدباتى

/

أنا الأديب..المتخصخص !
أمص صباعى وبمصمص
بعيون مفخوته..بتبصبص
وباروكه وتوكه..ومهيص
على رصد وسيكا بترقص
أتارينى يا ويكا متفطس
فى زفة..منشدها حانوتى !
أنا الأديب..الأُدباتى

/

أتا الأديب الأدباتى
سرقوا مزاجى وصفاتي
جعلوا أحزانى أدواتى
وحسبوا كل خطواطى
أنا الأديب الأدباتى

/

ساعى البريد بيعرفنى
من الأخبار بيغرفلى
أحزان بلابل ووصفلى
أسم الشهيد وغلفلى
أنا الأديب الأُدباتى

/

صهلل وخبط ف الحِلل
عرفنى ب كل المِلل
وعارف أحافظ على دينى
دين الإسلام بيحينى

:::::::::::::::::::::::::::::::

همس الكناريا