 ياريتني فضلت بعيد
البنت اللي انا حبيتها
وحلمت بيها واتمنيتها
وكتير يا قلبي استنيتها
لما لقيتها مش لقيتها
كنت راسم ليها صورة ف خيالي
لقيت الصورة زي ما قلبي رسمهالي
ولما قابلتها لقيتها مش زي اللي ف بالي
انا كنت فاكر إنها هتصون الحب الغالي
شفتها حقيقة قدامي وفضل الحب ف خيالي
نفس الصورة اللي حلمت بيها امبارح
نفس الشكل نفس العيون والملامح
بس إحساسها عدم وقلبها جارح
زي البحر حلو شكله تفضل قدامه سارح
بس متقدرش تشرب منه أصله مالح
كنت بكلمها والمحلها من بعيد لبعيد
قلت خليني اقرب يمكن الحب يزيد
قربت وجربت ورجعت من الحب وحيد
وياريتني ما قربت ياريتني فضلت بعيد
مشاعرنا التايهة ياما قربتنا من بعض
وأما بقت رسمية اتقابلت بصد ورفض
قبل الإعتراف بنكون حبايب
ومن بعده أغراب لا طايلين سما ولا أرض
درب الحب مليان عجايب
قبل التلاقي تلاقي القلوب م الشوق تتشد
نقرب مش عاجبنا نبعد مش عاجبنا
ولا بنتوب مهما ندوب قلوبنا حكمتنا لأبعد حد
ياريتني فضلت بعيد
أهون ما يتغير احساسي ناحيتك
كنت بحبك وانا بعيد
ولما قربت لقيت سكتي غير سكتك
ياريتني فضلت بعيد
كنت فضلت قريب منك وساكن دنيتك
شــــــــــــــــــــــــــــــــــــــــ . حـــــــــــــــــــــــــــــــــــــــــ 
التعديل الأخير تم بواسطة شاعر الحب الحزين ; 10-30-2016 الساعة 02:24 AM |