طبعا كلنا بنحلم بالحياه الزوجيه عشان هى الاستقرار
بعد بقى ما معظمنا جرب الحب سواء حب وهمى او حب حقيقى
وده صعب فى الزمن ده ومحدش يسألنى صعب ليه عشان ده مجال تانى
مش وقته انى اتكلم عنه ممكن اخليه موضوع لوحده مره تانيه
بعد الزواج بقى كل واحد وواحده مننا هيكون ليه حماه اللى هى ام الزوج وام الزوجه
ودول بقى لو مؤخذه عاملين زى البطيخه انت وانتى وحظكم بقى وهقولكم ليه بقول كدا
بعض الحموات سواء ام الزوج او ام الزوجه بيكون ليهم دخل كبير فى اثاره المشاكل بين الزوج وزوجته
سواء بقصد او بدون قصد وخصوصا اذا كان الزوج شخصيته ضعيفه وبيسمع كلام امه
فيه حماه مثل ام الزوجه تستلم بنتها فى بدايه زواجها وتقولها
بقولك ايه انا عيزاكى تمشى زوجك على العجين ما يلغبطه عيزاكى تحطى زوجك خاتم فى صوباعك
وخلى السيطره ليكى انتى وحاولى تقصقصى ريشه عشان ميتجوز عليكى ويبص لغيرك
البنت تقولها يعنى ازاى يا ماما اقصقص ريشه هو طير ولا ايه؟ امها تقولها يا خايبه يعنى اقصد
تخليه يصرف فلوسه اول بأول يعنى دايما تطلبى منه طلبات ليكى وللبيت على طول ومتدهوش فرصه
انه يحوش فلوسه او يحطها فى البنك عشان لو عمل كدا مصيره هيتزوج عليكى انا امك وبقولك الصح وبخاف عليكى طبعا البنت على طول تسمع كلام امها وتروح تطبق الخطه الشريره بتاعت امها
على الجانب الاخر نيجى لحماه البنت اللى هى ام زوجها
تقول لأبنها فى بدايه حياته الزوجيه بص بقى انا عيزاك تدبح القطه لمراتك من اول ليله عشان تخاف منك وتعمل حسابك ولو قالتلك يمين انت تقولها شمال واديها مصروف بيت بسيط جدا على قد متطلبات البيت ولو طلبت منك اشياء تخصها من ملابس وغيره قولها حاضر ومش تنفذ ولو نفذت جيبلها حاجات بسيطه جدا عشان لا تتعود على كدا وعشان لا تطمع فى فلوسك يقولها حاضر يا ماما اطمنى
كل كلامك هنفذه طبعا الزوج ده اللى هو ابن امه زى ما بيقولوا وشخصيته ضعيفه
طبعا دى نماذج موجوده فى الحياه صدقونى وخصوصا لو الحماه عايشه فى بيت بنتها او عايشه فى بيت ابنها ومش بيحطوا فى راسهم ايه نتيجه نصائحكم الفتاكه دى ونتيجه لكدا بيحصل طلاقات كتيره بسبب الحماه ونصائحها
وبعتذر لكل واحده وكل واحد والدته متوفيه وبقولهم الله يرحمهم ويحسن اليهم
بس خلاص
مع السلامه بقى