 كلمة بحبك
كلمة بحبك لو مش من قلبك متقولهاش
دي مش مجرد كلمة دي حياة بتتعاش
ياما ناس قالوها من غير ما يحسوها
لمجرد إنهم بقلوبهم لحظة بس عرفوها
وف وقت الفعل بان الكداب والخاين والغشاش
لو مش من قلبك اعفي لسانك ارجوك بلاش
يسبقها تفاصيل وحنين ولهفة
يملوا القلب مودة واشتياق
بتحرك أحاسيس كانت واقفة
بتخدر تعاملنا ع الاخلاق
تحس إن اللقى أجمل صدفة
يبقى كل خوفك م الفراق
ده الحب المبني ع الود والألفة
واسئل عنه اللي منه داق
بنكهة الوفا محبوك بصدق الوصفة
مش مجرد كلام على أوراق
ده حب صاحبه قلبه أبيض متصفى
تاريخه بيشرف كل العشاق
ياما فضلت ف قلوب عشقت بصمت ورضى
ياما اختفت قدام أحباب واتقالت قدام العدى
ياما بيقولوها كدابين وبيداروها مخلصين
المعنى عند قايلها وكل القلوب قدامها متروضة
مع ان الكلمة دليل ع الصحبة واللمة
بس لما تسمعها من غريب تحس فرحتك هتسع الفضا
يمكن تسمعها من قريب وتحسها عادية جدا مش كده
مش ضروري إن اللي بيحبك يبقى حواليك وجنبك
يمكن اللي جنبك يسيبك والبعيد يفضل حبيبك بروح عاشقة ومتنهدة
يمكن عمرك الجاي كان الحب فيه بيتمهدلك من وقت سبق ومضى
مش بس مجرد كلمة من أربع حروف
ليها كذا معنى وفيها من المشاعر ألوف
ثقتك ف نفسك وف حبك لأبعد حد
تخلي الكلمة بين كل حرف والتاني مد
تقدر تتحدى الدنيا بحبك وتواجه أي ظروف
متقولهاش كتير تسمعها كتير
خليها ف قلبك يا ابو قلب كبير
دي نورها لو زاد بيعميك وضلمتها بتخليك تشوف
الحب غموض المفروض فيه مرفوض
لو قلبك مش قده ريح قلبك واستناه اعمل معروف
شــــــــــــــــــــــــــــــــــــــــــ . حـــــــــــــــــــــــــــــــــــــــــ 
|