[سهـــر]

من يومين كنت مع بابا في مركز للأشعات وكدا
واحنا طالعين لقينا ست كبيره قاعده على السلم وبتعيط
في الاول افتكرنا انها اتسرقت ولا حاجه
بابا سألها مالك يا حاجه ؟
قالتله الدكتور طالب مني اشعه بـ 400 جنيه ومش معايا الفلوس
فبابا طبطب عليها وقالها تعالي معانا يلا عشان تعمليها
الست رفضت وقالتله لأ انت هتعملهالي وييجي واحد ابن حلال تاني يجبلي الدواء
انا الأحسن يابني اروح افتح تربتي وأجهزها
ومشيت وسابتنا
بابا عمل الأشعه واحنا مروحين
جدو اتصل عليه وطلب منه يجبله دواء مش لاقيه في البلد عنده
الدواء ده جرعه من 5 شرايط ولسا في باقي الأدويه
المهم بابا سأل عليها ولقاه الشريط بـ 106 جنيه
يعني الخمس شرايط بـ 530 جنيه
ولسا باقي الأدويه
المهم خدنا الصدمه ومشينا
وصلنا البيت قابلنا عمو ممدوح جارنا
قام قايل لبابا امبارح اشتريت اسلاك كهربه البكره بـ 400 جنيه
الكهربائي احتاج تاني رحت اجيب النهارده لقيت البكره بـ 565 جنيه
يعني في 24 ساعه البكرة زادت 165 جنيه
ودي كانت الصدمه التالته
وزي مابيقولوا التالته تابته
وضربتين على الرأس توجع
بابا اللي طول عمره ضغطه عالي
فجأه ضغطه انخفض جامد واغمى عليه و.... الخ

وبكدا الحمدلله مصر باقت آآآآآآد الدنيا
ومش هنبقا زي سوريا والعراق
كلها شويه والدنيا كلها تقول مش احسن ما نكون زي مصر