[انجي_1]

طريقة "المكرونة بالباشميل بالفراخ" ناس كتير بتحبها باللحمة المفرومة. لكن تعالو نجربها بالفراخ طعمها حلو ومختلف!.. هانعملها بطريقة خفيفة بدون دهون كتير..الطريقة أهيه بخطوات سريعة وسهلة جداً!..
اول حاجة نسلق الفراخ.. الفراخ ممكن نجيبها فرخة كاملة مخلية او نشتري وراك او شيش أحسن عشان تبقى طرية وتستوي بسرعة. الفراخ تكون مغسولة بالملح والخل اواللمون ومتنضفه بدون جلد. نشوحها بسرعة في معلقة زيت وقبل ماتلزق نحطلها ميّه سخنة ومعاها بصلة كبيرة وملح وفلفل ورشة قرفة وورق لاورا وحبهان ومستكة وممكن رشة جوزة الطيب ونسيبها تستوي عالنار لحد ماتستوي خالص.او ممكن تسلقوها بالطريقة اللي تحبوها.
بعدين نسلق نص كيلو مكرونة اي نوع تحبوه.. ممكن نستعمل penne او سباجتي.. الأولاد بيحبو السباجتي. نسلقها تقريباً نص سلقه.
ونعمل الباشميل.. بطريقة سهلة وسريعة.. هانحط اربع كبايات لبن حليب وندوب فيهم خمس معالق دقيق وملح وفلفل ورشة بودرة بصل ورشة بودرة توم.. ونقلب عالنار لحد مايتقل ويبقى باشميل. (ممكن نعمل الباشميل بكبايتين حليب مع كبايتين شوربة سلق الفراخ)
ودلوقت نفرد معلقة باشميل في قالب الفرن ونحط المكرونة متقلّبه مع الفراخ وممكن عليها جبنة موزاريلا مبشورة ونقلبهم ونحط عليهم الباشميل وعالوش رشة جبنة تاني وبقسماط عشان الوش يحمر. ندخلها الفرن لمدة نص ساعة لحد ماتحمر. وناكلها مع سلطة خضرا وسلطة فاصوليا خضرا مثلاّ.
بتحبوها باللحمة ولّا الفراخ أكتر؟!
.
.
..