[طارق طروق]

النهارده الصبح وانا رايح الشغل امى قالتلى اعملك غدا ايه يا طارق
قولتلها بصراحه نفسى فى البصاره بقالى كتير مكلتهاش قالتلى
من عيونى يا حبيبى ومعروف عنى فى الشتاء انى بحب البصاره
وشوربه العدس الاصفر والعدس وكدا والكشرى المصرى
المهم امى كانت صلت الفجر ومجلهاش نوم قولتلها قومى ريحى جسمك ونامى
قالت لا مش جايلى نوم جهزت ليا الفطار عباره عن بقسماط مع بديفور وكوبايه شاى بالحليب
واغمس بقى واكل كام واحده بقسماط مع كام واحده بديفور والحمدلله على كدا وفل
قولتلها اوعى تنسى تقلى فلفل شطه مع بتنجان قالت ماشى متخافش مش هنسى
روحت الشغل عادى ولما رجعت من الشغل وبعد ما استحميت مش هقول اخدت شور والكلام الاتيكيتى ده
قالتلى اجهز لك الاكل قولتلها ماشى لقيتها جيبالى مكرونه وكفته وسلطه انا بصيت للأكل وتنحت شويه كدا
لقيتها بتقولى اصل حصل موقف كدا هقولك عليه بعد ما تاكل قولتلها مش هاكل الا لما تقولى الموقف قلقتينى يا امى فيه ايه من فضلك؟ قالت طبعا انت اكيد مستغرب ليه معملتش بصاره اصل عملت البصاره وحطتها على البوتاجاز ووطيت عليها النار بس نعست وانا قاعده ونسيت البصاره على النار وصحيت على ريحه الشياط
البصاره نشفت واتحرقت على النار ولجل ستر ربنا شميت ريحه الشياط بتاع البصاره لما اتحرقت وجريت على المطبخ وطفيت البوتاجاز وبسرعه حطيت الحله فى الحوض وفتحت الميه عليها
معلش حبيبى هعملهالك بكره ان شاء الله قولتلها ولا يهمك اهم شىء سلامتك يا امى
انا اللى اخترت وقت مش مناسب وخصوصا انك منمتيش وكدا
بس المره الجايه هعلمك ازاى تعملى البصاره لما تكونى نايمه ونعسانه وهتطلع زى الفل
قالتلى انت كل حاجه تاخدها كدا عادى وتهريج يا واد قولتلها يابت بهزر معاكى
حكم انا وامى واخدين على بعض اوى والدليل على كدا قالتلى بت تبتك يا مجرم يا قليل الادب
اصلك مش متربى حد يقول لأمه يابت؟ قولتلها بصى مش ههرج معاكى تانى عشان التهريج بيقلب بضحك
راحت ضحكت وانا ضحكت وراحت عليا البصاره واااااااااااااااا بصارتاااااااااااااااااا