بتبكي عليا
بتبكي عليا بين نفسك وبينك
وقدامي تداري الدمع ف عينك
باينة ف عنيكي دموع الندم
هاينة عليكي اهاتك والألم
قلبي بريء قلبك هو المتهم
كل مشاعر الحب رافضة فعلك وبتدينك
ظلمتي قلبك ولسه بتداري حبك وحنينك
بعد ما خسرتيني وفقدتي الأمل
اتغير تعاملك مالياكي الحيرة والملل
إنتي اللي حكمتي على حبنا بالفشل
بصدك ليا بكدبك عليا بعصيانك وطاعة شياطينك
ده انا كنت بحبك كنت اقرب لقلبك من قرينك
مبسوطة دلوقت إني عشت ف حب تاني
ضحكتك مش هي دي ضحكة قلب بيعاني
مقدرش اسيبها دي سابت كل الدنيا عشاني
تشبهك جدا بحبها جدا انا آسف م اقصدش اهينك
انا كنت فاكر إنها إنتي بس في الحقيقة فين هي وفينك
هي إنتي يا حبيبتي هو انا اقدر احب بعدك
هي اللي بتفضل جنبي وقت عنادك وبعدك
صورتك اللي راسمها ف خيالي
قلبها حاببني وحبي عنده غالي
واهي ساعدتني اوصل لقلبك الخالي
بانت محبتك قالت دمعتك قد ايه انا غالي عندك
زادت غلاوتك اختفت قساوتك من القلب طلع ردك
يا حلاوتك لما ضحكتي ضحكت الغمازة فوق خدك
لا صورة ف خيالي تاخدني منك
ولا أي سبب يبعدني ف يوم عنك
ولا دمعة تبكيها عليا اطمني أنا جنبك وليكي لوحدك
شـــــــــــــــــــــــــــــــــ . حــــــــــــــــــــــــــــــــــ
|