ليالي زمان في ليالي زمان كان السهر ليه معنى
كانوا الحبايب جنبنا كان الحب يجمعنا
دلوقتي حزينة الليالي نسهرها تملي بدموعنا
لا حبايب لا قرايب ولا حد نحكيله ويسمعنا
مع نفسنا احنا وجرحنا حاضنين آلامنا واوجاعنا
ليالي زمان كان الحنان والحب غير
تبص في وشوش الناس تحس الدنيا بخير
دلوقتي بنبكي على أيامنا وعلى الحب اللي ودعنا
لو نبص قدامنا نلاقي واحد معانا وكتير ناس تخدعنا
نفس الليالي نفس الوقت اللي كان زمان
بس اللي اختلف فيها التفاصيل
غابوا الأحبة وكل واحد منا بقى ف مكان
واللي فضلوا شاطرين في التمثيل
كانت حلوة ليالينا قبل ما تبقى الغربة عنوان
كان عندنا حكايات و أمنيات وحلم جميل
الحلم تبخر الفرح تأخر العشرة هانت والود هان
العمر فات مش فاضل ل نهايته غير وقت قليل
عودي يا ليالي ارجعوا يا حبايبي بإيدينا نرجع أيام زمان
مكانكم في القلب باقي ملناش عنكم غنى ولا بديل
خلونا نلم الشمل حبايب واخوات وأهل قبل ما يفوت الأوان
ترجع ليالينا الحلوة لو نرجع سوا يرجع كل شيء جميل
ش . ح
|