[ahmed 22]

مش واخد بالك انت ان الرئيس كان بيمهد للموضوع ده من ساعة ما مسك البلد
وكان كل شوية يطلع راكب العجلة بتاعته وبيعمل مارثون
او بيتفسح مع البودي جارد بتوعه وكدا ويتواضع ويتصور مع الشعب وكدا
هو الفكرة انه لما يحرر سعر البنزين هيركبنا العجل عشان صحتنا
صحتنا اهم .. احنا نن نور عنيه من جوه .. انت بس مش واخد بالك

انا عاوز اكلم الصراحة كتيررررر وبدون ترتيب وموضوعك يمكن فتح المجال ده
لاني من فترة كبيرة بطلت كلام في السياسة او حال البلد وكدا
هكتب لمجرد الكلام ليس الا ... وحظك بقا انه جيه في موضوع حضرتك

ما علينا
المفروض ان الكلمتين اللي انا كتبتهم فوق دول اللي في قلبي والله فعلا
عاوز اسخر واتهكم علي وضع الدولة واللي وصلتنا ليه برئيسها بحكومتها
لأني شايف الناس بتعاني كل يوم بسبب متغيرات الغلاء والاسعار
اللي بتحصل كل يوم وبتسبب حالة ركود للسلع وخصوصا في مجالنا بتاع
التجارة وكدا ... وكمان الرواسب اللي بجانب الركود كزيادة التكلفة وكترة
المصاريف اللي كل يوم الدولة بتزيدها علينا لدرجة لا تطاق ...
احنا في زمن فعلا بقا ماسخ .. مابقاش فيه فرص أنك يكون عندك طموح
وتحققه ... ولا حتي عندك الفرصة أنك تبص قدامك شبرين ..
افكارنا متحددة اقامتها لندرة الفرص .. اللي محتاجة دايما طريق شمال
عشان تتحقق ... والأدهي من كدا أن الافكار بدأت تدبل والزمن بيحتكرها
لنفسه وفي وسط كل الف شخص ممكن 2 بس اللي ينجحوا ويوصلوا
علي حساب الباقيين اللي بيتفرجوا او علي حساب فشلهم وعدم قدرتهم
عالاستمرار .. لأن فعلا انك تنجح في مصر معناه أنه غيرك لازم يفشل عشان
انت تقدر توصل وتقدر تعلي بالكارير بتاعك ...

بس انا واحد من الناس عايش في صراع رهيب بين افكار كنت بتبناها
لما كنت لسا بدرس ومتحمس اثناء الثورات اللي جصلت اخر 8 سنين
وواقع حالي لما بدأت اشيل مسؤلية او بفكر اعمل حياة ليا وكارير وكدا ..

من كام سنة الثورات دي خلتني افكر بأشكال مختلفة وكان عندي وقتها توقع للشكل
اللي هتعاني بيه الدولة وللامانة يمكن انا كنت متوقع شكل اسوأ من الموجود
حاليا ... اه والله .. وكنت شايف ان ده الطبيعي والمنطقي يعني ..
لأن كل المجاري اللي كانت مستخبية هتطلع عالسطح ..
وكل الكبت اللي كان لسنين بقا ليه مكان عشان تنفخ فيه وتطلعه بقا ..
سواء علي ابوك ولا عالدولة ولا علي اي نظام هيحكمك ..

وبرضه كنت بتشوف ناس بنقعد تقول بقا الكلام اللي احنا كنا حافظينه ايامها ده
اللي هو طبيعي البلد لازم حالها يكون سئ
عشان بعد ثورة وتغيير نظام واحنا كنا عايشين علي المسكنات
اللي الحكومة كانت بتديها لينا ومافيش مجال للتطور ولازم نستحمل
ولازم نعرف أنه لازم هننجح في يوم والكلام ده ونقعد نقول طب فاكرين
الثورة الفرنسية واللي حصل فيها واحنا لسا قدامنا عالاقل عشرين
سنة عشان نقوم من مكاننا وبتاع ... اعتقد الناس ممكن
تفكر نفسها بالكلام ده ...

طبيعي انه يكون فيه فوضي سواء فكرية او اجتماعية او امنية بعد ثورة .. وكدا
امتي نقطة النظام هتتحط .. ده كان شئ في علم الغيب
في وقت كانت الناس كلها بتتصارع علي مين هياكل التورتة الأول ..
مع اني ماكنتش شايفها تورتة يعني ايامها والله ..

وده كله كان طبيعي يؤثر علي الشكل الاقتصادي للبلد
وان التراكمات بتاع الثورتين دول كفيلين انهم ينهوا مستقبل الجيل الحالي كله
لأنه اي حد دارس او قاري عن الاقتصاد ويعرف عن التضخم و تصنيفات ومعدلات التنمية والفجوة اللي اتصنعت ما بين مصادر الدخل والصرف ...
طبيعي يفهم احنا فين دلوقتي وطبيعي يفهم ان احنا دولة مازالت علي حافة الافلاس وطبيعي يفهم ان احنا ماعندناش الوقود الحقيقي لأي شعب وهو
التعليم اللي ممكن يكون سند لينا في وقت زي ده انه عالاقل نكون فاهمين
لأننا في المركز قبل الاخير من حيث مستوي التعليم
علي مستوي العالم ... وطبيعي يفهم انه الاجراءات الاقتصادية جزء منها لازم
يكون غبي ولازم يأذي ايا كان مين اللي هيصدرها سواء السيسي ولا البيسي ...
الفكرة بس كانت في مين عنده الشجاعة انه ينفذها ..
انا بس كل اللي مزهقني من البلد دي أنه ماشفتش واحد فيها
ابن حلال طالع كدا يعمل شئ ثوري في التعليم او عنده مشروع
يبني من خلاله ركيزة واساس للأجيال الجاية انها تحب تتعلم ويتقدملها تعليم صح .. ومن خلال ده تحب تشتغل عشان تلاقي مقابل صح مقابل رغبتها
في أنها تشتغل عشان بتحب الشغل مش عشان مفروض انها تشتغل عشان
تاكل وتنام ... فرق كبيررر جدا في الثقافة دي ..
فرق بين السما والأرض .. في اليابان عندهم احصائية سنوية
لناس بتموت بسبب الافراط الزائد في العمل ...
احنا هنا الناس بتموت بالقلب والسكر بس ..

لأن الاجيال اللي قبل كدا كل همها في الحياة انها عاوز تعيش النهاردة بس
ورسخوا ده
وماشيين بمبدأ عيشني النهاردة وموتني بكرة ...

بس المهم التورتة وصلت لحد مستر بريزدينت سيسي .. الطيار بتاعنا حاليا
اللي بيقود السفينة .. هو العرف بيقول ان المفروض القبطان هو اللي بيقود
السفينة .. بس احنا غير الناس كلها معانا طيااااار بيقود الطيارة بسرعة 6 ريختر في الثانية .. لدرجة ان الطيارة وقعت منه
في البحر لقا الركاب بيولعوا .. سابهم وراح يعوم لقا سفينة ركبها ومن ساعتها وهو مدلدل رجله في المية الساقعة ..
وساب الركاب مولعين كلهم في الطيارة ...

بس ما علينا من قصة حياته
انا قناعاتي العقلية بتقول انه صح لما دلدل رجله في المية الساقعة
انما الحياة والدنيا محسساني انه ولع في البلد والناس وفيا انا شخصيا هههه

قناعاتي من كام سنة كانت بتقول انه عشان نتقدم ونكون احسن لازم تكون الحلول قاسية
سواء بقا هيقدمها السيسي ولا اللي بعده .. يعني انا متأكد انه الطبيعي
انه لازم نعاني ...
ومش عاوز ادخل في تفاصيل محددة ... ايا كان ...
بس هوا لغباء بس من مستر بريزدنت سيسي هو وحكومته
انه بيفاجئوا الشعب بقسوة حلولهم وبمشرط جراح غشيم
وبدون مقدمات واضحة
الله أعلم يمكن الايام تثبت ان اللي بيعملوه ده صح ..
ما هو حاجة من اتنين
لاما بعد عشر سنين من دلوقتي
نلاقي احمد موسي بيحتفل بعيد ميلاد السيسي مؤسس مصر الحديثة
بعد محمد علي زي ما هيطبل برضه وقتها
لاما نلاقي الذكري السابعة لثورة 14 نوفمبر 2020

انا زهقت الصراحة ومليت من الكتابة
مع ان كان فيه كلام اهم ممكن يتقال
العذر منك يا مارد لو بوظت الموضوع ..