منذ /09-02-2018, 09:01 PM
|
#1 |
مشرف الابداعات الادبية سابقا
| فجور.. بتقول فجور!!
مين اللي قال
انت الضمير!!
فين الدليل
فين الحبال!!
مجتشي ليه كتفتني
مستني مين هيردني
ده انا جيتلك انت وسبتني
وأنا أرضي بور
ماتت بذور
أنا وانت كنا ف أرضها
حراس بنحمي ف زرعها
وبنروي عطشه بدمنا
ولقينا غاوي
يحكي الحكاوي
فوقفنا عنده وشدنا
ولقينا حور
م الجنة عين
جايين يغنوا ف حينا
يا مؤمنين...فينا الصلاح
فعلا ملاح
يستاهلو ياخدوا عمرنا
بتقول فجور
ابنيلي سور
أو غمي عيني وشدني
عكازي يمكن يتكسر
أو ييجي حد يزقني
تاه الدليل من سكتي
وبقيت وحيد
وهلاقي ايد
أو الف ايد تتمدلي
وهلاقي نور
جواه قصور
وبريق بيخطف مهجتي
وشهودي زور
واقفين طابور
بيداروا عني دنيتي
بتقول فجور
عديت بحور
ومشيت طريق فيه العجب
ولبست توب فضة ودهب
وبقيت ملك
والدنيا جارية ف لعبتي
صبح الوهن
جاب العفن
وبقيت أسير في دنيتي
بتقول فجور
فعلا فجور
خليك صبور
واشتد فيا وشدني
واقطع حبال بتصدني
أنا روح فيك..ما تردني
قبل الوعيد
أو يوم جديد
ألاقيني فيه من غير ضمير.
التعديل الأخير تم بواسطة فداااااااااااء ; 09-03-2018 الساعة 02:21 PM
سبب آخر: وسام التميز
|
| |