[ahmed 22]

في الايام اللي زي دي كدا تلاقي غالبا كل مشكلة بتوع مديرين المبيعات هي قلة البيع و لما دايما يجتمعوا مع المناديب او السواقين ويسألوهم غالبا عن اسباب قلة البيع بتلاقي الحوار كالتالي :

في اليوم الأول / ليه الدنيا واقعة كدا
يا باشا اصناف كتيرة ناقصة ومطلوبة مش متوفرة ( مع ان الاصناف دي لا تمثل 5 % من البيع )
في اليوم التاني \ طب احنا جبنا الاصناف ليه واقعة
حضرتك جبت الاصناف بعد ما غيرنا نزلها في السوق وادينا راجعين بيها اهو
وبعدين يا باشا الاسعار في السوق متبهدلة وناس كتير بتحرق ( مع ان معاه 25 صنف ومافيش غير صنفين بس محروقين عشان اصلا هما السحب عليهم قليل كدا كدا )
في اليوم التالت \ ليه ام البيعة بايظة
يا باشا هو اصلا السوق نايم والناس حالها تعبانة ( مع ان هو كدا كدا انت هدفك بينزلك بنسبة علي اساس هبوط الموسم يعني لو موسم الصيف النسبة 20 % في الشهر في الشتا بتكون 5 %وكل شئ بيكون مبني علي أنك تجتهد اكتر )

لو هنيجي نلاحظ موقف زي ده هنلاقيه متكرر وتقريبا تحسوا سيناريو بيختلف فيه الاشخاص بس الكلام غالبا واحد ..
ضعف الحيلة او قلة الاستيعاب لمتطلبات الحياة عامة عشان تكون افضل بتخليك دايما عايش جو المبررات
وفي نفس الوقت ..احيانا لما تيجي تبيع بتنسي ان في مشتري اللي هو صاحب المحل اللي بتسوق ليه منتجك بيصدرلك مشاكلك لأنه برضه بيواجه مشاكل في بيع منتجك ..
وانت بتاخد كلامه بسبب الضغوط عليك من مرؤسيك علي انه مسلمات وبيخليك تتجاهل الاهم .. بمعني انه زي ما انت عندك مشاكل
في أنك تبيع المنتج وبتطلع مبررات لرئيسك .. المشتري كمان مقتنع انه لازم يظهر بصورة حلوة قدامك
فلازم يطلعك احيانا ان انت اللي عندك النقص عشان البرستيج بتاعه .. يعني ممكن مايكونش حد عرض عليه
سعر اقل .. بس لازم يرميلك كلمة كدا يخليك تلف حوالين نفسك يومين ..
لحد ما ترجعله مرة تانية وتنزله بسعر اقل ويكون هو خلص القديم اللي عنده ..
ويبقي استفاد من الناحيتين ... هو شاطر .. زي ما انت برضه بتتسلي علي الشركات اللي بتصدرلك بضاعتك
عشان تاخد منهم أي حافز زيادة ..
ممكن هو محروج انه بقاله فترة منزلش منك .. فيدخل كدا يبص علي العربية اللي عليها
المنتجات بتاعتك ويشوف بعنيه كدا .. ويشوف ايه اللي مش موجود ويطلبه منك ..
وكل الهدف انه يأخر عملية البيع ليس الا ... هتلاقيها مشاكل منبعها
قلة الصدق في التعاملات .. وفي نفس الوقت
قليلين اللي تلاقيهم صادقين وغالبا بيكونوا متعذرين او شغلهم علي قدهم .. مش باكيين علي حاجة عشان يكدبوا .. بس دول دايما بتوصلهم في المرحلة التالتة
وعند السؤال التالت عشان انت عارف انهم هيستنوك عشان مأمونين وده بقا عيبهم في مجتمع غبي..
بس لحد ما توصلهم بتاخد وقت لأنك دايما بتاخد اللي علي الوش الأول
الكداب .. والمدعي .. والمنافق .. واللي يحب يسرقك عشان انت حابب بعته ..
او اللي بتحب انت تسرقه وتزود عليه السعر عشان بيعته قليلة فمش مكترث انك توصله
الا في المرحلة الأخيرة عشان تستفيد لشخصك بعيدا عن مؤسستك وعلي حساب صدق المحترمين معاك ...

المهم ان الاسباب بتتصدر ليك لحد ما توصل للحظة صدق ..
ولحظة الصدق بتظهر ليك واللي بيحاسبك ان الكذب طريق لتعاملاتكم ..
بس ولا انت بتصرح بده ولا مديرك بيصرح بده ولا اللي بتبيع ليه بيصرح بده..
وكله بيتعايش مع الكذبة ..

بس الفكرة ان المبررات موجودة ومنطقية بس نسبتها كام .. وانت اقتنعت انها فعلا مبرر مقنع
ليه ... هل لأنك محتاج أنك تشيل من علي نفسك حمل المسؤلية ..
ولا هو مجرد روتين متبع انت شوفته من غيرك فبطبقه عشان تعيش
والحياة تستمر وتحافظ علي اكل عيشك .. لأنك عارف انه محتاجك زي ما انت محتاجه
وانت برضه عارف انك عايش الي حد ما في وطن عاطفي شوية وفي نفس الوقت ضعيف الحيلة
في اغلب الاحيان ناس كتيرة بتخاف تقطع الارزاق ,,
وفي نفس الوقت كله بيخاف يبدأ من جديد بسبب ضعف الحيلة
وبيخاف يهد القديم لو بعيوب علي حساب انه يجيب شخص جديد و يعلمه من الأول ..
الناس مقتنعة ان المعيوب اصلح عشان محافظ علي مكانه لأن اللي جاي بعده
صعب يستحمل ظروف البيع بحكم مسؤلياته من حفظ ناس وعشرتهم والمام بالسوق
ومنافسة مستمرة من غيرك وحاجات كتيرة ..

الفكرة أنك انت لما تبدأ دايرة المبررات .. عمرها ما بتنتهي وممكن تاخدها وتلف بيها بلدك كلها
طالما كل شئ اتبني علي وضع غلط ... ولما تبدأ المبررات بتظهر معها بعض صفاتها
وهو أن قلة اجتهادك خلقة مبرر والمبرر خلق ضغط والضغط عمل كذبة
والكذبة عملت ناس بتدعي شئ هما مش عليه .. والكذبة خلقت ضعف حيلة
وضعف الحيلة خلاك ترضي أنك تسرق علي حساب انك تجتهد ...

لف بالدايرة هتلاقيها واحدة طول ما الخلل في تكوينة شخصيتك
اللي اتربت علي وضع غلط ...

اخلق مبررات في أي موقف وهتلاقي دايما أن المبرر دايرته بتكبر لدرجة انها
ممكن تغير مبدأ في دين .. اوتحول سلوك حميد لمجتمع مريض ..

لما تلاقي ناس بتهاجم المنقبات هيقولك المبرر الرئيسي في الهجوم
أن في عمليات ارهابية بتحصل نتيجة تنكر البعض في زي المنكرات ..
تمام .. طب الغي الزي العسكري او الشرطة .. في برضه ناس بتتنكر بيه ويقوموا بعمليات ارهابية
طب الغي ازياء التعري .. ما هو اكيد في مسؤلين بريالة اكيد زي ما في مسؤلين محترمين لو واحدة بس
دخلت عليه دور اغراء هتخليه يفشي كل اسرار الدولة في ليلتين ... والا ماكنش في حاجة اسمها الجاسوسية مثلا .. يعني الغي حاجات كتير وازياء كتير ومهن كتيرررر وبعدين طالب باللي انت عاوزه ..

هو الضرر عمره ما كان ليه شكل واحد .. عشان تحصره انت في زي منقبة ..
عشان انت حاليا في صراع مع جماعات دينية متطرفة فتلاقي نفسك فجأة حولت الصراع
لشكل قانون بتطالب انه يتخلق لمنع النقاب ..
عشان اصلا اغراض جواك انت مخلياك تنفر من النقاب خلقت بسببها مبرر تقدر من خلالها
تحارب بيه جابهة كاملة من البشر عندها اقتناع بمبدأ انت كارهه ...
لأنك عكسه مش اكتر ..
لو الدنيا اتقلبت بكرة وانت مكانهم وطالبوك انك تلبس زيهم كنت او تتخذ منهجهم
وعاوزين يجبروك بكدا بقانون .. شوفك موقفك كان هيبقي ازاي ..
عشان كدا فيه حاجة اسمها حرية وليها اسس ..

الفكرة عمرها ما كانت في زي .. طول عمرنا مشكلتنا في دماغنا ..
اللي بتخلق من اتفه الاشياء أعظم المبررات ...

قيس كل شئ حواليك غلط بمبرراتهم وهتعرف أن البشر أغلبهم عايشين نكتة أكبر
حتي من دماغهم ..