[ahmed 22]

ايقاع بطئ بيرمم تفاصيلي
لحد ما سكتي دابت...
اعاهد كل يوم نفسي
وادعي أني أكون ثابت...
وانام والهمة واخداني
وصوت وجداني جداني ..
مستني قرار بكرة في قيد تنفيذ
*
وبصحي من جديد بدري ..
تاخدني العادة بزيادة ..
والفجرية بتعدي ...والضهرية بتنادي ..
وبرضه نمت بزيادة ..
وانسي اني كنت متعاهد من امبارح
وبرضه بأجل المكتوب
ومش بخطي ..
وبرضي بدوري في الدنيا وبختار
أني أكون مظلوم ..
وعشت الدور واتقنته
فاقوم واشكي
و من زمني مليته سطور ,,
ومش ببكي ..
مافيش دمعة بترضي تصالح
خدود جاحد في دور مظلوم..
*
تملي اليوم بيجري ويعدي
وبرضه برمم الصورة
وانحت فيها تفصيلة ..
توضح كل لحظة زهد بتعدي
مع نسمة هوا صافية .. تفكرني
ان نور الشمس بيصالح
ولو أنه ماهوش باقي ...
مصيره يسيبنا أخر اليوم
والاقي في غربته دائي..
*
وارجع تاني ادور علي ضحكة
فاقول واضحك علي نفسي
ده ضوء الشمس لو ثابت
ماكنش فيه لمبة تبقي نيون
ماكنتش عنينا شافت نوم
ماكنتش للسما هنظر ..
ولا اتفاعل مع نجومها ولا أشكيلها
ولا حتي اعاتبها ..
علي كدبة حكايتها مع قمرها
وان جماله كان معدوم...
ظلام كاسح بدون أمل في نقطة نور
ارضها بور ..
*
وتسترها شمسها بضوئها
وبرضه شاعرنا يزغرها بكام بيت شعر
يتغني بأطيافها وينسي اصلها بكدبة
ويبني بيها أحلامنا بدون رحمة
وان شهابها لما يعدي بيحقق أماني
طفلة بتبص لسماها
تتمني امها ترجع من سما غيبها
وما بترجعش ..
أو يبني بيه حكاية نور ما بين عاشقين
وتبقي نجومها مرسي لهوي روحهم
وينسي بحكم البور
أن بكرة هتبقي مرسي لجروحهم ..
*
ما بين الاتنين طريق واحد محله الروح
بتتفكك لما تعيش كدبتها بهواها
بدون معني .. بدون مسعي
وينسي ايمانها بجروحها
وان مسيرها هتتعدل بدون كذبة
بدون ما نخلي للضلمة بدلة نور
مسيرها شمسها تشرق
واعاهد نفسي من تاني
وازود من ايقاع بكرة
لحد ما اعيش في يوم غير يوم ...