[ahmed 22]

في يوم كنت بقرأ لقاء صحفي قديم لقيته بالصدفة مع عبد الرحمن منصور
اللي هو صاحب فكرة انشاء صفحة خالد سعيد
ودخل الجيش قبل الثورة بكام يوم
وبالتالي وائل غنيم خد الصورة كلها ويمكن ده من مصلحته يعني ...
المهم مش ده الموضوع ..

هو شخص مثقف عامة ودماغه حلوة وده واضح من اجاباته ...
فالرجل اللي بيعمل معاه اللقاء سأله فيما معناه يعني
هل انت نادم عن انك صاحب اشعال الشرارة الاولي للثورة وكدا ؟

المهم الرجل كان جزء من إجابته كالتالي كما اتذكر ____
قاله اكيد لاء .. فلا يمكن ممارسة الحكمة بآثر رجعي فالقرارات يتم اتخاذها بناء علي المعطيات وقتها ...
وبالتالي المعطيات وقتها بتقول فيه فساد ومواصفات دكتاتور حكم 30 سنة
وفيه مؤشرات انه عاوز يورث ابنه بعده .. يعني لازم يكون رد فعل ... يعني لازم يكون في ثورة من الاخر ..
دي المعطيات ببساطة اللي في الوقت ده اتعمل عشانها ثورة ..

طبعا انا مش هكلم علي الثورة ولا حاجة
ارمي الكلام اللي فوق ده علي جمب حاليا ...

من كام يوم فتحت الفيس بوك لاقيت منشور كدا من الجماعة بتوع المقولات وكدا ..
وكان كالتالي :

يقول افلاطون : اذا تجاهلك شخص فهو يطلب منك مغادرة حياته
لكن شكسبير قال " اذا تجاهلك شخص فأعلم أنك الأهم

ايهما الأصح ؟؟

طبعا ده سؤال كانت اجابته بالنسبة ليا في اجابة اللقاء اللي فوق ده بتاع عبدالرحمن منصور
ازاي ماعرفش .. بس هو كدا طالما قررت اعمل موضوع يشمل البوقين دول مع بعض
فقلت لازم اربط بين ده و ده ..
ازاي برضه مش عارف .. بس قلت هشوف ..
والله لحد كلمة هشوف دي ما عارف اكتب ايه لسا ..

ده قادني في النهاية ان في اللحظة دي
اسأل لجوجل سؤال وجودي ..
وهو كيف تصبح حكيما ؟
اول رابط ظهرلي دخلت فيه وقلت اقتبس منه لكلمتين دول

في سعيك للحصول علي الحكمة
يجب ان تعي ما يجب قوله من الكلام أو تركه، وما يجب فعله من الأعمال أو هجره،
وقياس ذلك بالزَّمان والمكان والشُّخوص، فما يصحُّ في موقفٍ يتعطَّل في غيره،
وما يُنطق في زمنٍ يُعاب في غيره،


ده كلام كبير
خلاني اسأل جوجل تاني ايه هي فلسفة افلاطون
عشان اعرف اللي قاده لحكمته اللي فوق دي ..
بما انه يعتبر احد الحكماء اللي كتير بياخدوا برأيه
فايه اللي خلاه واعي لكلامه ده و ايه مواصفات زمانه والشخوص واسلوب حياته

المهم لاقيت انه فلسفته تعتمد علي العقل بشكل تام
بدون الاعتماد علي الحواس في الربط بين الكيانات المتنوعة ..
الكيانات اللي هي الدولة والمجتمع والناس ..
يعني من الاخر العقل المنزوع العواطف والباقي مجرد جماليات
حد تجاهلك يبقي مش طايق اهلك .. هي خلصت علي كدا

بالنسبة لشكسبير فهو شاعر وكاتب وممثل وعاشق ..
يعني مش محتاج اني ادخل اشوف سيرته الذاتية
عشان اقول انه يعتمد علي الشاعرية والعواطف المتأججة والفرص التانية في كتاباته ..
يري الحب في ابسط الامور والتفاصيل ..
يعني من الاخر
هو تجاهلك ولا ماتجاهلكش هو بيحبك غصبن عنك وانت مهم عنده..
ايش عرفك انت .. هي رخامة كدا ..
وطبعا رخامة شكسبير هي اللي خلتني اكتب الموضوع ده ..
لاني قلت برضه الكلام اتربط مع بعضه ولا متربطش هو هينكتب هينكتب ..

فتلك هي خلفية شكسبير ..
تلك هي حكمته .. كما هي حكمة افلاطون اعلاه .. من خلال سنوات طويلة
آمنوا بأفكارهم اللي هي انتجت ارائهم المطروحة علينا في الوقت الحالي ..
بشكل متناقض في بعض الحالات ..
وطبقا لطريقهم المنفصل وزمنهم ومكانهم المختلف
فهذا فليسوف وهذا شاعر واديب
هذا عاش في اثينا القديمة قبل الميلاد ب 400 عام ..
وهذا لم يمر علي وفاته سوي خمس قرون ..
هذا عاش يؤسس لأركان المدينة الفاضلة وبالتالي العدل والصلاح
كانوا بمثابة جماليات لفلسفة تلك المدينة
اما هذا فعاش يكتب عن العواطف الانسانية والنبل
الدفين في الانسان ..

بالتالي
كلا منهم هو ابن واقعه ومعطياته ..
وبالتالي
كلا منا كأشخاص هو ابن واقعه ومعطياته
التي يبني من خلاله قرارته التي
توضح مدي حكمته في الحياة
طبقا لتجربته ..
وبالتالي
لن تكون الإجابة واحدة بالنسبة لكل شخص منا
اذا خص الأمر المشاعر الانسانية ...

أيهما أصح ؟
ليس السؤال الصحيح ..
بل ايهما أنت في قصة حياتك

فهذا ما يجب أن تبحث عنه ...

وبالتالي مقولات الحكماء لا تأخذها باثر رجعي طبقا لحياتهم
بل اختار منها ما يناسب حياتك أنت بمعطياتك أنت ..