انا حاسس بيك
لحظة قبل النوم
في حياتك
دايما سادة
شكك دايما وارد
في نقاء قلبك
ألمك سالب منك
عقلك ...
بره حدود الكون ده سعادتك
انت حكاية في حكم الغيب
بس قريتها بعلم سعادتك
أنت المعني وأنت الكلمة بحكم غباوتك
شايف نفسك غير الناس
قافل زنزانتك بمرايا
فسبحان الخالق في مرايته
لما تكون معدوم المعني
بتشوف نفسك
دايما هايب
دايما هارب
دايما شايف نفسك قصة
من غير قافلة
دايما فاتح شباك أملك
عكس القبلة
دايما ثابت
بخيال هايج
كلك شهوة ..
أنا حاسس بيك
حاسس بيوم قررت فيه تبنيه
طوبة ورا طوبة
وقدرت تكمله بشيطانك
وفي لحظة
ما بين قتيلك وسجانك
قررت تعبد فيها تمثالك
ومن يومها
دايما تناديك
همسة خوف من بكرة
بذنب امبارح
لابس أبيض
من جواك
اسمر مادح
دايما ناسك جوا الصورة
فاضح قلبك بره الفكرة
عامل عاملة ..؟
قاتل لعبة ؟
قلبك جوا في سجن مشدد
حابس نفسه بكبرك يا أعمي
دايما عكس الصورة الحكمة
لما تكون مسلوب النعمة
نعمة أنك تصحي في يوم ندمان
أنك تقرا سطورك واضحة
فاهم الفكرة ؟
عالهادي
أنا حاسس بيك
بس أملي عمره ما كان عليك
مؤمن بيك
بس ليا مش ليك
شايف فيك العبرة
وأنت مستني نفسك تلاقيك
ثقتي فيك بس مش بيك ..
اهلي ليا بس مش ليك ..
عمري ليا .. بس عمرك بيناديك
همسة ليك
مافيش بشر مستنيك
اهدم تمثالك
عشان ربك يديك ..