[ahmed 22]

حابب اعدل اكلام قلته وفي نقط بسيطة من غير اطالة فيما يخص الكورونا :

1 - أنا لازم اعتذر زي ما ناس كتير المفروض تعتذر
لما بنكلم ان نسبة الوفيات في الكورونا قليلة ومعظمها من كبار السن او المصابين بأمراض مزمنة
كتهوين للوضع ..
و نسينا ان الناس دي هما ابونا وامنا او اعمامنا واجدادنا او مسميات كتيرة
وحطناهم في خانة الارقام والاحصائيات فقط .. صراحة حسيت فجأة بذنب كبير ..
حسيت ان احنا مجردين من الانسانية والحياة بالنسبة لينا
بقت مجرد ارقام وحسابات وبنقول الكلام من غير فهم. .. او انا يعني لو هكلم عن نفسي
قلت الكلام من غير وعي حتي لو كتير بيقولوه عادي كدا كأنه مجرد حديث عابر بدون شعور ..

لأن كل روح لازم يكون ليها وزن .. وليها اعتبار .. وولازم نشعر بيهم لما هما يتفرجوا عالكلام ده
سواء مريض سكر او ضغط او عنده امراض مناعية او كبير في السن ..
وانت بتقول كلام بمنتهي البساطة ان فرصهم في الحياة اقل
بمنتهي البرود وبمنتهي قلة التقدير ومتخيل انك فهيم ..
وناسيين ان هما وسطنا واحنا من غيرهم مالناش عازة وهما فينا واحنا منهم ..

2 - برضه لازم اعتذر عن نقل معلومة غلط بدون تدقيق والمفروض لما نكلم عن شئ مهم
يكون عندنا مسؤلية في الطرح ..
يعني مثلا لو حتي بطرح فكرة لمجرد الهزار او التهكم زي ما حصل في تعليق ليا في طرح مارد الغضب
ان فيه تقارير بتقول
ان الكورونا ممكن تكون مؤامرة من امريكا علي الصين ..
وتقارير مضادة انها مؤامرة علي الصين من نفسها لغرض اقتصادي.. يعني مجرد اطروحات

يعني في لحظة بننزع من العالم انسانيته ببوست وتقرير ...
و في نفس الوقت بنتناسي العلم اللي من خلاله بيكون فيه تحليل لتركيبة الفيروس ..
وبيتعرف يا هل الفيروس ده بفعل تطوره من خلال الطبيعة ولا متركب في معامل ..
وده بيتم اكتشافه بسهولة والمجتمع العلمي مش ساذج اوي كدا..
ولا الدول ساذجة اوي برضه انها تحارب بعض بيولوجيا بطريقة مكشوفة كدا .
وبالتالي نظرية المؤامرة هنا اصلا مرفوضة ... سواء هزار او جدا
عشان مانلهيش الناس عن المشكلة بالتفكير في حاجات خارجها لمجرد الاستهلاك او الجدل العقيم ..
لأن فيه مشكلة اهم .. لازم نستوعب انها موجودة ..

3 - الرعب اللي تزايد في العالم وتصريحات دول زي انجلترا والمانيا لازم يخلينا ننظر للموضوع بشكل مختلف
من مجرد الاستخفاف وان الموضوع بقا تريند للضحك والسف في مصر ..

لأنك تحس انهم عرفوا حاجة احنا مش عارفينها.. والخوف ان الفيروس نفسه يكون اتطور اوبياخد اشكال معقدة اكتر
لأن التصريحات غريبة والتطور في النسب في ظرف ايام بسيطة كدا بالطريقة المهولة دي فعلا
مرعب سواء من ناحية الاصابات او الوفيات .. انت فجأة بتوصل لألف اصابة في اليوم عادي كدا في دولة ..
والمشكلة حقيقية وحاسس باستهانة حتي من الحكومة في تبسيطها الامور للناس ..
صحيح احنا مش عاوزين الناس تعيش حالة فزع وهلع وده انا كنت بقوله من اسبوعين ...

بس في شعرة بين الهلع والحذر .. وانك مش عاوز تخلي الناس جزء من المسؤلية ... وانهم مسؤلين
بقدر الحكومة بل بطريقة اكبر كمان .. لازم تقول للناس بطريقة مباشرة ان المشكلة اكبر من حكومة وسياسة ..
مش لازم تحسسهم بأمان اكبر من اللازم ولا تخوفهم برضه اكتر من اللازم ..
صحيح فيه اجراءات بتاخدها ... بس انت بتاخدها كتابع للغير من دول مش من نفسك ..
وده شئ يخوف أنك ماعندكش حس المبادرة من نفسك ..
وزي ما قلت قبل كدا يمكن خوف الناس من قلة كفاءة الدولة في التعامل مع الازمات
.. بس دي امكانياتنا ولازم نتعامل مع امكانيتنا دي .. لأن مش من مصلحتهم اخفاء ارقام ..
وهما عارفين كدا وانا متخيل انهم مش خافيين ارقام .. بس الناس يمكن هي اللي مش بتروح
تقول انها مصابة لحد النهاردة ..... ومش هبالغ لو قلت
ان ممكن يكون ناس اتصابت وعالجوا الاعراض كأنها دور برد وخفوا عادي لأن نسب المناعة
بتختلف من شخص للتاني ... او يمكن الاعراض بتتأخر في الظهور ..

فالمفروض التوعية تكون اهم اسلحتنا سواء من شعب وحكومة ..
مسؤلية الحكومة توعية وحصر المرضي ليس اكتر ومحاولة علاج الحالات اللي بتظهر والعزل الصحي
ومع ذلك هتلاقي اهمال .. وهتلاقي اصلا داخل المنظومة الصحية كوارث .. لأن جانب التمريض عندنا
هزلي وفيه قلة وعي والاتزان النفسي عندهم مايستوعبش فيروس بالخطورة دي ..
والمستشفيات والحميات معظمها في اللالاند وده مش من النهاردة ...

بس احنا عندنا مسؤلية كشعب و هي الاكبر وهي الاستجابة للتوعية دي من خلال اتباع التعليمات
لأننا مش كبار عالمرض ... صحيح عايشينها بالبركة .. بس لازم نتعلم نأخد بالاسباب...
وعلي الأقل لو حد فينا اتصاب .. لازم يفهم انه لو مش فاهم هو بيواجه ايه ... ممكن يضر أقرب الناس ليه ..
فلو مش لنفسه .. يبقي لأهله ..