[ahmed 22]

عارف يا معلم
احنا في مرحلة كدا من الزمن
فيها ضباب علي كل شئ
المرحلة دي ممكن تكون من 10 سنين فاتوا
ل 40 او 50 سنة جاية
معظم الاجيال اللي هتخرج في الوقت ده
مالهاش مكان في سوق المستقبل ومتطلباته
...خاصة مع تضخم عدد السكان
وكمان احتياجات سوق العمل بتقل مع كل تطور في التكنولوجيا
ومش هتاخد غير المتميز في مجالات محددة
الفترة الجاية فترة الفري لانسرز ولغات البرمجة والعمل المستقل
اللي مش محتاج يكون ليك مدير او وظيفة ثابتة بمرتب ومعاش ..
بس محتاج تكون عندك الكفاءة اللازمة انك تدير حياتك
وانك تكون متميز عن غيرك عشان التنافسية
والشراسة اللي هتكون موجودة علي اسبقية اللي يلحق الفرصة ..

الي حد ما احنا بنختبر جزء بسيط من ده حاليا في عالمنا المتواضع
وبالتالي جزء كبير من الاجيال الموجودة هيتظلم سواء حب ولا ماحبش
وهيتفاجئ بقلة الفرص اللي مهما عافر هيحس انه مش قادر
زي ما كان بيتقاله وهو صغير... لانه اتشحن كلام .. ماتشحنش ادوات

لان متطلبات المستقبل والصعود لحد دلوقتي الاهل مش قادرة ترصدها
فيكونوا وسيط بينها وبين ابنائهم ... لان الواقع اسرع منهم
وكدا كدا كله عايشها بالبركة
اللي مش هتكون كافية بعد كدا انها تدفعنا لقدام

والقائمين عالمجتمع مش قادرين يوصلوا للمجتمع افكار بكرة
لانهم لسا عايشين في نقد امبارح وتحميل الاخطاء علي غيرهم ..
وفي نفس الوقت
بيجهزوا لبكرة بشعارات وهمية هما اساسا مش فاهمينها
مجرد قشور بيحاولوا يتواصلوا معاها ..
بس عاجزين يكونوا وسيط وجسر للمستقبل
احنا في معادلة صعبة وكبيرة ..
ربنا يتولانا