[ahmed 22]

فكرة السلام العالمي دي فنتازيا غير قابلة للتطبيق ..
انا مافتكرش مثلا علي مر التاريخ ان كان فيه سلام تام علي كوكب الارض ..
دايما هتلاقي اللي عاوز يفرض ارادته علي الغير ..
دايما فيه واحد شايف ان العالم لازم يعيش فوضي مطلقة
عشان هو يدخل يفرض نظامه بأفكاره وبفلسفته واسلوبه
دايما فيه صراعات ما بين حضارات .. دي طبيعة البشر ميالة دايما للغرور
بحسب حياة مفكريه وفلاسفته وصراعهم مع الحياة اللي بينقلوا افكارهم
لقادتهم اللي بيغيروا شكل العالم مع كل طرح جديد لكيف نعيش حسب وجهة نظرهم ..
وبأشكال مختلفة .. ..

تحس اننا في معمل تجارب الظاهر بتاعها الحروب
بس الباطن بتاعها طبقا للبعض
اننا بنوصل لمراحل تطور افضل طبقا لدفع شوية مجانين العالم نحو الهاوية
لان احنا بنتتطور اسرع مع كل حرب بتحصل .. ومع كل بحث علمي فيه صناعة لصاروخ
فيه بحث علمي تاني بيطلعنا القمر .. مع كل حرب بتحصل فيه دولة علي موارد نتيجة
احتلالها لدولة تانية فبتزيد اقتصادها
زيادة اقتصادها ده بينعكس علي تطويرها لمزيد من الابحاث تجاه رخاء شعوبها وبتتنقل لشعوب تانية
وبيكون فيه تبادل بعد كدا للفوايد بين الشعوب ...
يعني معادلة ظالمة حبتين ..

بس دايما زي ما قلت هيكون فيه واحد شايف انه الأصح وعلي الباقي اتباعه ..
طبقا لمن هم في الظل اللي عندهم الامكانية الكافية للاقناع بأنهم الاصح وعلي الباقي اتباعهم ..
وعشان تتبعه لازم يكون قوي .. وعشان يكون قوي لازم يملك سلاح
وهنا كان دور صناعة الخوف عن طريق الاداة الكلامية من اشخاص
دورهم دايما انهم يشعروا الجانب الأقوي انه لازم يغزو ولازم يسيطر
خوفا من ان الجانب الاضعف يقوي وبالتالي يبادر وهو اللي يغزو ..

ومع ذلك دايما هيكون فيه قوة عظمي بتتصنع كل فترة من الزمن لحد ما تتهد
من قوة صاعدة تانية بتداول الاجيال .. باختلاف الارادة وباختلاف الميول ..
وباختلاف الطرق .. امبارح كانت الطرق عسكرية ... حاليا الغزو اقتصادي .. غدا اجتماعي
الطريق بيتشكل وبيترسم بمدي الانحطاط اللي بنوصل ليه ..
يعني الحروب العسكرية هي الطف الطرق ..

ومع ذلك العالم بيتشكل علي طريقة الاقوي بس مش شرط حاليا يرفع سلاحه عليك ..
وهو بيغيرك وهو علي كرسيه ..

كله بيقعد علي كرسي صناعة العالم ..
وكله وقع من عالكرسي ..
مرورا بينا كعرب ...

يعني لو هنشوف الفصل الاخير في حكايتنا كعرب
هنشوف ان احنا فقدنا الارادة لما افترضنا كعرب ان مشكلتنا في الاساس
لتحقيق السلام هو تحرير فلسطين ... انانية الدافع اخفت كل يوم مزيد من الدوافع
لحد ما بقينا بنهوهو بس .. من غير ما نخوف
لأن الباقي ولو حتي من نفس ديينا
ما بقاش يفرق بالنسبة لينا سواء عاشوا في ضغائن او اختنقوا وماتوا في مجاعات زي الصومال
او اضطهاد زي بورما او الايغور في الصين وغيرهاكتييرر .. ده فقط اظهر اننا مجموعة ممثلين ليس اكتر
يعني انت بتقول ان الشعوب الاسلامية كتلة واحدة ومع ذلك يا اخي لو قلنا انك ضعيف
ومش قادر تحارب ... بس في ايدك مثلا تأكل شعب زي الصومال .. في ايدك تخلي صوتك اقوي
تجاه نجدة الناس في بورما او الايغور .. ماعملتش اضعف الايمان ... وكان في امكانك ..
فيعني كدا هتحرر بكرة فلسطين بذكائك .. يا اخي ام التمثيلية اللي عايشينها كل يوم دي
لان ده مع الوقت ومع كل ضيق للحيلة
حول اتجاه افكارنا انها بقت مقتصرة علي ذاتها عكس ما تدعو ليه رسالتنا ..
وبالتالي عمرنا ما هنحقق السلام الداخلي جوانا ..
وبالتالي كل يوم بيصعب اننا نغير من واقعنا ..