الحلقه الثانيه من خليكى اجمل

[خالد ابو النجا]

الحلقة الثانيـــة

بعنوان

الثقــــة بــــالله

_السلام عليكم ورحمة الله وبركاته

_وعليكم السلام ورحمة الله وبركاته

_إيه الاخبار؟!

_اهو..كله ماشى

_ماشى رايح فين؟

- رايح مشوار

_ماشى ياستى...المهم قولى إيه المزاج النهارده؟

_والله النهارده انا أوت مود خالص

_ليه كده؟

_حاسه انى مخنوقه..وكمان فقدت الثقة فى كل اللى اعرفهم..تخيلى صحباتى وطلعوا مش اد ثقتى بيهم...!!!

_ياااااه..ده بقى اللى مزعلك أوى كده!!ولا تزعلى نفسك خالص..انا معاكى اهو..ثقى فى براحتك واتكلمى وانا كلى أذان صاغية..!!

_فاكره لما قولتى لى المرة اللى فاتت عن أخلاقى؟!!

_أكيد فاكره..السبب؟!

_انا بجد حاولت..بس حاسه أنى مش هاقدر أكمل..انا بصراحة مش واثقه من نفسى اننى ممكن انجح

_ليه بس الكلام ده؟!!

_أنت شايفه مافيش حد معايا يستاهل أثق فيه ونتغير سوا

_لأ مش صح..فى حد معاكى ويستحق الثقة كمان..وهيساعدك

_.....؟!!وياترى مين ده؟!

_ربنا....

_........؟!!!!

_أيوه ربنا

_بس هو ينفع يكون ربنا صديقى وبعدين هيساعدنى ازاى؟!!

_أيوه طبعا ينفع..ياالله...تخيلى لما يكون صديقك ربنا..لما تتكلمى تتكلمى معاه..لما تتعبى..يقويكى..لما تفقدى الثقة بنفسك..بثقتك فيه تكونى أوثق

_ازاى..؟!!

_اسمعى كده الحديث الرائع ده... ربنا عزوجل بيقول فى حديث قدسى:

(أنا عند ظن عبدى بى وأنا معه إذا ذكرنى فإن ذكرنى فى نفسه ذكرته فى نفسى وإن ذكرنى فى ملأ ذكرته فى ملأ خير منه وإن تقرب إلى شبرا تقربت إليه باعا وإن تقرب إلى باعا تقربت إليه ذراعا وإن اتانى يمشى اتته هروله )!!

تخيلى..لما اكون واثقه أن ربنا هيساعدنى وهيقوينى وهاقدر أكمل ...

ووقت لما كل الناس تتخلى عنى لأنى بغير نفسى للأجمل ...

تلاقى لا الناس ولا اللى بيعملوا فارق معاكى أصلا لانى حطيت كل ثقتى فى ربنا ... ربنا وبس

تخيلى بقى لما تكونى محسنه الظن بربنا... الدنيا هتفرق أد إيه معاكى...!!

_...............؟!!!!

_اسمعى كده ربنا عزوجل بيقول إيه :

(إنما أمره إذا أراد شيئا أن يقول له كن فيكون)

تخيلى (كن...فيكون) إللى امره منفذ بالسرعة ده وإللى مالك كل الكون ...مش يستحق منى اثق فيه...

_(البنوتة منتبهه جدا... وبدأت عيونها تدمع..؟!!!!)

_ حبيبة قلبى..ربناوحده هو اللى لازم تثقى فيه..يعنى انتى لما وثقتى فى البشر عملوا إيه؟!

_هه...مع أول حاجه كنت محتاجهم ...ولا كأنهم موجودين...!!!

_شوفى بقى لما تثقى فى ربنا..فى أى وقت تحتاجيه هتلاقيه... ده ربنا يعنى اللى دايم وموجود على طول ...

ومش كده وبس ده ثقتى بيه هتنفعنى أوى

_....؟!!!! ازاى؟!

_فى دنيتى..هانجح واتفوق وأكون أجمل لانى وثقت بربنا.. فعملت اللى عليا ووثقت أن الخالق مش هيخذلنى فنجحت فيه

وفى آخرتى ..هيكون مكانى الجنة

_الجنة...؟!!!

_ بالظبط..لانى لما وثقت فى ربنا
عملت كل حاجة حلوه واجتهدت اوى وجاهدت نفسى

_طيب افرضى الناس اتريقت عليا
واستهزأت بيا اعمل ايه وقتها؟!!

_وقتها لا كلام الناس ولا اللى بيعملوا معاكى هيفرق خالص ولا هيأثر فيكى لانك واثقه فى ربنا وبتعملى لربنا فبقيتى متأكده أن ربنا هيكون معاكى وهتنجحى فى اللى بتعمليه..

قولى لى بقى ..بالله عليك لما وثقتى فى البشر عملوا ليكى ايه؟!!

_ولا حاجه خالص.. ده حتى كمان طلعوا اى كلام ومش يستحقوا الثقة لانهم مش يقدروا يعملوا اى حاجه خالص

_طيب .. بالله عليكى ينفع أفضل واثقه فى البشر اللى...

ولا أثق فى رب البشر اللى مش بيتخلى عن عباده أبدا؟!

_أكيد طبعا لازم أثق فى ربنا..ربنا وبس

_واعرفى طول ما أنتى واثقه فى ربنا هاكون أجمل...وهافضل أجمل...

_أنا من دلوقتى مش هاثق فى حد غير فى ربنا وبس...

_وهو ده المطلوب...أثق فى الخالق .. وبثقتى فيه هاقدر أتغير واعمل كل حاجه وكمان هاكون اجمل... وخلى فى بالك دايما الحديث القدسى (أنا عند ظن عبدى بى...)

_طيب.. بعد إذنك دلوقتى عشان عندى ميعاد مع ربنا ...
هاروح له وأطلب منه يعينى ويقوينى لأنى خلاص مش ليا أصدقاء غيره ...

_وأنا مش هأخرك على ميعادك وإن شاء الله
المرة الجايه تقولى لى ثقتك بربنا فرقت معاكى اد إيه...

_إن شاء الله

_يلا.. السلام عليكم ورحمة الله وبركاته

_وعليكم السلام ورحمة الله وبركاته

استنونــا مع حلقة جديدة

وخليكى أجمـل

[Ќonto]

حلقه جميله جدا جدا

وفعلا الثقه بالله من أهم الحاجات

اللي المفروض نؤمن بيها

جزاك الله كل خير على الموضوع

وفي انتظار الحلقات الباقيه

تحياتي

همس

[خالد ابو النجا]

اقتباسالمشاركة الأصلية كتبت بواسطة нαмs sтαяحلقه جميله جدا جدا

وفعلا الثقه بالله من أهم الحاجات

اللي المفروض نؤمن بيها

جزاك الله كل خير على الموضوع

وفي انتظار الحلقات الباقيه

تحياتي

همس

بظبط كدا برافو عليكى
اسعدينى جدا بمروك الرائع
وبردك الجميل
واشكرك على حسن المتابعه
تحيتى لكى ياعزيزتى