قراري

[رانيا الاسود]

قراري بقلمى المتواضع


اول مرة فكرت فى ان يبقى ليا قوانينى الخاصه كان من زمان قوى بس دايما كانت القرارات اللى باخدها او اللى بيكون نفسى اخدها بتتميز بالتفرد و الغرابه و معظم الوقت كانت بتبقى عكس الناس و اقر انه فى غالب الاحيان بيكون ده نابع من ان انا عاوزة ابقى فريدة من نوعى , متميزه عن الباقى بفكرى و عقلى و اعترف ان فى بعض الاحيان كنت غلط و وقعت نفسى فى مشاكل كتيرة بس هاعمل ايه بقى ما هو الواحد لو مغلطش مش هيتعلم .

فى انواع من القرارات كتيره بس من اكثر القرارات تحديدا هى القرارات اللى خدتها حول حياتى العاطفيه لأن ده الجانب الوحيد فى حياتى اللى انا مختبرتوش على الاطلاق عشان كده ده اكتر جانب انا متشوقه له و بفكر فيه .


و اهم قرار اتخذته هو ان انا مش عاوزه احب اى حد قبل اللى هيبقى زوجى و اللى هشاركه حياتى و لو فكرتوا فى الموضوع شويه هتلاقوا ان انا على حق و ان كلامى مفيهوش اى شىء من الرجعيه و انه كلام منطقى جدا لان انا بؤمن بعذرية الروح و زى ما فى عذرية جسد مفروضه علينا فى كمان عذرية الروح و هى النوع الاطهر لكنها مفروضه على اكتر من جسدنا دى مفروضه على ضمايرنا و قلوبنا و راحة بالنا و هوصف لكم انا قصدى ايه

تصوروا معايا لو انا حبيت واحد و هو حبنى بجد و بقينا بنتكلم و يمكن كمان بنتقابل بس لسه احنا الاتنين صغيرين يعنى فكرة الجواز غير وارده دلؤتى على الاطلاق لكن فى نيتنا ان بعد ما نخلص دراسه هو يفاتح اهلى فى الموضوع و نتخطب و نتجوز و نعيش حياه سعيده
... يااااه...
للأسف الحياه مش سهله للدرجة دى لأننا بشر و بنحس و عندنا مشاعر منقدرش نتغلب عليها , يا ترى لما اكلمه كل يوم و اقوله "بحبك و مقدرش استغنى عنك" و هو يقولى "و انا بحبك و انتى نور عينى" , ازاى بعد النوع ده من العواطف يبقى محرم عليه انه يلمسنى او ان انا انام فى حضنه و احس بيه بيحمينى, ازاى بعد اللى قلناه لبعض مكنش قاعده جنبه و ايده فى ايدى و اكون سانده راسى على كتفه.

و يا ترى لو بنحب بعض يبقى ازاى هنستحمل عذاب زى ده لحد ما يبقى الوقت مناسب ان احنا نتجوز , اكيد هنغلط ,اكيد فى يوم هيلمس وشى بأيده و انا و هو خايفين ان حد يشوفنا و احنا بنعمل كده و اول مره احط ايدى فى ايده هكون مش فرحانه لأنى عارفه ان دى اقصى حاجه نقدر نعملها ادام الناس و فى نفس الوقت خايفه ان يكون حد من الناس دول يعرفنى .

يا ترى انت عاوز اول لحظات بينكم دى بدل ما تكون كلها حب و دفء و موده و امان تكون عباره عن مزيج من الخوف من اللى حواليكم و ذنب لأنكم عارفين انكم بتعملوا حاجه غلط و ندم لأنكم عارفين ان انتوا مش من حق بعض , و لو مفترقتوش و اجوزتوا هتحسوا ان جوازكم مبنى على قواعد مش ثابته لأن اول كل حاجه بينكم كانت غلط و ممكن تلاقوا السعادة او لحظات من السعادة لكن انا متأكده ان عمركم ما هتحسوا بدفء و امان كامل لأنه كان مفقود بينكم من البداية.

اما الاختيار التانى ان انتوا هتفترقوا و هتعرفوا ناس تانيين و هتحبوا تانى و تنجرحوا تانى و كل مره هتلاقى جزء من روح اللى انتوا حبيتوه بتظلل روحكم و تفقدها شفافيتها لحد ما فى يوم هتتجوزى واحد يمكن يكون طيب و كويس لكن عمرك ما هتحبيه بكل جوارحك و عمره ما هتحسى انك كلك ملكه و ان كل السعادة وجدتيها لما عرفتيه لأن سعادتك الكاملة اتدمرت لما بدأتى تقارنيه باللى عرفتيهم قبل كده .
كل لحظه بينك و بينه هتقارنيها باللى انتى عشتيه قبل كده مع اللى قبله و كل بسمة منه و طريقه كلامه . يا ترى هتقدرى او تقدر تعيش مستريح الضمير و انت مقضى حياتك كلها مقارنات و ندم على اللى فات, لكن الندم مبيرجعش اللى فات, الندم مش هيرجعلك روحك اللى قطعتها بايديك و لوثتها بطيشك و اندفاع مشاعرك فياريت نلحق نفسنا قبل ما يفوت الاوان. و حتى لو السعادة مش واجهتنا فى الحياة يبقى عندنا راحة بالنا و رجاحة عقلنا و ايماننا ان رحلة مشاعرنا و افكارنا و تأملنا مع ذاتنا بمثل اهمية او اهم كمان من الهدف اللى بتوصل له الرحله .

يا ترى هل كلامى صح؟؟
و لا انتوا رأيكم ايه؟؟

رانيا الأسود

[ARAGON]

أهلا بيكي يا رانيا

الموضوع صراحة صعب

بس الفكر الصحيح .. (انتي شايفاه ازاي)

دا مبدأ القرار لو عرفتي الصح والخطأ هنا

ها تعرف أكبر قد من الاجابة

لكن عليك اولا ان تكوني مقتنعة بما تفعلين

أنا لا أحب ان اغوص في أهواء الأحبة وغيرها

ولكن ... دائما هنالك تحفظ

--- س+ص = ع

ليها ابجديات كبيرة في حياتنا

لكن دائما .. بنلاقي

الصح والخطأ والمبدأ اللي البيت

ويقيني انا مؤمن بيه

--- في الحقيقة كما قلتي القرار قرارك ---

بالتوفيق دائما

[SiLver Spectra]

موضوعك جميل جدا و اثار تركيزي
شوفي يا رانيا
الانسان لازم بيدرك افعاله و بيكون باني توقعاته
و الشاطر هو الي بيعمل حد لكل شيء في حياته

بمعنى ان واحده حبت واحد و واحد حبها
لو حبهم دا صادق
و الله لو طربقتي السما و الارض هيتجوزوا بعض
اما لو حب مش مسؤول
أو ححب طائش
هتكون النتيجه زي ما ذكرتي

المشكلة في ان الانسان صعب انه يدرك المستقبل
هل العلاقة جدية و هل الطرف التاني هيستمر للنهايه!!

بس صدقيني البنت و الولد الشاطر عمره ما يوقع نفسه في قصة منتهية
بمعنى انها لما تحب بتحب شخص هادف ,,يعني جاد في العلاقة

و ما تكونش ضحية الفراغ العاطفي
لأنها لو استسلمت لعاطفها بدون عقلها هتكون النتيجة أسوء

شكرا لموضوعك القيم
الي لازم نستفيد منه فعلا و بيذكرني بموضوع سابق في القسم بعنوان (مشاعر ملقاه على الطريق)

تمنى نشوفك دوما معانا في المنتدى,,,

[~♥ Queen sozan♥~]

يااااااااااااة يا رانيا بجد انا فرحانة اوى ان لقيت حد بيفكر ذى
الحمدلله انتى صح وانا كمان صح وكل انسان فى داخلو مشاعر
وفراغ عاطفى بس كل حاجة وليها وقتها
وفعلا يا رانيا لازم يكون حبنا ومشاعرنا دى لى انسان واحد لى هو شريك العمر
عشان فعلا ممكن نرجع نقارن بين لى الماضى والحاضر وهتكون مقارنة صعبة
ومستحيلها
ربنا يسبتك عند موقفك ويسبتنى معاكى يا رانيا
تقبلى تحياتى
همس الجراح

[رانيا الاسود]

technical

اقتباس الصح والخطأ والمبدأ اللي البيت ويقيني انا مؤمن بيه --- في الحقيقة كما قلتي القرار قرارك ---

اكيد و شكرا على وجهة نظرك
هى بالفعل حكاية قرار بيتخذه الشخص عن اقتناع مش عن ضغط مجتمع او ناس
و شكرا على مرورك


silver spectra

اقتباس بس صدقيني البنت و الولد الشاطر عمره ما يوقع نفسه في قصة منتهية بمعنى انها لما تحب بتحب شخص هادف ,,يعني جاد في العلاقة

اممممم بس ايه الضمان برضه؟؟!!
حتى لو كان شخص هادف و جاد فى علاقته
برضه مش هيبقى فى ضمان ليا انا

اقتباس شكرا لموضوعك القيم

العفو و شكرا على الرد


همس الجراح

اقتباس يااااااااااااة يا رانيا بجد انا فرحانة اوى ان لقيت حد بيفكر ذى الحمدلله انتى صح وانا كمان صح وكل انسان فى داخلو مشاعر وفراغ عاطفى بس كل حاجة وليها وقتها وفعلا يا رانيا لازم يكون حبنا ومشاعرنا دى لى انسان واحد لى هو شريك العمر عشان فعلا ممكن نرجع نقارن بين لى الماضى والحاضر وهتكون مقارنة صعبة ومستحيلها ربنا يسبتك عند موقفك ويسبتنى معاكى يا رانيا تقبلى تحياتى

بجد انا فرحت اوى بردك
و انا من جوايا حاسه ان ده الصح
شكرا قوى على ردك
و يا رب نثبت دايما على الصح

[حنـــــون]

انتى مش بس كلامك صح دا هو دا المنطق الى لازم

كلنا نفكر بيه ويكون اسلوب لحياة افضل اكيد هتيرح

كل بنت وولد فى بدايه اى علاقه سليمه محترمه مبنيه

على اساس الخلق والامان اهم شئ ان دايما الانسان

يكون ضميره مرتاح وحساس انوا مش بيعمل حاجه غلط

بجد دااحساس رائع وزى ماقولتى لو تمادينا فى علاقات

مجهوله مش عارفين نهايتها ايه بنفقد شفافيه اروحنا

وبيتساوى كل شئ عندنا بعد كدا

بجد موضوعك اكثر من رائع استمتعت جداااااااااا بقرائته

واستفدت جدا جدا جدا منه

تسلم ايدك وتفكيرك ياقمر منورا القسم ونتمنى نشوفلك مواضيع كتير

نورتينا تحيااااااااااااااااااااتى

اختك حنون

[رانيا الاسود]

اقتباس وزى ماقولتى لو تمادينا فى علاقات مجهوله مش عارفين نهايتها ايه بنفقد شفافيه اروحنا وبيتساوى كل شئ عندنا بعد كدا

و على فكرة مش فى الموضوع ده بس
لكن كمان فى تعاملتنا مع الناس يكون فيه صدق
لأن الشخص لما بيبدأ يكدب و يخدع و يتحايل
ده بيبقى بدايه لطريق من التنازلات و الاستسلام الى الضعف

اقتباس بجد موضوعك اكثر من رائع استمتعت جداااااااااا بقرائته واستفدت جدا جدا جدا منه

ربنا يخليكي ده من ذوقك و شكرا جدا على مرورك

[Ќonto]

بجد كلامك كله منطقي وجميل اوي ،،

أنا كمان رأيي من رأيك ،،

وفعلا المفروض محبش حد غير اللي هتجوزه ،،

وغالبا لما بنحب في وقت مش مناسب ،،

العلاقة بتفشل في الأخر ووقتها حتسي بفراغ عاطفي ،،

وهيمتلكك شعور شديد بالرغبة بالارتباط ،،

ومش هيبقى عندك اهداف في الحياه غير الحب ،،

وفعلا لما الشاب والبنت يتعرفوا على بعض بالحلال ،،

هيحسوا بالراحة وانهم مش بيعملوا حاجة غلط ،،

لأن مفيش أحلى من الأخلاق والاحترام ،،

وغالبا العلاقة بتفضل مدى الحياة لأنها مبينة على طاعة ربنا ،،

وبجد أحييكي على موضوعك الجميل ده ،،

ومنورة المنتدى وقسم الأقلام ،،




أختك ،،

[رانيا الاسود]

اقتباس وفعلا لما الشاب والبنت يتعرفوا على بعض بالحلال ،، هيحسوا بالراحة وانهم مش بيعملوا حاجة غلط ،، لأن مفيش أحلى من الأخلاق والاحترام ،، وغالبا العلاقة بتفضل مدى الحياة لأنها مبينة على طاعة ربنا ،،

بالفعل و ده هو هدفي من الكلام ده
ان يكون في راحه فى حياتى
و محسش ان دايما فى عيون عليا منتظرين انى اعمل حاجه غلط

اقتباس وبجد أحييكي على موضوعك الجميل ده ،،

شكرا جدا و بجد مروركم و ردودكم هو اللى بيعطى للموضوع اهمية

[احلى وهم]

رانيا موضوعك جميل ورايك صحيح
لكن اختلف معاكى فى ان الانسان مش يقدر يمنع نفسه انه يحب
جايز انت قدرتى وربنا رزقك ده بس صدقينى لو اتحطيتى فى ظروف تانية جايز هيكون رايك غير كده
بس الاكيد انالا نسان يقدر يتحكم فى تصرفاته لان المشاعر صعب جدا ان حد يتحكم فيها