لكل فتاة اقتربت خطوبتها

[تيمور]

معاد خطوبتك قرّب وخلاص كلها كام يوم وتنزلي تشتري الشبكة؟..


نفسك حد يساعدك؟ ويقولك على إيه الجديد في موضة الشبكة؟ وخصوصا موضة الدبل؛ لأن مفيش وقت إنك تنزلي وتلفي وتشوفي في المحلات إيه اللي نازل جديد..



ولا يهمك من أي حاجة
يلا نتفرج مع بعض


بالنسبة للدبلة





طبعًا الدبلة لها مكانة مميزة في الاختيار؛ وده لأنها هي رمز الارتباط بين أي اتنين، وبانصح أي بنت وولد على وش خطوبة، ومش معاهم مبلغ كبير أنهم يكتفوا بالدبل وبس.

وبالنسبة لطريقة اختيارك للدبلة

فدي حاجة سهلة جدًّا.. كل اللي عليكِ إنك وإنت عند الصايغ تلبسي أكتر من شكل، وتشوفي شكل كل واحدة عامل إيه في إيدك، لو حاسة إنها لايقة عليكي يبقى اتكلي على الله، واختاريها، لكن لو حاسة إنها مش لايقة عليكي يبقى اختاري تصميم تاني..

وبالنسبة للموضة:
فالدبل بالذات موضتها مش بتنتهي يعني الشكل القديم اللي كان موجود زمان أيام مامتك هتلاقيه موجود دلوقتي موضة برضه، بالإضافة إلى ظهور تصميمات جديدة تانية زي:

الدبلة المكونة من "الدهب الأبيض" في "الأصفر"، وفي "الدهب الأبيض" الخالص، وفي "الدهب الأصفر" الخالص.


وفي الدبل اللي فيها مجموعة من الفصوص الصغيرة، وفي اللي فيها فص واحد صغير، وفي الدبل العريضة، والدبل الرفيعة، وفي النهاية الاختيار بيرجع لكي أنتِ.


ودى مجموعة دبل عشان يكون عندك فكرة عن الموجود

وخدي بالك..
إنك بعد ما تختاري الدبلة تطلبي من الصايغ إنه يحفر عليها مثلاً أول حرف من اسمك، وأول حرف من اسم خطيبك، أو تاريخ الخطوبة أو تاريخ أول لقاء، وفيه حاجة تانية طالعة جديد، وهي إنك تكتبي على الدبل كلمة حب مثل "...To My Love". وتكتبي اسمه..



وعلى فكرة ممكن إن خطيبك يختار دبلته بنفس الشكل بتاع الدبلة بتاعتك.

الدبلة الماسية





والدبلة الماسية أو "المحبس" زي ما فيه ناس كتير بتقول عليه هو الإطار اللي بيحيط بالدبلة، وفيه منه أشكال كتير، علشان كده لازم تبقي ذكية، وتختاريه مناسب للدبلة، بحيث يبان هو والدبلة كأنهم شيء واحد..

فمثلاً
لو اختارتي دبلة دهب أصفر خالص يبقى لازم المحبس يكون دهب أصفر.

لكن لو الدبلة دهب أبيض يبقى اختاري المحبس هو كمان دهب أبيض، وابعدي نهائي عن الدهب الأصفر.





لو الدبلة دهب أصفر في أبيض يبقى في الحالة دي عندك حرية في الاختيار إنك تختاريه أصفر أو أبيض..








وخدي بالك كمان إن لو الدبلة عريضة يبقى يا ريت إنك تختاري المحبس رفيع، والعكس طبعًا لو الدبلة رفيعة يبقى اختاري المحبس عريض..
باقي الشبكة يا قمر
بالنسبة لباقي الشبكة فاختيارها بيرجع ليكي إنت، ولذوقك الشخصي وإمكانيتك المادية، فممكن إنك تختاريها عبارة عن


توينز:




وبيبقى عبارة عن الدبلة الماسية "المحبس" والخاتم بيكون بفص ماس ¼ قيراط، وعلى فكرة الماس فيه منه ألوان، فبجانب اللون الشفاف التقليدي برضه فيه ألوان تانية زي الوردي، الأصفر، الأزرق، البنفسجي، وكمان الفص فيه منه أشكال كتير زي المثلث، والمربع، والبيضاوي، والمستطيل..


وعلى فكرة تَمَن الماس بيحدده مقاييس محددة زي النقاء، طريقة القطع، اللون والقيراط.


طقم دهب كامل:
كمان ممكن إنك تختاري الشبكة عبارة عن طقم دهب كامل سواء دهب أبيض أو أصفر ..


توفّقي طقم




وممكن إنك تختاري إنسيال وسلسلة وخاتم وحلق يكون شكلهم مناسب لبعض بحيث إنهم يبانوا كأنهم طقم واحد.
منقووووووووووول

</B>

__________________

احمـــــــــــــــــــــر يا احمريكـــــــــــــــــــــــا
:SuN032:

[Silver Flower]

شكرا للموضوع الراشع والنصايح الحلوه

[خالد ابو النجا]

تسلم على الموضوع والمعلومات الرائعه
وفى انتظار جديدك
تحيتى لك

[dr.marmar]

موضوع رائع
ونصائح كتير مهمه
انا علي فكره خطوبتي كانت قريب
ودبلتي بردوا شكلها جديد
كلها فصوص بيضاء ومعاها فصوص بني
شكلها عاجبني جدا
مع ان فيه ناس كتير كانت مستغربناها في الاول
تسلم علي التوبيك

[تيمور]

تشكرات على المرور الجميل الرائع
ويارب تكون عجبتكم وربنا يجمل حياتكم اكتر وكتر
تحياتى